《 ١٨ مايو ٢٠١٠ 》
** لينا **
"بابا !! انا هنزل اروح عند هبة .."
قولت لبابا اللي كان بيقرأ الجورنال وبيشرب قهوته اللي الخدم عملوهاله ..
بابا "خلي عم سعيد يوصلك .."
"بس يا بابا--"
لقيته رفع حاجبه ، وأنا عارفة اني خسرت النقاش معاه ؛ لازم اروح مع عمو سعيد السواق ..
"حاضر .."
بابا "ايوة كدة ، شاطرة يا حبيبتي ، متتأخريش بقى"
خرجت من البيت ولقيت عمو سعيد مستنيني ..
"صباح الخير يا عمو سعيد"
عمو سعيد "صباح الفُل يا لينا هانم ، اتفضلي .."
فتحلي باب العربية اللي ورا ؛ وأنا قعدت وهو ركب ..
عمو سعيد "هتروحي عند الآنسة هبة بردو؟"
"ايوة يا عمو .."
بدأ يسوق وأنا كنت بلعب في الموبايل بتاعي ، فكرت في اني هحاول اهرب من عمو سعيد ازاي ومراقبة بابا دي ..
عمو سعيد "احنا وصلنا يا لينا هانم .."
فتحلي بابا العربية وخرجت وابتسمتله ، بعدين شوفت واحد واقف بعيد كدة ؛ مستني الوقت المناسب علشان يكلمني ..
"بقولك ايه يا عم سعيد ، انا هبيت هنا مع هبة ، وحضرتك روح لعيالك ومراتك ؛ هما عايزينك"
بصلي وهز راسه لا بخوف ..
عمو سعيد "مش هينفع يا بنتي والله ، ابو حضرتك هيقطع عيشي !!"
"متخافش يا عمو ، انا هكلمه ، اتفضل انت ، وأن شاء الله عدي عليا الصبح عشان تطمن كمان .."
اتنهد وهز راسه بمعنى ايوة ، خد العربية فعلا ومشي ، روحت خبط على هبة ، وهي فتحت الباب وكانت لابسة البيجامة وصاحية من النوم ..
هبة "ايه دة يا لينا !! في حد يجي بدري كدة !!"
"بدري !؟ الساعة ٦ المغرب يا ابلة وانتِ لسة نايمة لحد دلوقتي !!"
هبة "انا بحب اتمرقع في النوم ملكيش دعوة !!"
"يلا بس عشان منتأخرش !!"
هبة بصتلي ورفعت حاجبها وهرشت في شعرها ..
هبة "ليه هنروح فين؟ ولا --- ااااااهههه ، انتوا هتتقابلوا بدري كدة !! مش خايفين لتتقفشوا ؟!"
دعكت قورتي واتنهدت ..
"بدري فين يا هبة !! الساعة ٦ !! وعلى ما نلبس هيبقى فيها ٧ !!"
هبة نفخت ، ودخلت ، بصيت عليه لقيته بيشاورلي بمعنى ايه الاخبار ، شاورت بإن كل حاجة تمام وهو وقف مكانه ..
