သစ်ခက်လေးရဲ့ ရင်ခုန်သံ 🍃
( အပိုင်း - ၉ )
"အန်တီ သိန်း ၅၀ လောက်လိုနေတယ် သားရယ် "
"ဗျာ ၊ သိန်း ၅၀ "
မာန်မင်းခသည် များပြားသည့် ပမာဏမို့ ပိုက်ဆံချေးငှားရန် နည်းနည်းတွေဝေသွားမိသည် ။ ဒါပေမဲ့ သက်လျာတို့ ဒုက္ခရောက်နေတာဘဲ ကူညီသင့်သည်ဟု တွေးမိသည် ။
"ဟုတ်ကဲ့ ၊ ကျွန်တော့်ကို အန်တီ့ဘဏ်အကောင့်နံပါတ် ပေးခဲ့ပါ ။ ကျွန်တော် ငွေလွဲလိုက်ပါ့မယ် "
"ကျေးဇူးပါ သားရယ် ။ အန်တီ အဆင်ပြေတာနဲ့ ချက်ချင်း ပြန်ဆပ်ပါ့မယ် "
"ဟုတ်ကဲ့ ရပါတယ်"
ဒေါ်သက်ထားခင်သည် စာရွက်ပေါ်မှာ ဘဏ်အကောင့်နံပါတ် ချရေးရင်း...။
"ဒီမှာ အန်တီ ဘဏ်အကောင့်ပါ "
"ဟုတ်ကဲ့ ၊ ကျွန်တော် ငွေလွှဲလိုက်ပါ့မယ် "
"အေး ကျေးဇူးပါကွယ် ။ အန်တီ သွားလိုက်ဦးမယ်နော် "
"ဟုတ်ကဲ့"
မာန်မင်းခ သက်ပြင်းချမိသည် ။ သူ့ ဘဏ်အကောင့်ထဲက ဖေဖေတို့ထည့်ပေးထားသည့် ပိုက်ဆံထဲက လွှဲရမှာပင် ။အဲသည်ပိုက်ဆံတွေက သူ ဖေဖေ့ ကုမ္ပဏီ မှာ အလုပ်ကူလုပ်ပေး၍ ထည့်ပေးထားခြင်းဖြစ်၏ ။ ဖေဖေ နှင့် မေမေတို့သာ သိရင် ပြသနာတက်နိုင်သည် ။ မသိအောင် ခဏ ဖုံးကွယ်ထားမှာပင် ။
⚡⚡⚡⚡⚡⚡
"ရော့....ဒီမှာ သမီး သုံးဖို့ ပိုက်ဆံ"
"အမေ ဘယ်က ပိုက်ဆံရလာတာလဲ ။ ဒီနေ့ ဖဲဝိုင်းမှာ နိုင်ခဲ့တာလား "
"မဟုတ်ပါဘူး "
သက်လျာသည် အမေ့ပုံစံကို အကဲခတ်မိသည် ။ တစ်ခုခု အချီကြီးရလာသည့်ပုံစံပင် ။
"အမေ ၊ ဒီငွေတွေ ဘယ်ကရလာတာလဲ "
"ညည်း သူငယ်ချင်းဆီက "
"ဘယ်သူလဲ ၊ မင်းခဆီကလား ။ အမေ ဘာလို့ ဒီလို လုပ်ရတာလဲ ။ မင်းခက သမီးရဲ့ သူငယ်ချင်းလေ ။ သမီး သူ့ကို ဘယ်လိုမျက်နှာပြရမှာလဲ"