☆ ذنـــــبٌ بـــلا ذنـــــب ☆

¹ الــــبــــارت الــــاول ¹

تمتزج اصوات العصافير و البلابل فتنتج سمفونية الطبيعة بانغام متناسقة في تلك القرية المظلمة التي لم يطل عليها شعاع النور رغم وضوح قرص الشمس ، يمسك الوالد ذلك المقص تحت ضوء تقاليدهم يحاول قص اجنحة ابنته بينما تحول بينها و بينه والدتها في حديث غير متوافق
في المطبخ حيث تستمع سري الابنة الوحيدة لعائلة ريفية تتكون من اب و ام و خمس ولد و ترجو ان تميل الكفة لامها

ابو سرّي : ام سلمان بنتج تطمح لشي مستحيل ماعدنا بنات يروحن معاهد بالولاية و يدرسن ( الولاية قبل تسمية اخرى للمدينة )

ام سرّي : خلي البنية طايره بنفسها حتى المدرسين يمدحون بيها و يگولون حرامات تگعد و اخوها يوديها للولاية

ابو سرّي : الناس اكلو وجهي من وراها كمت امشي و اتخفى منهم رايحه كل يوم و جاية انوب بالمدينة

ام سرّي : و شبيها بنتي حتى تتخفى من الناس قابل ناهبه شو مستورة و الحمد الك ربي ماتشيل العباية من راسها ، لا عيني ابو سلمان بنتي جبل

ابو سرّي : هاي بنيتي قطعة من روحي هي الي ادخل بيها الجنة و اريد استرها و ابن عمها مابي عيب و مابقى بي صبر اكثر عليها رايدها هاي اخر سنة الها و خصلت زين و خلص كلامي

ينام الاب تروح زوجته على بنتها للمطبخ
- سمعتي ابوج يمة هذا الي طلع بيدي و انتي تعرفين اهلج من يقفلون

سرّي : ما قصرتي يمة بعد امري لله هذا ابوية و ماكدر اكسر كلامه لو اعانده انوب مي وجهه يروح كدام اهل القرية

- الله يستر عليج

-بس ها هم راح يبقى عندي امل اكمل و احقق طموحي

يدخل الاخ الكبير سلمان
- تكملين ما تكملين اول وتالي لابن عمج هذا كل تعبج لا شي سرّي

ترتبك سرّي و تسكت
الام - ابني مو الا لابن عمها هواي بالقرية يتمنون سرّي مثقفه و بنية معدلة بالشغل

بانفعال - و شبي محمود يمة هذا ابن عمها حجزها من هي صغيرة و متروح لغيره مفهوم سرّي

- ما كلت شي عنه بس بعدني صغيرة و اني ماريد اتزوج هسه هذا مو حلمي

- ماتبقين صغيرة المرة تكبر قبل الرجال سرّي و كلمة ابن عمج تمشي عليج حتى قبل لا يتزوجج ، الظاهر دلال و حب ابوية الج كبر راسج

تباوع على امها و تسكت هي تعرف النقاش وياه عقيم

- سرّي لاتخلين القريتي بالكتب يأثر ع عقليتج تبقين بنت عرب و تقاليدنا فوگ كل ثقافه و كتاب

- عاداتنا حتى فوگ المصحف سلمان فوگ كلام الله؟

- هذا ماعليه انا حجيت و خلاص

الام في محاولة انهاء النقاش الحاد - يمة گومي نامي باجر ورانا حصاد

- على امرج يمة