#عروس_من_بغداد
3
من كثر ما يردد مخاوفه من اهلة ..خطرت ببالي فكرة اهدده
اااه دتوجعني ايدي
تذكر هو الجرح الي ب ايدي ...
لزمتها واني اتوجع
اذا ما اتعوفني اصيح والم اهلك واگول الهم ابنكم ما دبرها ....
قاطعني ينهر بيه
كملت
وجرحني بزندي واذاني ......... وخر مني
اخر كلمه عطت بيها خليته يتراجع خايف لا اسويها وافضحه يم اهله ويطلع كذاب ...التهى بالضيوف والغدة واني بغرفتي ما طلعت بعد .. اهلي كلساع واحد منهم جاي يمي ..
ومرت خمسة ايام على عرسي واني مثل ما اني اماطل واتهرب منه .. وهو ماعنده وسيلة غير التوسل بيه . . راحوا اهلي لبغداد ...واشگد توسلت لأمي تاخذني وياهم ...عبالها دلال عروس ويروح .... بذيج الفترة صرت ادعي على ابوية على هاي الذبة الي ذبني بيها لمصلحته هو وبس والا اني شنو مصلحتي ؟؟
عبالي يطلع بيه خير بس اي صفه مابيه لا احس عنده رجولة من توسلة كالأطفال و لا شهامة اهل الجنوب الي رجيتها .كل ليلة تمر بالكوة انام من الحاحة......
عگبت السبعه واني منطوية على نفسي ..عمتي گالت الي اطلع اشتغل حتى أتالف وياهم ...هنه النسوان عدهم يطلعن الصبح ينضفن و يروحن للبستان ...هنه يگولون نطوش اني اكول يرعن البهايم و الزرع .... وعمتي تشرف على الفلاحات الي يحشن خضروات .. واتبيع المخضر على البگاله ..يعني بستنجية درجة اولى ...اقصد عمتي اخت ابويه مو عمتي مرت الشيخ ..
الي استغرب منه نسوانهم تشتغل من تفتح عينها لحد ما اتنام والزلم دوم كاشخه .. وگاعده ؟؟
الاراضي اراضيهم بس منو العمال .؟ هه نسوانهم العمال ؟ عمتي ام رجلي روحها بالدواب والدواجن وصنع الجبن والگيمر الطيب يبيعون منه . يجن الضهر تعبانات ينامن واني هم بديت اتعب بس اني ونسوان حموين اثنين يخلن يمي نشتغل بالبيت والبقية يطلعون نسوان حموين الي يبقن بالبيت مو دوم لان يتناوبن بس اني ثابتة بالبيت ما اطلع ...
الشغل متعب وضيوف عمي الي ما يخلصون متعبين اكثر ..واگفه على رجلية من الصبح لليل .
اكتشفت بهاي الايام بعض الامور واولها ان زوجي مستضعف اهنا ؟ الك مستغل طيبة قلبه الي يطلقون عليه على البركة من اهل الله حتى امه اكثر واحد تطلب منه طلبات هو مقدام ، فزاع الي بس ينهى ويتأمر عليه دونا عن اخوته ... صحيح هو على كل اخوته كلمته مسموعه لكن لاحظت مقدام من دونهم يعيط عليه وما يحترمه حتى اولاد اخوته ما يصيحوله عمي وماخذين عليه .. هذا الشي زادني نفران منه اكثر واكثر واستغليت ضعفة برفضي اله .... جنت انام على الارض وعايفة اله السرير ...مرات من يضل يلح اضل اضرب بنفسي وامعش هو يشرد ويلف راسه وينام .. مقدام عنده بيكم حمل ....... و اخوته هم ياخذون بيهن المحاصيل والبضايع ويطلعون بيهن خارج المحافظات ......
بيوم جنت اطبخ على المشعل لان الطباخ مشغول هم وبس بنات حماية فزاع المراهقات وياي يشتغلن على الطباخ ...اني گاعده على تخت و اقلي سمچ ...مادة رجليه من كل جانب ..
دخل عمي فزاع ...اني اصيحه بعمي لانه رجال داخل بالاربعين و هم هيبة يخوف مثل عمي بضخامته و تسلطة .
لا يتأخر غداجن ...عيب جدام الوادم ...
