#دعاء_مستجاب
#روز_الفياض
بارت ١٢
زعل لؤي مني ينقهر من احجي بالمرض والموت يخاف علي اخوي حبيبي ..
افراح: يالله تعال سويتلك جاي ..
لؤي: مااريد غثيتيني بهالليل ..
افراح: يالله عفيه لازعل شبيك بعد مااحجي يالله تعال ..
بقى كاعد بمكانه مااجه ..
رجعت مديت راسي عليه كتله :
يالله تره اذا برد الجاي مااسوي غيره بعد ...اروح الف راسي وانام واخليك ..
اجه وراي للغرفة كعد يمي يشرب جاي ..
افراح: اي استاذ لؤي .. كول؟
شرب شويه جاي وبعدين كلي:
احنه قررنه مادام انتي هسه موجودة هنا نبيع البيت وكلمن ياخذ حصته ..
باوعلي شافني ساكته رجع كمل كال:
هو قابل شيطلعلنه كلهن جم فلس .. حتى قطعة ارض ميجيبن ..
افراح: الله كريم ..
لؤي: انتو البنات احسن من عدنه احنه الولد لامسؤولات عن عائلة ولا بركبة وحده منكم مسؤولية عيشة ..
افراح: صحيح .
لؤي: قصي بالله عنده قطعة ارض بعد بس يبني من يستلم حصته يبدي يبني ..
واخوج الثاني هو موظف ومرته موظفه .. رواتبهم قوية واهل مرته هسه يساعدوهم ..ابقى بس اني لامره موظفه وبيها خير ولا اني موظف حكومي وعندي راتب شهري ولا شغلي ثابت ..
افراح: الله يعينك والعيشه صعبة ..
لؤي: اي والله ..
افراح: لعد شلون شتسوي؟
لؤي: والله ماادري .. بس اكو ولد صديقي كلي عنده مشروع ومحتاج شريك ..
افراح: مشروع شنو؟
لؤي: نجيب سيارات مستعملة موديلات قديمة شوية من الامارات ونبيعها هنا ونربح عليها ..
افراح: شلون يعني نجيبوهن مو كالوا ميصير تدخل السيارات الا موديل هاي السنة او القبلها ؟
لؤي: لامو هو مضبط وضعه وعنده عرف وواسطة فيكدر يجيب ويدخلهن بدون محد يدري ..
افراح: والله ماادري اني ماافهم بالقوانين هنا ولا افهم بهالسوالف انت اعرف ... انت شنو رأيك؟
لؤي: والله اني عجبتني الفكرة بس راس المال جبير لازم منين اجيب هيجي مبلغ .. يعني اللي راح يطلعي من حصتي بالبيت ميسوي شي واصلا ميفيد يعني منا لازم ادور النه ومنا لازم اضمنلي باب رزق وشغل اعيش بي عائلتي ..
افراح: اي طبعا حقك ..
لؤي: شرايج تشاركيني ؟
ماادري انصدمت ماادري اتعجبت ماادري شحسيت بس ممتوقعه يطلب مني هيج شي ..
ضحكت ..
لؤي: والله شبيج .. رزق وجايج ليش لا؟
افراح: اي بس اني شفهمني بهيج سوالف؟
لؤي: هسه انتي مو عندج معمل مال ملابس تفتهمين بي؟ غير اخوانج همه اللي مستلمين الشغل؟
افراح: اي همه اني مالي علاقة بي .
لؤي: اي انتي الج الصافي .. هذا نفس الشي اني اديرلج المشروع اني اروح واجي واخلص كل الشغل انتي بس عليج تشاركيني براس المال .. واني شريك بالجهد .. شتنطيني اني قابل خير ومدت ايده هههه ..
ظليت ساكته مااعرف شجاوبه احرجني ...
انقهرت عليه مهما كان هو اخوي ومالنه غير بعض لو مهما صار ..
افراح: يصير خير ان شاءالله اشوف وضعي وشكد الولد يكدرون ينطوني والله كريم ..
لؤي: الولد شدخلهم .
افراح: غير فلوسي عدهم؟
لؤي: وليش فلوسج عدهم شنو الداعي؟غير حالج حالهم حصتج مو استلمتيها بعد شنو؟
افراح: لا وين بحال ورث وحصص هسه طز بالفلوس وبالحصص وبالورث مادام بابا راح .. الله يرحمك يابابا ...
كل شي بقى مثل ماهو بعدين اني مايحقلي اورث شي لان مو بنته الحقيقية مو بأسمه ... هو سجلي نص معمل الملابس وانتهى ...
دمعت عيوني الله يرحمك يابابا ياريت كل الناس بحنيتك وطيبة كلبك ..
لؤي: ادري حتى لو فلوسج بقيها عدج شعرفج انتي شكد يطلعلج ارباح وشكد ينطوج شعرفج بالناس .. باجر عكبة وقلبوا عليج وكالوا مو اختنه ومالها شي عدنه ...
افراح: اخواني شلون ينكروني وياكلون حقي حشاهم اشك بروحي ومااشك بيهم .. همه ينطوني مياخذون مني ... كافي مصاريف علاجي ومصرفي وشنو اريد وشنو احتاج كله عليهم ولافد يوم حسبوا علي فلوس ..
