သစ်ခက်လေးရဲ့ ရင်ခုန်သံ 🍃
( အပိုင်း - ၁၃ )
"မာန်မင်းခ "
"ဗျာ "
မာန်မင်းခ ကုမ္ပဏီက ပြန်လာပြီး အိမ်ထဲခြေချလိုက်သည်နှင့် မေမေ့ခေါ်သံကြောင့် ထူးလိုက်မိသည်။
"ဒီမှာခဏ လာထိုင်ဦး "
ဧည့်ခန်းက ဆိုဖာပေါ်မှာ ၀င်ထိုင်ရင်း မေမေ့မျက်နှာကို အကဲခတ်မိသည် ။ အနည်းငယ် တင်းမာနေသယောင် ။
"ဘာပြောမလို့လဲ မေမေ "
"မင်း သက်လျာနဲ့ အဆက်အသွယ်လုပ်နေတုန်းပဲလား "
"ဟို.."
မာန်မင်းခ အဖြေတစ်ခုကို ခေါင်းထဲ အပြေးအလွှား စဉ်းစားနေမိသည် ။ ထိုစဉ် မေမေ့စကားအကြား သူ အံ့သြသွားရသည် ။
"ဒီနေ့ သက်လျာ အိမ်ကို လာသွားတယ် "
"ဘယ်လို ၊ သက်လျာက အိမ်ကိုလာတယ် ၊ ဟုတ်လား မေမေ "
သက်လျာက သူ့ကို အရင်မတိုင်ပင်ဘဲ ဘာလို့မေမေနှင့် လာတွေ့တာပါလိမ့် ဟု တွေးမိသည် ။ မေမေက သက်လျာကို အမြင်မကြည်ဘူးဆိုတာ သက်လျာကိုယ်တိုင်လည်း သိပါလျက်နှင့် ။
ဒေါ်နှင်းခသည် သား၏ မျက်နှာအမူအရာကို ကြည့်ရုံနှင့် သက်လျာ အိမ်ကိုလာမည်ဆိုတာ ယခုမှသိမှန်း ရိပ်မိလိုက်သည် ။
"သက်လျာက မေမေ့ကို လာနှုတ်ဆက်တာတဲ့လေ။ မင်းနဲ့ သက်လျာက သူငယ်ချင်းတွေအဆင့်ထက် မကျော်သေးဘူး မဟုတ်လား မာန်မင်းခ "
"ကျွန်တော်တို့.... "
"ဘာမှ ဆက်မပြောနဲ့တော့ ။ တကယ်လို့ မင်းတို့ ချစ်သူတွေဆိုရင်လည်း လမ်းခွဲလိုက်တော့။ မင်းနဲ့ သဘောတူထားတဲ့ မိန်းကလေးရှိတယ် "
"ကျွန်တော့် အိမ်ထောင်ရေးကို ကိုယ်တိုင် ဆုံးဖြတ်ပါရစေ မေမေ "
"မင်း ဆုံးဖြတ်မယ့် မိန်းကလေးက သက်လျာ မဟုတ်ဘူးဆိုရင် မင်းစိတ်တိုင်းကျ လိုက်လျောပေးမယ် ။ ဘယ်လိုလဲ "