** لينا **
- لينا !!
حسيت ان الدم اللي في عروقي نشف ، لفيت بالراحة خالص ولقيت بابا واقف قدامي وعينه بتطلع شرار ..
"ب-بابا؟"
بابا "ايوة بابا !! كنتي فين يا هانم ؟!"
"انا .. انا ك-كنت بشم هوا في الجنينة ، اتخنقت شوية ق-قولت انزل اشم ه-هوا ، وع-عديت على كُشك الكلب بتاعي واك-كلته"
كان كلامي مقطع ، شتمت نفسي في سري ولقيت بابا اتنهد وهز راسه ماشي ..
بابا "طيب يا حبيبتي ، انا بس قلقت عليكي وكنت بطمن .."
ابتسمت وبعدين طلعت اوضتي ، اتنهدت تنهيدة ارتياح ودخلت الاوضة لقيت هبة قاعدة وبتاكل في ضوافرها ..
"انتِ يا غبية !!"
هبة قامت وقفت وجات حضنتني "انا اسفة والله مكنش قصدي اعترف عليكي بالسرعة دي !!"
"تعترفي عليا !؟ يلعن ابو شكلك يا شيخة انا قطعت الخلف لما شوفت ابويا !!"
هبة "اعمل ايه انا كنت هتقفش وانا راحة اشرب ، وتاني مرة جاتلي فُقدان ذاكرة ومكنتش اعرف في ايه ، قومت اتكعبلت في ابوكي"
خدت نفس وبعدين ابتسمت وقعدت هبة على السرير ..
"مش هتصدقي ايه اللي حصل !!"
هبة "ايه ها ايه ؟! قولي !! بسرعة !! يلا !!"
"اخرسي بقى !! انا هقولك اهو ، محمد جاله عقد احتراف وقالي انه مش هيسافر غير لما نتجوز وهيجي يكلم بابا !!"
قولتها بضحكة وهبة زغردت من الفرحة ، سكتها وبعدين لقيتها اتظبطت في القعدة ..
هبة "مبروك يا لينو ، خلاص كبرتي وهتتجوزي وبعدها تحملي وبطنك تبقلل ومتعرفيش تدخلي من الباب وبعدها تجبيلنا نونو صغنن كدة العب بيه !!"
"تلعبي بيه !! هو انا نونتي هتبقى لعبة !! انا بس خايفة من حاجة واحدة .."
هبة اتنهدت "ابوكي مش كدة؟"
"بالظبط ، حاسة انه ممكن ميقبلش محمد ، بس انا اهو بحاول اقنع نفسي انه مش هيقبل يضحي بسعادة بنته .."
هبة "هو صح ابوكي راجل كلب فلوس .."
بصيتلها جامد وهي عملت احم احم ..
هبة "قصدي قلب فانوس ، بس هو اكيد مش هيرضى ان بنته تعيش تعيسة مع واحد هي مبتحبهوش ، واكيد هيوافق لما يشوف محمد بيحبك قد ايه"
"عندك حق ، بابا مش وحش كدة ؛ بصي هقولك على حاجة تنزلي تكلمي ابويا فيها وتعمليها بالحرف الواحد ، مفهوم !؟"
_____________________
** هبة **
نزلت على السلم وروحت ناحية مكتب بابا لينا وخبط ، سمعت صوته بيقولي ادخل وفتحت الباب ودخلت ..
