Virus Detected

Chapter 3: Inspector

Theodore Suarez

"ANG LAYO NA naman ng tingin mo, pare." Napamulagat ang binata nang marinig niya ang utas ng isa niyang kasamahan dito sa PNP Police Station.

"Baka yung minamanmanan niyan ang iniisip," panggagatong ng isa pang pulis sa kabilang lamesa.

"Sino? Yung chicks? Ganda no'n pre, ba't 'di mo ligawan?" utas nung unang nagsalita.

Mabilis siyang kumuha ng pencil eraser sa may table niya at inisa isa ang pambabato sa dalawa.

"Mga utak niyo, alam ko kung saan dadapo ang usapan na 'to." Pagnanasahan kasi nitong dalawang may katandaan nang pulis ang sinasabi ng mga ito na minamanmanan niya.

"Ang seksi naman kasi no'n tutoy. Ang seksi na't ang ganda pa!" sabi ng unang pulis na si Mang Leroy.

"Oo nga, Theodore, kahit walang make-up ang ganda ganda pa rin. Kung hindi ko lang talaga mahal ang asawa kong e, liligawan ko 'yon." Parehas silang napatingin kay Mang Leroy dahil sa tinuran nito.

"Seryoso ka ba d'yan, Mang Julio? Gwapo niyo ho ano?" pang-aasar niya sa pinakamatanda sa kanilang tatlo. Halos na singkwenta'y uno na ang pulis na 'to kung kaya't gano'n na lamang ang pang-aasar niya sa tinuran nito.

"Baka bigla kang bawiin ni Lord, Julio, sa imahinasyon mong 'yan. 'Di ba ano, Theo?" nag-apir silang dalawa ni Mang Leroy.

"Kayo talagang dalawa kung makaasar kayo akala niyo ang gagwapo ninyo."

Kapwa silang napatawa ni Mang Leroy.

"At bakit, Julio? Sinasabi mo bang gwapo ka at mas gwapo ka rito sa ating bata?" utas ni Leroy.

"Aba'y oo, pare!"

Magsasalita na sana muli siya at makikisali sa asaran ng dalawa nang bigla silang makarinig ng tatlong katok sa pintuan ng kanilang opisina.

"Oh, mukhang nagkakatuwaan kayo rito ah," utas ng kanilang Chief sa police station na ito.

Napatayo silang tatlo at mabilis na sumaludo sa kanilang boss.

"Good Morning, Chief!" sabay sabay nilang usal. Tinanguhan naman sila nito at sabay sabay ring binaba ang kanilang kamay mula sa pagkakasaludo.

"Hindi naman, boss. Medyo nagkakaasaran lang." Untag ni Mang Julio.

"Ah gano'n ba? Oh sige, mamaya na lamang iyan at may assignment akong ipapagawa sa inyong dalawa— Julio at Leroy. Sumama ka na rin Inspector Suarez upang makatulong sa imbestigasyon."

"Sige ho, Chief." Pag-sang-ayon niya rito.

Iniabot sa kanilang tatlo ang tig-iisang folder. Binasa nila ang nilalaman doon at masusing pinag-aralan.

"May tumimbre sa atin na informat na magkakaroon diumano ng pagpapalitan ng mga ilegal na armas sa isang party na nakalagay d'yan."

Hinawakan niya ang invitation letter na kasama sa mga papel sa may folder.

Altamirano-Gardner Wedding Reception. Iyon ang nakalagay sa imbitasyon.

"Sir, kung hindi ho ako nagkakamali... Si Eliza Altamirano ho ba ang ikakasal?"

"No other than Suarez. Ang may-ari ng Altamirano Fashion Gala na si Lady Eliza ang ikakasal sa boyfriend nitong si Andrei Gardner."

"Paano ho magkakaroon ng palitan ng ilegal na armas sa isang espesyal na okasyon na kagaya nito?" tanong ni Mang Leroy.

"Iyon ang kailangan niyong alamin, kasama si Suarez."

"7 PM. Manila Hotel. Eksaktong detalye ng event," saad ni Mang Julio.