حلمي راجل والسلام

الجزء2

اهلا بخدوج،ڭالو ليا الصباح جا شي حد كيتشكا ؟ اش درتي معاه؟ تلاحيت فوق الكرسي حيدت صباطي : اي ضروني ركابي من صباح وأنا تانياهم،،،وعنقي تاهو ،اه دغيا سقتي لخبار شكون قالها ليك ! دفع كاس القهوة قدامي: ههه واحد الطوِيًر لي قالها لي وبدا كيضحك! هزيت كاس القهوة كنشرب : هاد الطويّر صلع من القدام وقصور وسميتو رشيد؟ هز راسو وقالي : هه كون ماكانش رشيد مزوج كون خطبتك ليه،خصارة كنتو غتفاهمو هه بقيت كنخنزر فيه : ماحشمتيش رشيد تفو ،،لمهم راه لكليان غير وقع ليه واحد الخطأ بسيط ياك؟بسيط؟معمرني سمعت معندك هاد الجملة ديما كتجي تحيحي كل نهار واخة نيت يكون خطا بسيط احيانة عليك الواليدة! ڭرڭرت القهوة: هاداك البرهوش قلت ليك ماتقولش ليا لواليدة رانا كبر منك بثلاتة سنين !والله حتى نوصلها لختك بشرى ڭلس كيضحاك : هه واكنضحكو،،يالاه نوضي لخدمتك ف 12 نتلاقاو لتحت مشيت نكمل لخدمة..ف12 نزلت لتحت وخجت على برا حدا بلاصة الطوموبيلات كنمشي فرجليا..كنسمع : اختي عافاك واحد الدقيقة! كندور كنلقا عز الدين،،آآاوه :السلام لاباس؟ جاوبني : عليكم السلام،،لاباس الحمد لله،ونتي؟ قلت ليه وأنا ماقدراش نشوف فيه : الحمد لله،،،بقيت ساكتة ماعرفت مانقول،وحتى هو قالي: شوفي ايلا ماكانش عندك مشكل وماعندكش التزامات بغيت نعرض عليك تغداي..كاعتذار.. درت فيه واحد الشوفة ديال المصدومات هو براسو تصدم : اه لا ماتفهمينيش غلط غير بغيت نعتذر ليك ونعوض الاذى لي سببت ليك فالصباح ! حدرت راسي وأنا نتفكر راسي غنتغدى مع عدنان اوف !هزيت راسي بغيت نجاوب وهو يبان لي عدنان خارج تالف كيقلب عليا، بنت ليه وبدا كيضحك،جبد تيليفونو وبدا كيكتب ! جبدت تيليفوني كنتسنا فلمساج ديالو..قريتو " ايوا شدي فيه بايديك وبرجليك هانا مشيت هه ايلا مصدقش تلقايني فين مالفين كنتغداو " داز من حدايا وهو كيضحاك..هاد البرهوش،،،اه ويلي عز الدين هزيت راسي نشوف فيه لقيتو كيطل تاهو على المساج ،،خرجت فيه عينيا ،بدا كيضحك: هه سمحيلي،،شرفيني بسميتك ؟ حدرت راسي وحشمت تقول ڭاليا ايمتا نجي نخطب : سميتي خديجة بتاسم بهيبة : اسمك زوين متشرفين...! مشينا نتغداو كنت فرحانة حسيت بيه اكثر من مجرد اعتذار..حسيت بمشاعر دافئة بقينا كنهدرو وكنتعاودو ودغيا ولفنا بعضياتنا..وعجبني لحال!! دغيا دازت ساعتين ودغيا وصلات 2 وكان خاصني نرجع باش نمشي مع الشاف لوزين! وصلني حتال باب الشركة...وتافقنا نعاودو نتشاوفو! كيف مشا نقز عليا عدنان : اه ياميمتي الله يا ربي الله نتا مالك كتخلع فيا دفعني : زيدي قدامي خرجو رجليك لشواري ..بغيت الرابور ديال هاد خونا حطيت ليه كلشي وهو فينما نقوليه شي حاجة يبدا يعيب عليها وصلنا لوزين وحنا كندورو على الخدامة،، وعدنان خدام كيضحك مع هادي ويغمز فهادي :شفتك مامساليش خدام هادشي لاش جاي دور على الخدامة ولا دور بالدريات راه غنفضحك سد ليا فمي :وتي سكتي راه هوما محتاجين يشوفوني كنعطيهم الامال باش يخدمو خنزرت : ونهار يعرفوك خاطب غيفقدو الامل،،والله مكتحشم راه الخلصة هي الامل ديالهم ضربني على راسي : سكتينا وزيدي قدامي،هزي ليا لوراق ولحقي عليا هانا كنتسناك فالطوموبيل تفو ماتخلينا ڭاع نتمنضرو الله يعطيك السم تي منين جيتي منين بقا غادي وكينڭر وأنا خدامة كنضحك