حلمي راجل والسلام

الجزء5

الوقت لي كيدوز،،ولعمر لي غادي وكيجري،،،ولحياة لي كنتظر،،مع كل صباح الفرج،،كنت وصلت لدرجة يأس،،ولكن حزني ويأسي من لهدرة لي سمعت كانت قاسية..حتى قلت غنتزوج وغنفرح براسي ..حتى كنت خنخلع رداء العنوسة ونلبس رداء عروسة،،،وحتى قلت لقيت شخص نعتمد عليه ،،وخدلاتني الدنيا عاودت رجعت بايرة! بكيت وشحال مابكيت مقدرتش نستحمل...وحتى حد ماقدرت ولا رضيت نحكي ليه على زهري!الا عدنان تاصلت وبلا منفكر... ألو خدوج فخبارك قبيلة كنت باغي نتاصل هه وخفتك تڭولي ثاني كتفايل ماكتفايل.... ألو؟ ماقدرت حتى نجاوب،،،صوت بكايا تسمع وحس بيا! قالي : واش كتبكي؟ قاليك شي حاجة لحمار؟ شوفي هاني جاي! جاوبتو بصوت ضعيف : لا متجيش،، لعشا منقدرش نخرج،،،عاودت ليه،،شبع فيه معيار !وخلاني حتى أنا نبدا نعاير ونسب فيه! غد ليه خرجت وحدرت راسي،،ماتسنيتش نشوف واش ادم غيدوز من الطريق ولا لا،،،وفعلا مابانش ليه الاثر! دخلت لمكتب عند عدنان،كيف شافني تفرڭع بالضحك! لحت صاكي فوق لبيرو وكنحنزر صابحة كاعية! قالي : عينيك منفوخين هه ماناعساش،،،شوفي اراي لي نمرة ديال خونا داك لمصلحة ايلا ماشبعت فيه معيار .. درت ايدي على راسي : لا ماكاين لاش انا نسيتو..وبقيت عاقدة حجباني وطالع لي الدم! سكت وبقا كيلعب بالستيلو بايديه: وكل مرة يحاول يهدر ولا يجبد شي حاجة ضحكني ولكن انا كنت مقلقة ومكتئبة! طلًعت ليه الدم : او مالك غارقين ليك البابر،نودي تڭعدي قابلي خدمتك،،انا لي ڭالس باغي نضحك فيك والضحك فيا ماكاينش معامن ماكاينش! درت ضحكة ديال بزز : هانا نايضة! كنت خارجة ووقفني : تبغي تغداي عندنا فالدار،،ليوم غتجي ختي بشرى ووليداتها ،،تمشي تغداي معانا؟ بلامبالاة و صوت مافيهش لحماس لمعهود ديالي : معرفتش ماحملا نشوف حتى واحد بغيت نبقى بوحدي حل ليا لباب ودفعني : صافي ف 12 نجي طرڭك ونمشيو نتغداو،،متبقايش تماوتي راني عايق بيك ماباغاش تخدمي! سد لباب ورجعت لخدمة،،كنسها غير بوحدي،،ماعرفتش شنو وقع ليا،،انا كنت قوية كنت قاصحة،،ايمكن من كثرة التنازلات وخيبات الامل مات فيا الامل..!بقيت ڭالسة داك الصباح كامل وانا كنفكر.. جبدت ورقة وستيلو كتبت فيها ڭاع لحوايج زوينين فيا،،هه لقيت راسي ملاك وحاولت نكتب لحوايج لخيبين فيا،،،كتاشفت انني فقط كنبغي نهرب من هدرة الناس،،انا امراة خدامة،،ماكنحتاج لحتى اعالة ولا صدقة،،انا عندي مستوى ،،كنحاول نصلح ذاتي،،،والغريب فالامر فهمت ان هادوك لي ماصدقش معاهم الزواج ماكيستحقونيش،،وهدرة ديال عدنان ومعاملتو ليا كانت كتحسن من مزاجي... مشيت تغديت مع عائلة عدنان وتلاقيت مع بشرى،،فاش عاودت ليها : عرفت بانني ايلا متزوجتش ماشي هيا نهاية لعالم ولي بغا يقول شي حاجة يقولها،انا دايرة تيقتي فالله ولي ليها ليها! نسيت كلشي وضحكت من جديد! دغيا داز لوقت فجمعة لحباب وكان خاصنا نرجعو تاني للخدمة قالي عدنان : شفتك ولفتيها ابنتي نوضي تڭعدي صباح ماخدمتي ماوالو واقيلة..ليوم عندك شلا سلمت وماسخيت هزيت صاكي وخرجت لطوموبيل،،ركبنا وزدنا شاف فيا عدنان : اهيا ناري ماديراش السمطة مغية تخرجي عليا،واتي ديري السمطة " حزام السلامة" جريتو ومابغاش يتجر: درت عندو مابغاش،،! وقف الطوموبيل وقالي : هو معكس خصني نديه يتعالج،،بلاتي انا لي كنعرف ليه،واخة سمحي لي نشوف ! قرب مني،،حسيت بانفاسو ودقات قلبو وحتى بالدفئ...استححييت نطيل النظر فملاميحو وهو مضارب مع السمطة،،لاحظ ارتباكي وحدر عينيه شاف ف ايدي وأنا مزيرة على الصاك ديالي ! طلق ايديه من الحزام ديال السلامة ورجع لبلاصتو،، و قالي..
قربو ليا ودقات قلبو لي تقريبا كنت كنحس بيهم،،خلاتني نحس بالاحراج...تعنكشت ومابقيتش كنشعر بالراحة لي كنت كنحس بيها قبل،،كان عادي بالنسبة ليا،،،بحال خويا الصغير! شافني تسمرت فبلاصتي وكنرجع براسي اللور وواخى ماكاين فين ،،وكنحاول نبعد وندير بيناتنا مساحة،،حدر عينيه ولقاني مكنززة ومزيرة ايدي على الصاك ،جمع ايديه ورجع لبلاصتو: سمحي لي هاد السمطة ماعرفت مالها،خاصني ندور باش نقادها! ماجوبتش،،بقيت ساكتة وقلبي كيرجف،،نزل وجا من جيهتي حل لباب،بغيت نزل قالي غير خليك! حاولت نبعد عيني عليه،،نشوف قدامي ولا ندير اي حاجة...بقيت كنشوف فالتيليفون ونحاول نقنع راسي بان الموقف كان عادي! قاد لي لحزام ورجعنا للخدمة! فينما كنبدا نخدم كيرجع لي داك الموقف قدام عينيا...هعع كنرجع نقول هو صغر مني اش كنخربق...! ولكن والو قلبي مابغاش يوقف بدقاتو الغريبة! كل ساعة كنجبد التيليفون نشوف فالوقت...وڭالسة غير بزز،،نمشي عندو؟ لا لا بلاش!! وليت كنقلب على اي سَبّة! ناري ايمتا غتوصل 4 باش ندير بّوزْ كافي (استراحة) طلع ليا الدم..هآ 4 لحت لوراق مشيت جبت القهوة ودخلت عندو : حطيت ليه لقهوة ديالو قدامو! شاف فيا : اه شكرا كنت بغيت نخرج نجيبها هه وهو خدام ،،ايوا ؟ بديت كندور فعينيا ايوا؟ شنو ايوا!!ماعرفت باش نجاوب،،قبل كان كيقولي ايوا : كنت نتجبد ونقوليه ايوايوا ونبدا نصفق بحال صحاب الطقيطقات ! ودابا وليت كنرد لبال ...وانا كنهدر مع راسي وحلات ليه بدا كيكحب! طرت من بلاصتي جبت كاس ديال لما وأنا خايفة عليه : هاك عدنان شرب وبديت كنضرب ليه على ظهرو...حتى هز راسو عندي وبدا كيدير في شوفات مستغربة! قالي : هه شنو قصة هاد الاهتمام،آخر مرة وحلات ليا حتى كنت غنموت، درتي رجل على رجل وقلتي ليا : تستاهل جمعت ايدي عندي..ورجعت لبلاصتي وانا كنحاول نتهرب : اه لا أنا قلت هادشي؟ ايمتا ماعقلتش،،واكنا كنضحكو او،،! عاق بيا وبدا كيشوف فيا شي شوفات..: واخة بديت كنحلف : والله واراك صغر مني واش نتا حمق ! بدا كيضحك : ومالك تزنّڭتي؟ راه عارف راسي بوڭوص ! نضت : انا غاديا فحالي نتا راك خاصك لعصا خرجت من البيرو بالزربة،وكندب فوجهي : هاويلي على شوهتي ،،الدري صغر مني وانا دايرة عيني فيه،،واقيلا غير كيجيب ليا الله! خرجت من الخدمة انا الولة سالتة كيلعادة،،مشيت للدار،،وأنا كنطيب وأنا كنعجن وكنوجد للعشا ماقدرتش نوقف عن التفكير فعدنان..وحتى من نڭير الواليدة ولا عاجبني داك النهار،،ودايرة التيليفون فجيبي كنحلم مع راسي..منعرف يتاصل بيا! دازت ديك الليلة وأنا كنفكر..واخة فخطوباتي الفاشلة و حتى لي كانو ناويين ايخطبوني عمر قلبي ضرب لشي واحد منهم بهاد الطريقة. جا لغد ليه بزز،،كنقلب وسط حوايجي،،هادي كتبيني كبيرة،لا هادي كنبان فيها كبر من سني،،ناري اش هاد لكسوة كيفاش درت حتى شريتها ،،واش هاد لوان عندي...أنا مالي صڭعة فكولشي! لبست كيلعادة درت فولاري وخرجت تحت تهديدات الواليدة كالأتي : واتي خرجي، واتي سيري باراكة عليك من المراية،،ماخفتيش تعطلي...راه غنجي ليك!!حتى وليت كنشك انها باغياني نخرج دغيا وهي فيها الزهايمر ! خرجت دغيا،،وصلت لخدمة،،دخلت عند عدنان،مقدرتش نمشي لبيرو ديالي ديريكت..ضروري ندوز عندو طليت من الباب : صباح لخير عدنان! لقيتو تاهو يالاه دخل : اه صباح لخير ،دخلي داخلة كنفرنس.. بقا كيشوف فيا : ناشطة؟ماشطة؟ بديت كنضحك : وحشمانة ،،ناشطة ماشطة 5 /5 هانا مشيت ،،اه عدنان ليوم مغنرجعش للدار واش نتغداو؟ شاف فيا : محالش غنتلاقى ليوم معــ.. حدرت راسي : اه صافي الله يسر غادية نعاير راسي : تفو ،،تفو عليا،اش داني نهدر ،،ناري على موقف تحرجت ومانعرف اشنو.. رجعت للخدمة وانا ماحملاش..وصلات 12 خرجت خديت طاكسي ورجعت للدار! تغديت مع الواليدة وانا كنفكر اش يكون عدنان دابا كيدير مع خاطيبتو!! لالا الدري خاطب وصغر مني وليني انا ديال لعصا!!ماعرفتش كيفاش ندير حتى نتحكم فشعوري ولا نقمع المشاعر ديالي.. دازت 6 ايام وانا مضاربة غير مع راسي..حتال واحد المرة مشيت عندو لمكتب دقيت مالقيتوش:دخلت لقيت التيليفون ديالو ولبيسي ولوراق باقيين فوق البيرو،،دخلت وڭلست فبلاصتو! حركت " لاسوري " ديال البيسي،قلت ندخل للانترنيت ونتسارا شوية فالمواقع شوية! بان ليا واحد الضوسي سميتو "ميموريز" (ذكريات)" وقلت ندخل ليه! يتبع