العاشر
بدور
كمت امسح بعيوني لان ماعاد اشوف ...بدور من تقرين هلرساله معناها اني طلعت وعفت قلبي فوك بلبيتونه صح هنه يومين بس للموت مانساهن ...واني اتشكرج هوايه على وكفتج اليه ...واصبري مدة واجيج .....ادعيلي اوصل بسلامه لا تنسني احبج محمد ....وهذا رقم ...............اذا كدرتي اتصلي عليه .....ضليت اقرة واعيد اقراها وابجي ...بس بيومها مابجيت عليه ضليت ابجي ع حظي وقسمتي الي ماكعدت وي بشر ...سديتها ..ورديت ضميتها ..ساعه افكر والوم نفسي مانتظرت وساعه لا اكول هوة لو حبني جان جاني للباب ...ضليت هيج لحد ماسمعت الهلال عرفت ...محمود خذاها لهاي السعلوة ....سديت اذاني بلمخدة وبيومها مانمت مثل هوايه ايام ......كمت الصبح ....مالي حته اطلع من باب الغرفه ماريد اشوف احد ..لحد.ندكت ااباب اكثر من مرة كمت سعاد جايتني هاي شبيج يمعود شصار ابحالج كومي كومي لا ضلين هيج ...كومي ياعيني كسرتي قلبي اني ملفلفه روحي بلبطانيه كمت لزمت اديها كمت ابجي كتلها ليش حضي فاين كوليلي فدوة لا حضيت برجال ولا طفل ولا اهل شسوي ...كامت تبجي وياي وتهون عليه صبري ربج كريم والله مارضيت ع زواجه من هايه ام عطوب شوانتي فلعه كمر وهذيج خنفسانه سودة ...كومي لخاطري غسلي ولا تبينين لحد هيج ربج يحلها كومي لخاطري مسحت دموعي وكمت ..وياها داطلع رجعتني كالت لا طلعين هيج وتفرحين الشمات خلي مكياج ولبسي حلو وطلعي ةلا تبجين لو شسمعين سويت الي كالته ولبست دشداشه حمرة وخليت شي خفيف وطلعت اني وياها شفت الكل كاعد وملتم من ضمنهم هل السعلوة ومحمود صبحت عليهم وباركت وكمت وي النسوان احضر ريوك وكل شؤيه اشرد بفكريه وتجي سعاد تكرصني وتوعيني واشوف عمتي تبوس وتحضن بهاي ومحمود ولا كلف روحه واجه حاجاني بشي ....بقى ع الحال اسبوع يطب ياخذ هدوم وغراض ويحجيله حجايتين ويطلع ....خلص الاسبوع يلا جاني وطب الغرفه ..كال اليوم يمج ومن اليوم يوم يمها ويوم يمج ..مجاوبته عفته ونمت تحارش بيه كال مشتاقلج ..كتله محمود حدي وياك لهنا ماكو شي يربطنه بعد طلعت البكلبي كله كتله صار شكد وياك ماسمعت تكول احبج ولا كلمه طيبه سمعتني ولا من جت السعلوة رضيت خاطري بشي ..انت طلعت من عقلي وروحي .....كال شنو يعني كتله واضح متاخذ مني شي روح لذيج ..هيه تشبعك كال هيج كتله يييي هجي دار راسه ونام واني هم ارتاحيت حجيت ونمت .....مرن شهر شهرين لا حبلت كوثر ولا شي وعمتي خفت بلحجي وياي وانه اشتغل واكرب واتعب ولا حمدا ولا شكورا ....مرت 6 اشهر ومصار حمل ..كيفت وفرحت والله وشفيت بيهم هنوب محمود كام يتخبل لا اني ولا هيه اكيد الخلل منه .....لحد مايوم جان بيومها يمي كتله اريد اروح لاعلي صار هواي مشايفه امي وقلبي يوجعني عليها ..تحايلت عليه وقشمرته ..قبل كال اوديج فديومين واجيج طرت فرح والله ...كال مو باجر بعدة نروح ...انتظرت يوم يوم حته اروح ..صار يومها وكمت من الصبح حضرت جنطتي وغراضي وطلعنه لبغداد وعقلي طاير ....ركبنه من الكراج واحسب الوكت نوصل احنه مانندل بيتهم الجديد وصلنه بغداد نزلنه بلعلاوي خابرنه اخوي دلانه ردينه ركبنه تكسي ورحنه ليمهم ....وصلنه للبيت تعبانه من الطريق وحارة ..وازدحام سلمنه عليهم وضلينه نسولف ونحجي صبو غدة اتغدينه وكام محمود كال يادوب الحك ارجع عندي شغل من الصبج جلبو بي اهلي فد مارضهه يبقى ...ودعناه وراح .بقيت يم اهلي اسبوع بهل الايام طلعنه رحنه للكاظم ولسوك وردينه ودونه للحدايق والملاعيب صدك تونست بيها وجنت اخابر محمود من تليفون محمد اخويه وكتله راح اشتري جوال منا ارخص ماحجه كال اخذي وجان يوميه اكوله باجر تعال واتوسل بي .....بهل ايام مرت اخوي تتحايل عليه توديني للمستشفى مال عقم والي يتاخرون بلحباله ..اني جنت اخاف اروح منا منا قبلت كالت الصبح نروح ....والله كعدنه الصبح ورحنه ..مستشفى جبيرة كلش وعالم هوايه بيها كل واحد همه شكل وضيمه شي ..وصل سرايه اطب طبيت للدكتورة وشرحت الها الصار فحصتتي وسوت سونار كالت مابيج شي رحمج نظيف مثل الورد ...فد كتبت تحالليل الي حتى تتاكد مني ...وكالت المختبر هنا بلمستشفى روحي حللي وتعاي من وكت رحت وديت الورقه مرت اخوي تعبت كالت انه اكعد هنا وانتي اسالي وشوفي انه صارت بيه همه حتى اعرف شبيه ....دلوني للمختبر رحت نطيت اوراقي وكعدت انتظر شويه وصاحو اسمي طبيت جان جوة بلمختبر 3 زلم كبال اجهزة مدري شيسون بس سمعت بدور طلعي ايدج الرجال منطيني ظهره اني هم التهيت دارفع بلردن واطلع ايدي ...هوة وكف كبالي انطيته ايدي شدها حيل ونزلتها رفع وجهها بوجهي اعاين عليه هذا محمد اي والله محمد هوة هم ضل يعاين عليه ..اني عرفته ايدي من حالها رخت ونزلت جان لازم ابرة بيدة ..كال بدور ...كتله اي ....بدور ...كال شجابج هنا شبيج ..كتلها شون ماجابك الدهر عليه بليله ..رد شمرني عليك ....اني خنكتني العبرة ...وعيوني غرغرن دمع ...وهوة من ارتباكه وكعت منه الابرة ..وندار شالها جاب غيرها صاحبه كله شبيك اخذ اني عينه كله لا لا هسة ...كال بدور خلي اسحب دم ..هزيتله براسي اسحب ..كلبي يرجف وبيه حاله من اتوتر سنوني صك واضل ارجف ...كال شبيج خفتي كتله لا بس نصدمت ممامتخيله اشوفك بيوم ...يامه انتظرتك تجي بس لا انت جيت ولا انه نسيتك ...سكت كال حجي هوايه ماكدر اختصرهه الج هنا راح اكتب الج رقمي وخابري اكيد ...اعاين ع ايده لابس حلقه ...كال انتظري برة شويه واصيج اسمج وانطيج التحاليل ......اريد اكوم ع رجلي ماكدر احسهن ماتن كتله دخت كال اكعدي وهاج مي شربي ارتاحي بدور والله مانسيتج يوم ...كتله فدوة اسكت الي بيه كافي عفته وكمت طلعت برة ....صافنه صدك هذا محمد هيج بعد خمس سنوات اشوفه واحاجي ....هنوب ولا متغير شكله بلعكس صاير احلى بعدة بهلهيبه وهلصوت الحلو العطر ....ضليت سارحه لحد ماحس يصيح اسمي اكثر من مرة رحت اخذت النتيجه وكال ابطنهن الرقم طلعي انتظرج تخابرين ...اشرت براسي اي عفته ومشيت بس كلبي وجعني حيل وكل شويه ابجي لحد ماوصلت لمرت اخوي اني عيوني ورمن ..كامت ع حيلها كالت شبيج كتلها مابيه بس اخاف بيه شي كالت لا تخافين خرعتنين عبالي صارلج شي ..والله مطولنه شويه وطبينه وقرت النتيجه كالت كلشي مابيج نظيفه خلي رجلج يراجع يجوز الخلل منه ...كتلها انه حبلت مرة بس وكع كالت واذا انه اشوف رجلج الافضل يراجع ..طلعنه مناك لو بدي ارجع للمختبر واحضنه وميهمني عالم واكوله وينك ووين الوعد بعدك الضيم لفاني ....طلعت وكلبي يوجعني عليه والطريق كوله انه لو ابجي لو صافنه ومرت اخ ي تحجي عليه شبيج مثل الورد يمعودة لا تقرين روحج منه الصوج ومراح يخلف حته من هاي ..واكول هاي بخاطرها ابجي ع محمود ....وانه داحترك ع محمد .وشون صدفه وجمعتني بي لا ع بال ولا ع خاطر وصلنه للبيت وانه حيلي نهد من شوفته مو من تعب .....كعدت وضليت افكر بي ....ورديت كمت لمرت اخوي كتلها لا تنسين خابري محمد يجيب الي جوال ..عفيه .. هسة ادك عليه .. وولا يهمج شي ...رحت يم امي خليت راسي بحضنها وبجيت لحد مانمت ....جاه محمد وجاب الجوال وعلمني عليه شون استعمله وهيج ... خابرت محمود وكتله اشتريت جوال وهذا رقمي كال باجر جايج بعد مابيها اكوله بقيني بعد صار اسبوع يمهم .......كتله ميهم انتظرك .....سديته منه رحت جبت الورقه وطلعت رقمه اكتب الرقم وارجف ارجف ..طلعت برة بلحوش كتلهم راح اخابر محمود ....دك دك جاوب الو ..اووف خذت نفس كلت الو محمد بدور كتله ي كال شونج كتله برحمه الله وانت شونك كال زين ..بشوفتج اليوم ..كتله ليش ...عفتني ولا سالت ولا كلت كسرت خاطرها لليوم انه احن واون عليك ما فديوم فكرت تجي
ولا كلت كسرت كلبها وروحها وعفتها شكد مرن سنين مانسيتك لحضه يجوز مصدك بس هذا الي صار ...كال اوكفي اوكفي صارتلي ضروف وماكدرت اجيج واوصل كتله خمس سنين ضروف الله يساعد كلبي لعد لو ادري بيك تشتغل هنا لجان جيتك من زمان بس الظاهر انه حبيتك فد انت لا ...كال شبيج اسمعي مني شصار ...صاحوني جوة كتله ماكدر احجي بعد غير مرة احاجيك محمد ..كلي انتظرج حته اسمعيني كتله ان شاءالله مع السلامه سديته وطبيت صابين غدة ...كالو شبي محمود طولتي كتلهم ماكو شي باجر جايني .......وللحكايه بقيه
