كسرة قلب

٣٤

..ام شاهين جايه تشوفه

..لا اله الا الله وتالي وياها ماراح اخلص انه ..وين جانت هسه جايه تشوفه وبهالليل حلمانه شني

..دخلت سلمت وبسلامي صارت عيني بعينها شگد اكرهتها وصرت اشوف ذاك الجمال قباحه
فهد گال تعال اگعد واسمع منهم

..شيخ انه منهم كلشي مااسمع ولا اريد اسمع وخاصتا هاي حچايه وحده ماتنطق صوتها مااريد اسمعه انت احچيلي همه شرايدين بهالليل

..تريد تشوف ابنها وتگول صار اشهر ابجي واليوم ابوي يلله وافق يحاجيكم

..وين چانت هيه تعرفه ابنها هسه من تشوفه بشارع بسوك تعرفه وين جانت من شمرته وهوه طفل نفاس ماراضع شي من صدرها ولا مفكره تنطي شي حته حليب مامجهزته وهيه تعرف راح تشمره علينه وين چانت اريد اعرف انه انتوو هم عدكم ....تنهدت وسكتت الحجي بعد ماينفع وانه هم مااكدر احچي انتوو مهما يكون بضيافتنه وكاعدين بديوان الشيخ ومايجوز بي بس الحچي الموزون والي بخاطري احچيهن كلهن شينات راح ابلعهن مثل مابلعت غيرهن مو الخاطرج ولا الخاطر ابوج لا انه احترام النفسي
اهلنه يگولون لحيه احشمها ولحيه احشم لحيتك منها
وانه اريد احشم روحي عنكم ولد ماالج يمي من تشتاقيله اتذكري هوه نفسه الذبيتيه وهوه ابن يوم
نفسه الماردتي تربينه حته لايشغلج عن  محبوب الگلب  نفسه العفتي واتزوجتي وره شهرين هوه نفسه
شني الخلاج هسه نحبينه وحله بعينچ

..ابني مو بكيفك تمنعني

..صحت لا بكيفي واريد اعرف ياكيف يمنعني ابنج التحچين عنه ماسهرتي عليه ليل ولا گعدتي ليله تراقبين صخونته خاف تزيد
كلهن انه سويتهن ذني ودموعي چانت تصب عليه ليشي ختلف ع الجهال ليش ماكو ايد ام ناعمه تحضنه
وتشوف حرارته وتحتوي
ليش وليش وليش

فهد..شفت عيونه لمعت وتاثر وهوه يحچي خفت عليه يضعف گدامهم وهذا مااراضاه صحت صگر حچيك وياي عوفهم همه ام تريد تشوف ابنها خلها تشوفه الوجه الله

..شيخ تره حته الله مايرضا والله ميرضا الله خلقنه كلنه وكل شخص عنده شي يقدمه هيه شقدمت من امومتها شنطت حته بالمحكمه تنازلت عنه

..ميخالف اعمل باصلك وجيبه تشوفه

..ماردت اكسر حچاية الشيخ ابوها وخوالها اثنين گاعدين ماحجوو شي ينتظرون الشيخ هوه يتصرف
كتله هوه نايم ولو ماتسوه اگعده من نومته الخاطرها بس خل يجي صگر يجيبه الكم انه بعد ماعندي شي وياكم وخلي ابالچ هذا اخر يوم تجين هنا على شاهين مو اطردج بس اذا تردينه الچ بالشهر يوم ساعه مو اكثر ساعه تشوفينه وترجعينه

طلعت واسمعهم يحجون ويتشكرون
صعدت بوسته وكعدته انطيته الكرم دايخ كوه يفتح عيونه
تنهدت احس همومي رجعتلي خليت ايدي على وجهي ورجعت راسي
وتالي وياي رحجعت دعاء وصارت ام براسي
وين جانت ماخلفت مانسته
بس الوجه الله ميخالف كلشي يهون مو الخاطرها الخاطر شاهين خاف من يكبر عباله انه مانع امه عنه