ان بعد العسر يسرا ...
كلما اقرا هاي الاية اكول ربي تأخر علي اليسر وينها رحمتك ..
تمشي سنين العمر واني محلك راوح ..
كل اللي اعرفهم عدهم حياة الا اني كل شي بحياتي متوقف ..
حتى الحياة نفسها احسها متوقفه ..
استمر الوضع بين وبين صهيب كما هو عليه .. لاجديد ..
يحاول يتواصل وياي ويراسلني ويتصل بس مااجاوبه ..
حاول يتواصل وياي عن طريق رشا صديقتي لكن رفضت ...
بقيت مصره على موقفي اما اني واما الشرب ..
ولازم يختار بينه ماعندي خيار ثالث ..
رشا: افراح جاوبيه خطيه الولد يحبج ..
افراح: لا
رشا: حرام عليج
افراح: لا مو حرام
رشا: لج يحبج
افراح: منو يكول؟ وين الدليل؟
رشا: لج كل هالملحه وهالخلك وهالاسئلة وبعدج تسألين؟
ممصدكه يعني؟
افراح: رشا انتي صرتي تعرفين كل شي مو غشيمة والصدك اني صهيب اعرفه من قبل متضيفيني لكروبكم ... اتعرفت علية بغير كروب وجنه اصدقاء لكن فجأة هو كلي احبج واريظ اتقدملج ..
رشا: اي بعد شتردين مادام هيج يحبج وقصده شريف ميريد لعب وتقضية وقت شتردين بعد؟
افراح: رشا اكو شغلات متعرفيها ومااكدر احجيها ..
رشا: اشياء شنو؟
افراح: اكلها مااكدر احجيها تكول شنو؟
رشا: ماكو شي مينحجي يمي مو بكيفج ... تخصج لو تخصه هو؟
افراح: اثنينه ..
رشا: تحبين احد ثاني؟
افراح: لج لا هو اني شكول حب ... اصلا بس هو ..
رشا: اممم .. بس هو شنو؟.
افراح: تأدبي لتظلين دورين مني حجي .. ماكو شي يغير موقفي من صهيب لو اني لو الشرب ..
رشا: والله ماادري .. زين احجي وياه وكوليلة هالحجي ..
افراح: لا .. مااريد احجي وياه ..
رشا: اي ليش؟ تره انتي قاسية ..
افراح: ميخالف ... احسن الي واله ..
رشا: شلون بالله؟
افراح: رشا شبيج تقبلين تتزوجين واحد يشرب؟ يقبلون اهلج؟
رشا: اي بس هو يحبج وانتي هم .. يعني انطيه فرصة اتفاهموا حاولوا تتوصلون لحل ...
افراح: هاي صار كم شهر اني محاجيه وياه ومقاطعته بسبب موضوع الشرب .. بس ماكو فايدة .. متأكدة لهسه يشرب .. هذا ادمان مو بسهولة يبطل منه ويتركه ..
رشا: والحل؟
افراح: ماكو حل ..
وراها بأيام اتصل بيه رقم غريب من العراق استغربت ..
جنت اصلي ملحكت ارد انكطع ..
وره تقريبا نص ساعة رجع نفس الرقم اتصل ..
رقم غريب لكن جاوبت اتوقعت احد من اهلي خفت ..
شصاير وياهم ..؟
افراح: الو؟
جاوبتي صوت مره ..
_الو .. الو ..
افراح: الو نعم؟ اسمعج اتفضلي ؟
_الو الو ... السلام عليكم
افراح: وعليكم السلام ..
جنت احس الصوت مألوف مو اول مره اسمعه ..
_فرح؟
من كلتلي فرح عرفتها ..
افراح: اي نعم اني اتفضلي ؟
_اني خاله ام صهيب ..
حسيت نفسي جمدت مستغربة من اتصالها ياترى شعدها ؟ شنو رايده مني؟
افراح: اهلا وسهلا هلو خالة ..
ظلت تسألني شلونج وشخبارج وشلون صارت صحتج وشخبار علاجج ... واني اجاوبها عادي لكن منتظره تكولي سبب اتصالها ..
جنت متوقعة صهيب طالب منها تتصل بيه وتحجي وياي ويريدها تطلب مني اجاوبه واحجي وياه ..
ام صهيب: خاله حبيبتي اسفة لان اتصلت بيج خاف احرجتج او مشغولة او يمج احد؟
افراح: لاخاله اتفضلي كل احراج ماكو .. اني بغرفتي ومحد يمي ..
ام صهيب: هاا خوش .. ردت احجي وياج شوية بس مااريد صهيب يعرف اني اتصلت بيج اريد هالموضوع يظل بيني وبينج ..
بلحظتها اتوقعت راح تطلب مني ابتعد عن صهيب ..
شكد موقف محرج ..
حقها تره ماكو ام تقبل ابنها يتزوج وحده بيها هذا المرض ..
اذا عمتي مقبلت لابنها ام صهيب تقبل ..
افراح: اكيد خاله طبعا يبقى بينه ميطلع لاحد .. كولي خاله امريني ..
ام صهيب: حبيبتي مايأمر عليج ظالم .. اني ردت احجي وياج بخصوص موضوعكم انتي وصهيب ..
افراح: شبي؟
ام صهيب: اني صهيب مو بس ابني .. اني وهو اصدقاء .. ميضم عني شي .. وهو اكبر اولادي وفتحت عيني وفرحتي .. كلبه كوولش طيب وحنون بشكل .. انتي تعرفيه مو اني اللي اكولج هالحجي ..
افراح: اعرف خاله ..
ام صهيب: اني الفتره الفاتت جنت اشوفه فرحان ومسرور ونشيط والابتسامة متفارك وجهه و( ٢٤ ) يحجي بيج واني بصراحة حبيتج على محبته كل اخوانه وخواته يعرفوج من كدما يسولف بيج ويسألونه عنج ويكلوله سلم عليها ..
افراح: اعرف خالة الله يخليهم الج ..
ام صهيب: بس صار فترة اشوفه ضايج ومهموم وماله خلك ومن اسأله يكول ماكو شي .. بس بعدين من سألته عنج كال انتي زعلانه وياه ... كلت يوم يومين وترجعون تتصالحون بس اشوفكم طولتوا وهو ضايج ومقهور .. ياخالة صهيب مو زغير اللي بعمره متزوجين وعدهم اطفال بس هو لان الشغل اخذه من حياته .. ومن عرفج بدا يتغير للاحسن وفكر بالزواج والاستقرار ..
افراح: صحيح .. اعرف خاله ..
ام صهيب: مصدكت من كلي اريد اخطب واتزوج والله .. بس الصدك غير انصدمت من كلي بيج هذا المرض .. وتعرفين هنا مو مثل الاجانب عدهم كل شي عادي ومقبول يعني العراقيين ميقبلون ولدهم يتزوجون وحده بيها هذا المرض ..
بلعت ريكي غثني الحجي واني اعرف كله صحيح مو جديد بس يبقى يغث ..
ام صهيب: لتزعلين من عندي ياخاله بس اني احجيلج الصحيح هنا الناس هيجي ..
افراح: لا خاله ماازعل اعرف كلامج كله صحيح بدون متكولين ..
ام صهيب: بس اني انسانة مؤمنه واخاف الله ومااريد اظلم ابني ولااظلمج والشفاء من الله الله الشافي المعافي ان شاءالله يشافيج ويعافيج وتطبين وتعيشين حياتج ..
افراح: اشكرج خالة تسلملي ..
ام صهيب: هسه اريد اعرف انتي شنو تردين من عنده بالضبط ليش يعني هيجي زعلانه منه وهو يحبج والله ..
افراح: مااريد منه شي والله واعرف يحبني واني هم احبه برغم ولامرة كتله هالكلمة لان اعرف وضعي ومااريده يتعلق بيه ..
ام صهيب: زين شبيكم هسه ليش هيج متحجين وياه ومقاطعته؟
افراح: خاله ...
انتي مثل امي والله يعلم اني حبيتج من قبل مااحجي وياج من حجي صهيب عنج حبيتج وحبيت حنيتج وطيبة كلبج .. بس اني وصهيب متفقين اني اخر مره حجيت وياه كتله اولا اني مريضه والله يعلم راح اطيب واتشافى لو لا ومااريد اورطك وياي مااقبلها ينشلع كلبه وياي ..
دمعت عيوني وسكتت حست بيه امه سمعتها جرت حسره كتلها:
الله كريم خالة بس هذا الصدك ادري انتي بداخلج نفس تفكيري يمكن حبيتيني لخاطره وتتمنين اطيب علمود بس بداخلج يمكن تتمنين يعوفني وينساني ويروح يتزوج وحده انتي تختاريها اله وحده مابيها مرض صاحيه وقريبة تعرفيها وتعرفين اهلها مو صح ... كل هالحجي اني مقدرته مثلج واعرفه واتمنى والله العظيم من كدما احبه اتمناله كل خير حتى لو ويه غيري اتمنى يتعرف على بنية تناسبه ويتزوجها ويستقر لان اني حتى لو طبت مااكدر اقبل بي وهو يشرب ...
خاله اني مااكولج متدينه حيل لكن الحمدلله من جنت طفلة اصلي وماكطعت صلاتي واصوم وحتى للعمره رايحة الحمدلله وقراءة القران عندي واجب واسعد اوقاتي من اصلي واذكر بي بس صهيب بالعكس ..
تعبني واني انصح واحجي عالصلاة وهو على كولتج مو زغير لكن ميفيد الحجي وياه واخر شي اكتشفته يشرب ويحجي ويه بنات وعنده هواي علاقات ..
غلط خاله هالشي غلط ..
انتي شلون قابله بهالوضع ..
اني كتله اخر شي لو اني لو الشرب والعلاقات ..
والظاهر هو يفضل وضعه اللي هو بي علاقات وشرب ..
سكتت وهي ساكته .. بقينه شويه نجر حسرات واني امسح دموعي ..
ام صهيب: كلامج كله صحيح ياماما واني احبج لان تفكيرج وكلامج كله صحيح حبابه انتي ومؤدبه مثل ميكول صحيح وبت اوادم .. اني هم مثلج مليت من الحجي مو طفل حتى اعاقبه لو اضربه .. رجال طول بعرض اللي بكده متزوجين وعدهم بدل الطفل اثنين وتلاثه .. بس شنسوي لابناء ابليس جماعته بالدوام اللي علموه عالشرب والمسخره ..
جنت اتمناله وحده مثلج متدينه وتحب الصح متقبل بالغلط حتى تساعده ويمكن على ايدها يتغير ويبطل عالسوالف والمكسرات ...
افراح: الله كريم خاله الله يهديه ان شاءالله
ام صهيب: الله يهديه .. بس هم حاجيه خاله انتي وكليله هالحجي بلكي منج يسمع ويتوب لله .. لخاطري حاجيه كوليله هاي اخر فرصة علواه يبطل شرب ويتزوج ويستقر اريد افرح بي وبجهاله ..
افراح: ان شاءالله خاله تدللين ..
سديت التليفون من ام صهيب وكعدت ابجي ليش كلما احب واحد يطلع بي عيب .. صح ماكو واحد مابي عيب ماكو انسان كامل بس حظي غير عادل وطلع مصلحجي ورايدني على طمع وصهيب يحبني حتى بدون ميشوفني ويعرفني اني منو وبت منو لكن عيبه الشرب ..
مو كافي المرض الياكل بجسمي ربي مو كافي اهلي ..؟
بيومها بقيت متردده احجي وياه لو اغلس ..
بس مااكدر اغلس وعدت امه احجي وياه وارد عليه ..
بالليل فكرت افتح الفيس وارد عليه بالكروب ... شكد مشتاقه لحجيي وياه بكل وقت .. اشتاقيت لسوالفه ليش هيج صهيب ليش ماعندك ارادة ..
بعد العشا جنت مقرره اروح احاجي صهيب لكن اتصل اخوي قصي ..
استغربت من زماان مااتصل بيه شعجب اليوم يتصل ..
رديت عليه وسلمت ويظل يسألني شلونكم وشلون خالتي والولد ويعاتبني لان مااتصل بيهم دائما ..
بعدين كلي:
اكلج افراح؟
افراح: هاا؟
قصي: اريد اكولج شي بس مااريدج تخافين ..
افراح: يمه شكو؟
قصي: شبيج مو كتلج مااريدج تخافين ماصاير شي يعني يخوف بسسسس ...
افراح: هاي مصاير شي يخوف وهيج نشفت دمي شبيكم قصي صايرلكم شي امي بيها شي ؟ خوالي بيهم شي؟
قصي: لا لا لا وين راح بالج كل شي مابيها امي ولاخوالي كل شي مابيهم زينين والحمدلله واحنه هم زينين بس لؤي ..
ضجت اتوقعت مسوي مصيبة جديدة لؤي ..
قصي: خوية تره اخوج لؤي صارلة حادث انكلبت بي السيارة وهسه بالمستشفى وحالته خطره ..
انعصر كلبي ..
افراح: يمه اسم الله ... شبي شلون هيجي صار وليش احجي قصي لؤي بي شي الله عليك خاف ميت ومتريد تكولي ...
بجيت وجنت احجي بصوت عالي امي سمعتني واجت تركض تريد تعرف شكو ومنو هذا اللي ميت ..
قصي: لج لا والله عدل الحمدلله بس تعرفين سيارة ومكلوبة بي عالطريق السريع جان يسوق بكل سرعته وفاقد السيطره عالسيارة ومكلوبه بي كم مره .. فجسمه كله مكسر ومرضوض وجروح ورجلة العظم متهشم ولحد هسه ماصحى ولاكعد حتى نعرف شلونه وميخلونه نشوفه ..
ضربت خدي كتله:
من شوكت هالحجي وليش محد منكم اتصل كللنه ليش منعرف؟
قصي: مالحكنه اليوم الصبح خابرونه اهل صديقه جان وياه بالسيارة هم متأذي الولد بس اقل من لؤي مو لهدرجة قوية اصابته يعني واعي ويحجي .. والتهينه نركض منا ومنا بالمستشفى وامي منا مريضه ومحتار بينهم ..
امي اكلت راسي تريد تعرف شكو .
افراح: لحظه صهيب هاي امي تريد تحجي وياك؟
قصي: ياصهيب؟ شبيج دختي ..
انصدمت من كلي ياصهيب شوكت كلت اسمه؟ ماانتهبت واني احجي من كدما فكرت بي ..
خفت وحسيت بالاحراج من امي انطيتها التليفون وكعدت ماادري افكر بصهيب وموضوعه ماادري لؤي وقصته اللي طلعتلي صفح هسه اني ناقصه قهر ياربي ..
اخلص من بلوه اوكع بمصيبه ..
حجت امي ويه قصي وكعدت يمي تلوب وخايفه على لؤي خابرت لاخواني ليث وزيد وكلتلهم يحجزولها حتى تروح تشوفه وتطمئن عليه ...
احتمال اروح وياها ميصير هي تروحله واني اخته ومااروح .. اووف ياربي ..
مسائكم عسل شلونكم ..
طبعا الجزء معلق بسبب النت من البارحة هسه يالله اشتغل الواتباد بسبب النت كطعوه من البارحه بالليل ورجع ضعيف جدا ..
حسبنا الله ونعم الوكيل
المهم
شتكولون شراح يصير ؟ فديت كورمبو اللي عدكم 😁
