سلامات عليكم يا اهلنا. .... سلامات يا وطن. اسم الله. الف اسم الله. ويحرسك الله بعينه التي لاتنام اللهم اني اودعتك العراق واهله
هذا البارت انشره اليوم لاني. لكماته قبل الاحداث. نشره ونشوف اذا رب العباد. فرجها. والنت عندكم صار اقوى. والتفاعل جيد نستمر اما اذا. استمر حال النت فالعذر يمكم الله يفرجها
#صينية_البخت
#الفصل_الخامس
بقلمي Wasan K
حقوق النشر محفوظة
صينية البخت
الفصل الخامس
طعنات
يٌقال ان الزمن كفيل بالنسيان ... اذن لماذا كل شي محفور بذاكرتي. كنقش على الخشب او الحجر
ما اعرف اوصف احساسي. لحد اخر يوم بعمري من اجانه جواد يبجي ويدك على رأسه ويعيط وملابسه كلها دم ... ويصيح " لج يوم راح. محمد. راح. الغالي كتلوه ... " وطلع يركض وطلعنا ورآه. ما نعرف شنو حالتنا
وشلون وصلنا لبيت بيبي رغم المسافه. مو قليله. الطريق كله اسمع امي تعيط. ودقيقة توكف. تملخ بوجه
" يمه حماده. يا ابو طول. الحلو. ..يمه عزززه ... أمك شلون بيها ...الله يعينج نجمه ... لج راح وليدج "
واحنه نبجي بصوت عالي وياها
وصلنا لباب بيت بيبي المشهد. لايصدق ولا يوصف. العالم ما اعرف منين اجتي زلم ونسوان وشباب مليان الفرع قبل لا ندخل الباب شفنا التابوت طلع من الباب وبابا وعمي فلاح وجواد وخالي ماهر شايليه
عمي قاسم حيله مهدود وظهره مكسور اثنين سانديه ميزت بينهم خالي حذيفه ابو مصعب
اما مصعب وما ادارك ما حال مصعب. مثل المراه الفاقده ابنها يتمرّغل. بالتراب ومن صعدوه على السياره تمدد طول بطول وياه ... وهو يصيح
" لك ليش هيج محمد ... مو وعدتني ما نتفارك ... ادري بيك زعلان مني لان تركتك يومين رحت لخوالي ... عساها روحة الكشره عاد لو اني وياك. كان كتلونه سوه. .... يا يابه ... راح خوي يا يابه .."
سحبوه سحب. من السيارة اللي انطلقت بجثة المغدور وياه ابوي. وخالي. ماهر. اللي هو زوج. عمتي المرحومة الهام ....
كاعده جوه رجلين بيبي اللي بس عيونها تصب ما بطلت
وروحها تلوب شلون اللي كاعده على الجمر ......
ساعه تسكت ...ساعه تنوح وتنعي بكلام. تخلي الحجر يبجي
وعمه نجمه حال الضيم حالها ... ملخه نفسها تملخ. وكل ساعه يغمى عليها.
من سمعنا اجوي الدفانه اللي هم ابوي وخالي بيبي بدات بحاله صراخ هستيريه
ودك ولطم كانما. كانت تكذب نفسها. وبقراره روحها تريد تصدك ان ممكن محمد يدخل عليها
لكن من سمعت. رجعوا الدفانه تيقنت ان اللي تلمه الارض ما منه رجعه .....
ما اعرف شلون مرت يومين واليوم الثالث. لا نعرف. ليل من نهار. طعم كل شي بالحياة صار مر ومخلوط. بالدموع ..... عيني. على الكل بس خوفي على بيبي وعلى جواد. اللي. ما شفناه من اول يوم كاعد بفاتحه الرجال بالجامع مرتين نازف خشمه وناقليه للمستشفى مرتفع ضغطه
