بعد داكشي اللي وقع .. ولا البوص فيدي بحال الخاتم بمعنى الكلمة.. كلشي فالقصر وففترة وجيزة ولا كينفذ اوامري انا.. اما عشيقة البوص ولات فينما كتشوفني كتخنزر فيا خصوصا الى كان حدايا هو.. واحد النهار بالليل عيط عليا.. لقيتو شارب بزاف .. وماقادش يهز يديه.. قلت هادي الفرصة ديالي باش نجبدو فالهضرة.. قالي باللي غادي لالمانيا.. وتما غادي يشري السلاح وغيجيبو للمغرب.. وغادي يصيفطو فباطو اما هو غايجي فطيارة.. كيتكرع وكيهضر.. فرحت مللي عطاني هاد المعلومة وزعمت نجبدو كتر..- بصبوصي.. قولي فين كتخبي فليساتك واش فالبنك.، - خخخخخخ حتى لارا كتسول ديما هاد السؤال.. واش بغيتي فلوس انا نعطيك.. طلبي اللي بغيتي.. انا فلوسي كلها كلها فسويسرا.. ههه وحتى وحدة مغتقدر توصل ليهم.. شوية وهو يطيح ناعس وبدا يشخر.. اووف على جيفة كيداير.. نضت غطيتو وهو هكاك.. وخرجت.. مشيت خديت تليفوني صيفط ميساج لياسر مابانش ليه الاثر... بقيت كنقلب عليه دزت على الغرفة ديال ديك لارا وانا نسمع صوتو.. حليت الباب بشويية نشوف .. بانلي جالس حداها وهي كتلون عليه وسكرااااانة.. ولابسة كسوة مغطية ليها شوية ديال اللحم والباقي كله ملط.. وهو شاد راسو وكيهضر معاها.. القلب الميت هو هادا.. انا غلطت بزاف مللي فكرت انه ممكن نكون حييت ليه قلبه.. هادا انسان كيهمو الفلوس فالدنيا وماشي شي حاجة اخرى.. انا وياه فمهمة وخاصنا نكملوها.. ديك الساعة كل واحد يمشي يعيش حياته.. تسنيت تما حتى خرج كيسد فالصديفات ديال القاميجة.. - بالصحة.. تخلع مللي شافني.. شاف فجميع النواحي ليكون تما شي واحد وجا جرني من يدني ودخلني لواحد البيت.. - يمنى اش كاديري فهاد الساعة ... - كنت قصارة مع البوص.. كما نتا قصرتي مع صاحبتو.. وها حنا تلاقينا.. - انا مقصرت مع حد.. انا كنت غير كنحاول نجبد منها شي معلومة.. - متشرحليش.. وانا مالي.. حياتك هاديك دير بيها اللي بغيتي.. لاش كتحاول تبررلي اش كادير.. حتى نتا راجل.. وضعيف قدام نزواتك..- انا ماضعيفش.. هادي مهمة.. ونفذتها.. - بغيت نقولك.. البوص قالي فلوسو راهم فسويسرا كلهم.. وباللي غايمشي لالمانيا يدير صفقة شراء اسلحة وغيصيفطها فالباطو وهو غايجي فالطيارة.. - ماقالكش فوقاش.. - ماقالش.. دابا شنو غانديرو الفلوس مصدقوش فخزنة.. - خليك من الخزنة والفلوس دابا.. حاولي تجيبيلي معلومات على الصفقة واخا؟؟ - غريب.. ماشي كانت كتهمك الفلوس شتك بدلتي رأيك.. - يمنى.. عفاك ماشي وقت الغيرة ديالك دابا راه عندنا مهمة.. وليت حمرا مللي قال غيرة.. - غيرة؟؟ لا وانا لاش نغير.. مالي اش بيني وبينك .. تصبح على خير مشيت وخليتو مازدت حتى كلمة.. السيد ضمني.. دابا نوريك اياسر غا بلاتي عليك...الجزء 17 بعد داكشي ديال البارح مبقيتش كنحمل ديك خيتي.. وحلفت حتى نفقصها بالبوص ديالها كما فقصاتني بياسر.. وحتى ياسر غا بلاتي عليه.. وليت كنعامل البوص برقة ودلع وحنان.. وهو مازايد فيهم كيعجبو الحال.. ياسر مفهم والو خاف لا تضيع المهمة بالغيرة ديالي على حساب تعبيره.. ولكن انا حاولت نثبت ان المهمة شيء والمشاعر شيء اخر.. خصوصا بعدما جبتليه جميع معلومات الصفقة اللي غايدير بوكرش فالمانيا.. بقا حاير كيفاش حتى قدرت نجيب هادشي من البوص اللي مهبل كلشي وحتى واحد ماقادر يجبد منه شي حاجة .. الله ينجيك من كيد النسا.. العيالات ميقدر عليهم غا اللي خلقهم.. وصل النهار اللي سافر فيه البوص وانا نلقا راحتي .. تنفست.. ولحسن الحظ مشات معاه ديك لارا .. هناتني.. الى بقات تحوملي على ياسر غنقتلها ونتهنى.. صبحت ناعسة.. مفقتش بكري كما ديما باش نوض لداك البوص.. بقيت على خاطري وتهليت فراسي.. نزلت قلت نقلب على ياسر.. نستاغل كل واحد ملهي فراسو.. ونصلح معاه الحالة.. باش متديهش مني ديك خيتي.. بقيت كنقلب عليه ملقيتوش.. حتى عييت سولت قالولي راه خرج بكري وماولاش.. تفقصت واش هادي فرصة نبقاو انا وياه هو مشا .. بقيت معندي خاطر ناكل والو.. دوزت نهاري كنستنى فيه والو.. مكاينش ومرجعش.. استغليتها فرصة مشيت لبيت البوص نقلب فيه.. لقيت فيه شي وثائق مفهمت منهم والو.. صورتهم وصيفطهم فالواتساب ديال ياسر.. مشيت لبيت الصفريطة.. قلبت المسخوطة كلشي سادة عليه.. قنطت ملقيت ماندير.. بقيت جالسة كنحاول نتاصل بياسر.. شوية وهو يصوني..- الو يمنى.. - ياسر فينك .. راني بقيت بوحدي.. - انا .. شوفي راني فألمانيا.. - اش كدير تما.. - لارا طلبت مني نمشي معاهم.. هادي فرصة باش.. تيت تيت تيت.. - الو .. ياسر .. الو.. عاود تاني لارا.. واخا اياسر.. انا غانوريك.. بقا الشيطان اللي كامل كيتناجر معايا.. انا نخطط وهو يخطط.. دابا انا واش معاجباهش.. اش عاجبو فديك لارا ديما تابعها.. شنو اللي فيها هي وانا مافياش.. انا غانطرطق.. نزلت مشيت للكوزينة وبديت ناكل خرجت الفقايص فالماكلة.. علاش اياسر علاش.. علاش تخوني معاها.. محملتش راسي.. بقيت مفقوصة.. الغد ليه بقيت كنفكر فيه.. وشداتني القنطة بوحدي فالدار.. فكرت فصحابي وفالبنات.. انا شابعة ماكلة هنا فهاد القصر وهما ميتين بالجوع.. مشيت شريت الماكلة.. شريت بزاف ومشيت للبلاصة المعهودة وللاسف حتى واحد معرفني.. تجمعو عليا مللي لقاو فيدي الميكات .. - الله يخليك الالة ويعطيك متمناي.. - معرفتونيش؟؟بقاو كلشي كيشوفو فيا.. - انا يمنى نسيتوني.. - لا يمنى .. ميمكنش.. بقاو كيعنقوني.. وفرحو بالماكلة اللي ديت ليهم.. كلاوها وبقاو كيعيطو على بعضياتهم.. الفرحة هي نشوف فيهم هاد النظرة ديال الفرحة حيت تفكرتهم ومنسيتهمش.. بقيت كنهضر مع ياسمين وقالتلي اخر الاخبار.. - فخبارك اصحيبتي.. داك البوليسي كل نهار كيسولني عليك.. - شكون عدنان.. - اه اختي.. - غريبة.. ياكما شد عليا شي حاجة الحفيظ الله.. بقينا كنهضرو.. حتى بان ليا عدنان وهو ماداهاش فيا.. انا مشيت عندو.. - شاف.. - نعام الالة.. كاين شي ما نعاونك.. - عدنان معرفتينيش.. - لا الالة نتي واش كتعرفيني.. - انا .. انا يمنى.. اللي كانت كتطلب.. المتسولة.. - مستحيل.. شحال تبدلتي.. وليتي قرطاسة.. - نعام!! -احم احم.. نشربو شي قهيوة.. - واخا ليا الشرف.. - انا اللي ليا الشرف.. تفضلي الالة.. مشينا انا وعدنان لواحد القهيوة استقبلونا تفضلي الالة تفضل اسيدي.. اختارولنا احسن طبلة..جلست وانا نسهى.. رجعات بيا الذاكرة للماضي.. نهار كانو مالين لي كافي كيجريو علينا من حدا بابهم.. وكيضربونا.. بحال الا كنا هازين الجذام.. شحال كنا نتمناو شي حضن ديك الساعة يحسسنا بالامان.. كاينين اللي دايرينها هواية ولكن اللي هو مؤكد انه حتى واحد من المتسولين ما كره يتزاد وفمه معلقة ديال الدهب.. حتى واحد مابغا داك الاهانة لراسو.. تفكرت عدنان..والاهانات دياله ليا وضربو ليا.. كان كيتمتع بتعذيبي حيت كان عارف اني مغانهضرش.. ومكاينش اللي غيدافع عليا.. ضعيفة.. ها انا يمنى.. نفس الشخص.. ماتبدل فيا غا المظهر.. نفس المشاعر ونفس الانسان ونفس الروح.. غا الكركاس هو اللي تبدل.. ها هو عارض عليا لكافي باش يبان حدا الناس باللي جالس مع بنت زوينة وشيك..- اش غاتشربي.. يمنى.. ا يمنى فين سهيتي.. - اا غا هنا.. بغيت جو دوغونج.. - الله الله على جو دوغونج.. كيفاش حتى تبدلتي هاكا.. وليتي وحدة اخرى.. ممتيقش راسي.. - شي بنات عاونوني قراوني.. وانا عايشة معاهم دابا بحال ختهم.. - يمنى!! عندك يكون شي بيت دعارة.. - ههه متخافش.. هادو بنات قاريات.. - مزيان .. ديك الساعة عرفيني عليهم.. بقيت ساهية وكنفكر.. فين وصل ومعامن عايشة.. مع اللي بعاد بزاف على الناس.. حنى ماشي حثالة .. هما اللي حثالة.. فلوسهم كلها حرام.. الا كنا غاندخلو جهنم حيت كنا كنطلبو .. هادوك فين غايمشيو..
- يمنى .. شنو رأيك نسهرو ليوما.. - فين.. - فشي بواط.. وجدي راسك قوليلي فين ساكنة ندوز عندك .. - معرفتش .. واخا ماكاين مشكل نسهرو علاش لا.. - حقا فين داك اللي كان كيخلص عليك الماكلة.. فين وصلتي معاه.. - حم حم هاداك دار فيا خير وداني عند هاد البنات تهلاو فيا ومن تما ما وليتش شفتو.. - محملتوش انا.. مزيان مللي تفارقتي معاه.. باينة فوجهه محابسي.. يكون شي شفار ولا نصاب.. فايت شتو فشي بلاصة ومقدرتش نتفكر فيه.. اكيد ديجا شديتو شي مرة..-هههههه (اه يا عدنان لوكان تعرف باللي هو قاااااااتل مأجوووووووور) ههههههه- مالكي تضحكي وراه هادشي اللي كانقولك نيشان.. انا بنادم غير نشوف فيه نعرفو شكون- عندك الحق فهاد الزمان مكاينة ثقة.. نخليك دابا خاصني نوض.. تهلا فراسك.. نتلاقاو بالليل.. خدا نمرتي وكلشي ومشيت.. شديت طاكسي.. ورجعت للقصر.. هاد الناس كيتزيرو غا مللي كيكون البوص.. كل واحد واخد راحتو.. دوزت نهاري فالليل صاوبت راسي .. طلبت من الشيفور يخرجني يديني للسونطر .. منه صونيت لعدنان.. جا عندي بالطوموبيل ديالو.. كان مفركس وكيبان بوكوس .. حتى انا كنت واعرة تهليت فراسي بزاف .. صراحة كنت مفقوصة من الداخل بداك النفاق الاجتماعي.. حتى واحد فالدنيا مكيبغي الروح.. كلشي كيبغي المظاهر.. واول واحد هو عدنان.. اللي كنت عوالة نشحفو.. وندمو فالنهار اللي عاملني بيه على اساس المظهر ديالي .. وكل الضرب اللي كليتو منه .. ظلما.. مشينا لواحد بواط كلاس وباينة غالية وكيمشيو ليها غير الناس الهاي كلاس.. غا من الدخلة .. دخلنا ونفس الاستقبال .. وفعلا للداخل كانو تما غا الناس اللي كنت كنشوفهم شي حاجة بعييييدة وحتى نسعى عندهم مكنتش كنزعم.. جلسنا والموسيقى مجهدة .. اووف الناس فين عايشين.. عدنان كان ناشط.. وكيهضر وانا مكنسمع والو.. كنشوف هاد الوسط اللي جابني ليه.. الفلوس مكينقيوش.. النظافة مكتعنيش حوايج نقيين.. لا ابدا.. بالنسبة ليا هادو كلهم غارقين فالوحل.. هاد الحوايج مكنتش كنشوفها مللي كنت فالزنقة ومعندي حتى ريال.. كانو كيبانو ليا الفلوس جنة.. وشي حاجة زوينة بزاف.. الانسان كتكون النعمة فيديه مكيعرفش يستغلها ويستعملها.. شوف فين كيتضيعو الفلوس.. انا لا أنتمي الى هذا الوسط.. انا ماشي من هاد الناس ومستحيل نكون شي نهار منهم.. جابو لعدنان قرعة ديال فودكا.. مكانش يصحابلي باللي حتا هو عندو مع هادشي.. انا مبغيتش وقلتله لا .. مبغيت نشرب والو.. طول الوقت مهضرتش غير كنشوف وهو بحال الا سارط كاسيطة.. - يمنى.. بغيتي نوضو نشطحو.. - واخا.. نضت نشطح معاه وانا عقلي ماراهش هنا .. كنلاحظ هاد الناس كيفاش عايشين.. الوساخة.. كاين عيالات كبار وشارفات بدل ميمشيو يعبدو الله هما كيجيو هنا مع شباب صغار وكيشطحو ويسكرو.. شوية وهو يبان لي اخر شخص تمنيت نشوفو فهاد البلاصة.. اه صديق البوص اللي تستاني داك النهار .. وكان سكراااان ومجمعين بيه بزاف ديال البنات.. ولكن هو ولد لحرام مقشعني غير انا.. ناض بحال الصاروخ عندي .. - لينا.. اش كاديري هنا .. - بعد مني فين كنعرفك.. حيدته مني وبغيت نهرب وهو شادني واما نلقا عدنان ضربو وطيحو الارض.. تما ناضو البوديكارد ديالو.. شبعو عدنان عصا مسكين كانو غايقتلوه.. وانا مكان فيدي غير نهرب.. عدنان الا كتاب فعمرو شي نهار راه غايعيشو .. موقف لا احسد عليه.. خفت بزاااف مشيت دغيا للقصر.. بدل حوايجي.. ولبست بيجامة ونزلت بحال الا كنت فالدار بقيت كناكل.. باش الخدامة يشوفوني .. وباش الا مشا حتى فضحني داك الزمر نقدر نكذبو.. لاول مرة هضرت مع كلشي اللي فالقصر.. مهما كانت مكانته.. وعطيت الماكلة حتى للحراس ديال الباب.. باش يأكدو باللي شافوني فالقصر ومخرجتش.. بقيت مرعوبة.. وكنفكر فعدنان مسكين.. الله يا ربي واش يكون مات..الجزء
