Ora Ngapak Ora Kepenak

Lhaa mentakan ngapa nin nek basaku ngapak?
Apane sing lucu jajal?
Apane sing merguyokna jajal?
Biasa bae lah, luuur
Sing luih ngapak lan merguyokna seliane ngapak
ya ngadug diug koh...

Lhaa mentakan ngapa nin nek aku tresna mbasa ngapak nang ndi papan?
Jarene kudu nguri-uri budhaya?
Jarene kudu tresna ming tanah air?
Lha ngapak mbokan salah sijining bandha budhaya Indonesia mbokan, lur?
Sing mantese diuri-uri lan dilestarikna..
Udu malah dikelalena lan dislenthakna
Nanggo basa liyane sing digungna luih gaul..
Udu malah dedadekna dagelan,
Bahan guyonan lan gujisan.

Inaaang... Mentakan ngapa nin
aku kon mingkem bae aja nyuara
Mbok konangan ngapak-ngapak?
Jarene lagep ayuha kayangapa, angger ngapak
Ayune nyong sehal ilang jere..
Rumusan sekang ngendi kuwe?
Nyong serius takon kieh?
Aja janji ndalil rika yaa...
Madeih pisan..

Geh yaa.. Ringokna kang..
Selawasing nyong ambekan nangndi papan
Nyong ragadang rila nglalena basa ngapak
Nyong ragadang tegel nylenthakna basa biyungku..
Belih bagen nyong darani ngluthuk jethuk..
Belih bagen nyong diarani "sehal ilang ayune"

Geh yaa... Ringokna, Yuu..
Selawasing nyong jlang - jlangan ngendi bae..
Nyong tetep gothot tresna nguri-uri basa biyungku..
Belih bagen siki diguyu didagelna seindonesa..
Mbesuk... Sawijining dina... Lagep teg buktikna..
Yen basa ngapak kuwe sugih makna..
Lemahe adem, tentrem lan mbetaih
Wonge jujur, nglesa, ademan, ra kaken sengek lan nrimo ing pandum..
Wong wadone ayu asli, tresna, manut lan bekti..
marang bojo lan gelem dejak urip priyatin.

Yakiiin...
Inyong bangga lair dadi wong ngapak
Inyong bersyukur marang Gusti Allah
Inyong bisa lanyah ndrememel ngapak
Sanajan awak kiye wis kiter ngranto
Ora ngapak ora kepenak
Ilatku wis kadung kecithak ngapak

(Ajibarang, Sanga April rongewuwolulas)

- itnasiw hadni ahtiem -