التقط المقنع السكين وقام بتسديدها على أيمن ولكنها أصابت شاهى التى أتت لمساعدته
أيمن:شاهى أنت كويسه
وفى نفس اللحظه سمع الجميع صوت سيارات الشرطه فاستغل المقنع فرصه إنشغال أيمن بما حدث لشاهى وهرب قبل اقتحام عمار وبعض عناصر الشرطه المكان وقام عمار بالقبض على الرجلين المغمى عليهما بسبب صعق شاهى لهما كما حضرت سياره اسعاف ونقلت شاهى إلى المستشفى وكان أيمن معها حتى تم عمل اللازم لاسعافها وعندما خرج الطبيب من غرفتها أسرع إليه أيمن للاطمئنان عليها
أيمن:هى عامله إيه دلوقتى
الطبيب:الحمد لله الاصابه كانت فى ذراعها الشمال ومش خطيره
أيمن:متشكر أوى يا دكتور
الطبيب:العفو دا واجبى بعد اذنك
وما إن غادر الطبيب لمح أيمن عمار علامات الغضب على وجهه
عمار بغضب:دلوقتى تقولى كل حاجه سامع كل حاجه يا أيمن
أيمن:أنا هقولك اللى حصل وقص عليه أيمن كل شى بدايه من اتفاقه مع شاهى حتى إصابتها بالسكين
عمار: ومقولتليش ليه لما الخاطف اتصل بيك من الاول
أيمن: كنت خايف يعمل حاجه فى مروان وبعدين أنا بطريقتى دى أنقذت مروان
عمار بغيظ:يا فرحتى بيك يعنى السكرتيره بتاعتك انضربت بالسكينه والمقنع هرب بعد ما أخذ منك مليون جنيه وممكن يحاول يأذى أى شخص تانى من أسرتك وكل ده مكنشى هيحصل لو عرفتنى أنه اتصل بيك هتفضل دايما متهور
أيمن:خلاص بقى يا عمار المهم أن ابنى كويس *********************************************************
فى منزل أيمن أخبر أيمن جميع أفراد عائلته بما حدث وكانوا سعداء برجوع مروان وظلوا يتحدثون كثيرا حتى حضر معتز
معتز:حمد لله على سلامتك يا مروان أول ما طنط مديحه قالتلى أنك رجعت قلت لازم أجى أشوفك وأجبلك شيكولاته كمان
ماجد:وانا مفيش شيكولاته ليا
معتز:ازاى بقى دا أنت الكبير ودى الشيكولاته بتاعتك
أيمن:طول عمرك صاحب واجب يا معتز
معتز:الله يخليك ده من ذوقك
أيمن:صحيح هو ايه اللى مخليك مشغول اليومين دول أوى كده
معتز:أنا بخطط أعمل مشروع جديد
أيمن:ربنا معاك لو احتجت أى مساعده أنا موجود
معتز:متشكر **********************************************************
كان يشاهد التلفاز عندما رنين هاتفه برقم مجدى والد نيفين
محمد:أهلا يا عمى أخبارك إيه
مجدى:الحمد لله أنا اتصلت بيك عشان أقولك أننا موافقين
محمد :متشكر أوى يا عمى أنا هعدى عليك باليل عشان نتففق على معاد الخطوبه
مجدى:خلاص ماشى *********************************************************
فى قسم الشرطه كان يحقق عمار مع الخاطفين المقبوض عليهما
عمار:مين اللى قالكم تخطفوا مروان
الخاطف الاول:والله يا باشا مانعرفه
عمار بعصبيه:أنت هتستعبط ياض أنت وهو وبعدين معاكم
الخاطف الاخر:هو كان بيتعامل معانا قبل التنفيذ بالتليفون وبعد التنفيذ بقى بيتعامل معانا فى المخزن اللى كنا خاطفين فيه الولد بس كان مغطى وشه دايما ومشوفناش وشه نهائى
عمار:طيب واسمه ايه
الخاطف الاول:أبو رمانه
عمار بغضب:أنت هتستعبط يا روح أمك
الخاطف الاول:والله العظيم يا باشا زى ما يقولك
عمار بغضب:أبو رمانه امممممممممممممم ماشى
ثم نادى على العسكرى
العسكرى:أيوه يا باشا
عمار:خدهم على الحجز
العسكرى: حاضر يا باشا ********************************************************
وفى أحد الكافيهات كانت تجلس أسيل مع خالد
خالد بكذب:وحشتينى أوى يا أسيل
أسيل:أنت أكثر بس أعمل ايه كان عندنا ظروف صعبه الفتره دى بس الحمد لله عدت على خير
خالد:طب وأخبار مروان إيه
أسيل:أنت عرفت ازاى موضوع مروان
خالد:لما تغيبى عنى الايام دى كلها أكيد هحاول أعرف السبب ولو كان ينفع كنت وقفت معاكى فى الظروف دى
أسيل:ربنا يخليك ليا
وظلوا يتحدثوا وكانت هناك عيون شخص تراقبهم وارتسمت على شفتيه ابتسامه خبيثه
#batol
أنت تقرأ
خيانة مدبرة (قيد التعديل)
ChickLitمؤامرات خبيثة من حماه حاقده تدمر منزلها باسم الخيانه ولكن لا يمكن للظلم أن يستمر ودائما يأتى يوم وتنكشف فيه كل الحقائق ملحوظة هامة: (هذه هي أولى أعمالي وبها الكثير من الأخطاء التي أعتذر عنها بشدة فأنا عندما كتبتها كنت مبتدئة وليس لدي خبرة كافية في م...
