كسرة قلب

٢٥

احس وشه قويه صارت بأذني ماادري شلون وصلت غرفتي مو واعي الكلشي مااتذكر شلون وصلت وعيت على روحي وانه گاعد على چربايتي وعكازتي مشموره مسافه عني يمكن طايحه
لحظات انعاد كلشي بذاكرتي زفتها ووجع گلبي
شغله عزت عليه وظلت بخاطري ماسمعت معارضه وگايله مااريد يمكن لو گايله ابوها مايجبرها گبل چنت عاذرها بعيده عني اتخيلتها مثلي تمثل النسيان وبيها شي يحن الي لحظات شفتها بدون تركيز بس بيهن خدودها موورده مرتاحه مبيينه
وانه هم مرتاح بس ياراحه هاي حته بونستي تمر عليه نسمة هوه بارد الروحي المتوجره
واتذكرها اتذكر ايامي وياها شجابها وشتريد اجت هوه انه اريد انسى
افكر ساعات واندگ الباب گلت فووت اكيد امي جايه تشوفني
فاتت علي رفعت راسي مو امي هاي
احس بيه بركان اريدها ومشتاق الها وشوفتها نبهتني على هواي اشياء مامفكر بيها عبالك صحتني وذكرتني هيه ليش مارفضت الزواج ليش ماگالت مااتزوج
رفعت راسي الها وانه اتضاهر بالبرود والبيه بركان من الشوك واللهفه والحنين والعتب عيوني عاتبنها ومنتظرها شتريد تگول
ظليت صافن عليها مكياجها المبالغ بي ذهبها التارس اديها وصدرها بس عيونها بيهن حچي وصرت ماافهم لغة العيون صرت ماافهم كلشي اريد توضيح اريد السانها ينطق وبداخلي اتذكر مواقف تجي ابالي اول مره واحضر الروحي اعذار واحاول اصدگ اعذاري هيه اتزوجت وابنيه وماتكدر ترفض ولا تواجه شني الفايده من رفضها شتحصل غير كسرة الخاطر  اتمنالها حياة سعيده وربي يسعدها
بعد ماطولت بالصفنه وهيه تتنوعلي من شافتني ساكت وانتظرها شتحچي كالت

..شلونك كرم

..شتشوفين انتي گلتها وتحسرت حسيت الوجع شگ صدري

..اشوفك زين ويارب دومك بخير

..ماادري ليش جوابها استفزني گتلهاالحمدلله ..وانتي اشوفچ مرتاحه والفراگ لايگلچ حليانه احد گالچ لو بس انه انتبهت
ابتسمت وگالت لا هواي گالوو حليانه
كرم انه وانت زغار وانت الطريق گدامك الولد فرصته اكثر من البنيه وكدامه مشوار طويل انت بعدك الي بعمرك مايفكرون يرتبطون بس اني اتزوجت وراح اصير ام وزوجي يحبني ويحترمني وغصبا عني احترمه والماضي مهما كان حلوو خليته بظهري اليوم انت اخوي وابن عمي اجيت متعمده حته اشوفك وتشوفني واسمعك هذا الحچي صار ايام ارتبله اريدك تبقى قوي مثل ماانت وربي يرزقك بلي تعوضك وتكون احسن مني واحلى

.. خيبة امل قويه حسيت بيها ماجنت منتظرها تكول انت تبقى حبيبي وحبي الك ماله بديل بس لو باقيه ساكته هواي احسن الي.. جاوبتها  خلصتي حچيچ

..لا منتظرتك تحچي واحاچيك

..ماعندي حچي بعد الگلتي ماينضاف علي شي  شغله وحده خليها ابالچ انه قوي طول عمري وغيابچ ماكسرني حته تجين تگليلي خليك قوي مامنتظر منچ مسانده لو تنبيه
ثاني شي انه وانتي مو اخوه ومااصير اخوچ ابد ايام وانه اشوفچ غير اتزوجتي الله يسعدچ ويهنيچ ولامره ذكرتج مادعيت الچ بس حچيچ هذا يدل انتي محابتني مثل ماحبيتچ انتي ماحابه اصلا يمكن چنت عاجبچ هسه شنو العاجبج مااعرف شكلي يجوز جي  ابن عمج اهتمامي يمكن هوه العاجبج بس حب ماحابتني لو حابتني ربع حبي الج مااجيتي تتمنطقين علي وتگليلي انت اخوي والبعمرك مامفكر يرتبط علا صوتي شويه هذا الأنشاء الي گلتي مني كاتبه الج منو گلج احفظي والقي بدون ماتفكرين  ولچ ايام وليالي انام والمخده تشهد على دموعي هسه انتي جايه تسولفين علي انتي اصلا شجابج المن اجيتي مو اريد انسى انه والله اريد انسى
شجابچ النه
..حبيتك والله بس كلشي خلص ليش تربط نفسك وياي وانه اصلا بديت حياة جديده ومرتاحه بيها ليش انت تتعذب