#دعاء_مستجاب_
ل: #روز_الفياض_
ج٤
هو يحجي واني صافنه والدمعه بطرف عيني اخر شي كتله:
عادل لتشيل هم الفلوس اني وانت واحد واكيد بابا مراح يقصر ويانه وراح يساعدنه حتى نكدر نوكف على رجلينه ونبني مستقبلنه بدون خوف وقلق ..
عادل: لا والله؟ ترديني اخذ منج ومن اهلج فلوس؟ ليش شبيه شناقصني ايد رجل لو مو رجال ؟
افراح: لا حبيبي حشاك ليش هيجي تحجي بس شكو بيها اذا تساعدنه مو المفروض اني وانت واحد؟ يعني اني لو احتاج منو راح يساعدني غيرك المن راح الج اذا مو الك ؟
عادل: انتي مسؤولة مني طبيعي تلجأين الي ومن تحتاجين شي اني ملزم اوفره هذا واجبي انتي مسؤوليتي وان شاءالله مراح اقصر بشي ..
افراح: متأكده من هالشي ...
عادل: هسه؟ تردين بعد لفة فلافل 😉؟
افراح: هههههههه لاكافي ..
رجعت للبيت واني حاسه بتأنيب الضمير حسيته ضاج وزعل من حجيي بالرغم من انه قصدي المساعده ومااريده يشيل هم المادة لان اني اخر همي الفلوس ... وقابله ابقى وياه بكل حالاته ..
بعد يومين سافر عادل للعراق ...
طول الوقت جنه سوا عالواتساب ..
يدزلي مسجات وادزله مسجات ..
كل شويه اوصيه يدير باله على نفسه وميطلع برا لان العراق وضعه مو تمام ..
جان يرد علي بضحكه ويكلي من اشوفج هيج تخافين علي اتمنى يصير بيه شي حتى اشوف شتسوين وشكد تحبيني ..
من كل عقلي جنت ابجي من اقرا هالكلام اللي يكتبه الي واني اتخيل شلون لو صار بي شي ..
من اتخيل حياتي بدونه ...
اسوء اللحظات مرت عليه واني اتخيله يموت بانفجار لو ينخطف ...
ماجنت انام بالليل من التفكير واحسب يوم يوم ..
مر شهر واني ميته من الرعب طول هوايه واني منتظره على اعصابي ..
كعدت من النوم حسيت شي دينزل من خشمي خليت ايدي شفت دم اتفاجأت ..
رحت غسلت وخليت كلينكس ورحت لامي واني رافعه راسي كالت:
شبيج؟
افراح: دم طلع من خشمي ..
امي: هاي من السهر وقلت النوم والبجي ٢٤ ساعة عبالك رايح للجبهه مو لاهله ..
دروحي كعدي خل اجيبلج ثلج وخلي على خشمج ..
جابت امي الثلج واستمرت تحجي وتدردم علي:
متاكلين اكل بي خير مثل البنات اللي بعمرج .. دشوفي خواتج من رحتي للعراق مشفتيهم شلون يكنسون الماعون كنس ماشاءالله عليهم عافيه وحيل .. عليمن طالعة انتي متفهميني ..
افراح: كافي ماما والله مليت من هالاسطوانه ..
بيومها نزف خشمي دم ٣ مرات ...
اخر مره نزف لدرجه ماحسيت الا تيشيرتي بس بقعة جبيره مال دم راسأ عرفت خشمي نزف ..
ابوي من شافني هيج خاف وعرف هاي ثالث مره خشمي ينزف فكلي:
باجر الصبح تكعدين من وكت حتى نروح للمستشفى ويسوولج تحاليل اريد اعرف شبيج هو انتي عندج دم حتى تنزفين انتي عندج فقر دم ..
بعد العشا جنه اني واخواني نباوع عالتلفزيون ونسولف ودك تليفوني عادل .. جنت مخليه تليفوني عالشحن ..
كمت اخذ تليفوني وبعد ماشفت شي ..
كعدت وشفت امي وابوي واخواني كلهم واكفين على راسي ..
باوعت يمنه يسره ..
افراح: شكو ليش اني هنا..
لكيت نفسي بالمستشفى اتذكرت من رحت اجيب تليفوني اغمى علي ..وبعد ماحسيت الا هسه ..
باوعت عالساعه ب٤ الفجر ..
اففف كل هالوقت ظليت فاقدة الوعي ...
حسيت نفسي تعباانه .. بس مابينت هالشي لان شفت اهلي خايفين وابوي كل شويه تدمع عيونه ..
افراح: شبيكم تره مجرد اغماء قابل جديده لو اول مره كم مره وكعت من جنت بالعراق وكم مره من اجيت هنا .. بعد شبيكم هيج وجوهكم صفرا ..
ابوي: ماكو شي ان شاءالله باباتي لتخافين ... سحبوا منج دم وراح يسوولج تحاليل وينطوج مقويات وعلاج مختلف مادام جسمج ميتجاوب ويه العلاج الحالي ...
افراح: كل اللي عدهم فقر دم يتعبون ويدوخون .. واني هم هالفترة لان ضايجة وقلقة على عادل اكيد اتعب اكثر التوتر هم مو وين ..
امي: اخ منج تفكرين بعادل وتبجين ادري وين رايح هو اصبريله كلها كم يوم ويرجع ..
ابوي: مو على اساس يرجع بنهاية الاسبوع؟ اليوم شنو بالايام ؟
اخوي ليث: اليوم الاثنين .. شيجيب الخميس بس يجي تطيب اعرفها تصير اصحى مني ههههه.
امي: اي عفيه هههه .
نحجي ونضحك بس اني تعبانة واكابر ومااريد اخوفهم واقلقهم ..
اطمئنوا علي وشافوني احجي واضحك مابيه شي .. ارتاحوا شوية ..
راحوا ابوي وليث رجعوا للبيت حتى ينامون شويه ويرتاحون وامي بقت يمي ..
افراح: زين ليش منطلع للبيت وياهم مو ماكو شي؟
امي: غير ننتظر نتيجة التحليل ولازم يجي الدكتور ونشوف شيكول بس هو طلب نسويلج صورة اشعه مقطعيه واحتمال مفراس ..
افراح: ليش شنو فقر دم لو ورم اسم الله شهالحجي ..
