وجع قلب ❤

الجزاء م̷ـــِْن 1 الی5

قصة اليوم 💖💖💖💖💖
الاجزاء من 1 الى 5

اسم القصة
وجع القلب
تنويه ..القصه حقيقيه

الجزء الاول ❤❤❤❤

قيل في الاثر نحن مخيرون فيما نعلم مسيرون فيما لانعلم ..او هكذا نظن ..لان مرات ناس وظروف يتدخلون بقدرك يصيرون سبب سعادتك او تعاستك بعد انت وحظك وهذا باختصار الي صار وياي .
تعالوا وياي اعرفكم ع نفسي وعائلتي واحداث من سنوات حياتي ..
اسمي جمانه عمري 22سنه طالبه كليه تربيه انكلش مرحله رابعه ع ابواب تخرج ..
شكلي عادي جمالي متوسط يعني شاايله روحي شي ع شي حلوة بس ماكو شي مميز حنطاويه ع حماار عيوني صغار بنيه بس نظرتهن حاده وكحه رغم ما اني انسانه هادئه وخجوله ومطيعه وشعري نفس اللون سرح بس عندي خصله شگار بمقدمه شعري ع الجهه اليسرة انفي متوسط مناسب لوجهي يمكن شفايفي تجذب لان منفوخه شويه خاصه الشفه الجوانيه خدود وحواجب خفيفه ورغم ما طالبه جامعه ووصلت مرحله متقدمه بس ممنوع مكياج وممنوع حفافه ولاحته تنظيف ممنوع هيج قانون الماما واي نقاش بهالموضوع مرفوض والعذر شبقيتي للزواج لو من تنخطبين متطلع نورانيه بوجهج مادري شنو هالعقليه المهم اهم شي عندي دراستي لازم اوصل واكمل .
ناعمه وقصيرة بس جسمي مرتب لاسمين ولاضعيف .

عندي اخت وحده هي لينا بعدهي صغيرة طالبه ثاني متوسط واخوان 2 ولد الاول ضرغام طالب معهد صحه اخر مرحله بس اصغر مني واخويه الثاني اخر العنكود ليوثي صف خامس ابتدائي .
ابويه وامي عايشين الحمدلله بابا انسان بسيط مسالم يروح ويجي بطريقه ماعليه باحد ميحب المشاكل قليل الكلام متقاعد وكاعد بالبيت وامي معلمه ابتدائيه هم نفس طبع بابا بس حيل تهتم بكلام الناس وشيكولون وشيحجون يعني المظاهر حيل تهمهه وعدهه العيب وكلام الناس تحسبله حساب اكثر من الحرام ومخافه الله رغم ما هي انسانه تصوم وتصلي وملتزمه كولش .
هالسنه اني مرحله اخيرة وع وجه تخرج ..
ماضم عليكم 3سنوات الكليه اني بعلاقه ويه طالب  زميلي وياي بالمرحله مالتي ومتفقين من نوصل مرحله رابعه يجي يخطبني ..
فعلا صرنه مرحله رابعه ورة نص السنه تقدملي ..
واني جنت مطيه امي مقدمات عن علاقتي بالولد وبانه اني رايدته وراغبه للزواج منه وهي بوكتهه سألتني عن "مؤهلاته " مثل ماتسميهه بين قوسين الحاله الماديه لاهل الولد واني زودتهه بكل المعلومات الاعرفهه عنه بس كلامي ماقنعهه ماشافته مناسب اليه حسيتهه معارضه بس من كتلهه امه وخالاته قريبا يجون يخطبوني هي استسلمت للامر الواقع خاصة انو يزن اتصل عليهه ومثل الي قنعهه بحيث شويه صارت ليونه بموقفهه حسيتهه مثل الي اقتنعت بالموضوع .
ومثل ماوعدني يزن وفى بوعده ..
وبيوم جمعه اجتي امه وخالاته شافني جنت بصراحه مرعوبه وزاد عندي الشعور بالخوف من شفت والدته شخصيتهه تخوف ومبينه هي الي مسيطرة ورغم قله خبرتي بالحكم ع البشر من اول لقاء بس حسيتهه رافضه انو ابنهه يخطبني او جايه تخطبني مغصوبه اجباري يعني جانت تتلمسني برگبتي لان جنت شايله شعري ليفوك وتنزل ايدهه ع ظهري وتتحسس بخصري حسيت بقشعريرة سرت بجسمي ومن قدمتلهم الضيافه تباوعلي جانت من فوك ليجوة يمكن هو هذا الطبيعي انو تتفحص عروسه ابنهه بس اني حيل مارتاحيتلهه وتجاهلت احساسي ومشيتهه عادي وفتحن موضوع الخطوبه ويه امي واطونه معلومات عن الولد وعن اهله علمود نسأل عنهم وتبادلن امي وام يزن  الارقام حته يردولهم خبر .
اي حبيبي اسمه يزن ذكرت انو طالب وياي عنده اخ واحد اصغر منه واخوات 2صغار مثل عائلتنه يعني وهم مثلي هو اكبر اخوانه ..امه موظفه وابوه همين
..صادف بوقتهه امتحانات شهريه اخر شهر قبل امتحانات الفاينل  واهلي وعمامي سألوا ع يزن واهله وسمعتهم كولش تمام فاهلي مااطوا موافقه راسآ انتظروني اخلص امتحاناتي النهائيه وبعدين خابروا اهل الولد وخبروهم انو همه قابلين واتفقوا ثاني يوم تجي مشيه الزلم .
وفعلا ثاني يوم اجتي مشيه الزلم وانخطبنه ..
ورة اسبوع تقريبا طلعنه سوة اني ويزن وامي وامه اشترينه الذهب واشياء بسيطه للنيشان وام يزن سلمت امي مبلغ مالي قليل علمود تجهزلي باقي شغلات النيشان من ملابس وبدله وصالون لان ناوين نسوي حفله عقد وطبينه ع امام لبسنه الحلقات طشوا جكليت وهلهلوا  وتغدينه ورجعنه للبيت وهو ووالدته رجعوا للبيت وبقه الذهب يمي ..
ورة يومين عرفت من امي طالعه لبيت جدي اهل بابا عماتي ماخذات ع خاطرهن من امي لان ماخبرتهن انو يجن بمشيه النسوان رغم ما 2من عماتي جانن حاضرات هنه وازواجه بمشيه الزلم من صارت حسبوهه انو ماما ماقدرتهن وعزمتهن ..
ماهتمينه للموضوع ..اتصلت امي بوحده من خالاتي واتفقنه نروح للسوك ونكمل شغلات النيشان .
بوكتهه اشتريت بدلتين وردي وصخ الاولى عبارة عن قطعتين منفصلات وطويله وكصه حوريه من جوة والثانيه ماروني قصيرة موديلهه فيكه حزام ع الرگبه بي شغل والصدر منفصل واحد عن اللاخ ومن الخصر ليجوة القماش ستن كبس كووولش فيكه وحلوة باللبس وكوستم كامل  4قطع وسيت نوم ابيض وبعد هواي
شغلات ماتذكرهه بس طبعا مثل ماتوقعنه فلوسهم ماكفت وماما كملت الباقي من عدهه وطبعا طول الوكت اسمع منهه كلام يغثني تريد تطير فرحتي بخطوبتي ونجحت ..
بحيث صادفت بوكتهه وقت استلام نتائج اخويه ضرغام توسلت بي ياخذني وياه للمعهد وفعلا قبل ورحت فرحانه  بس ردت اشرد من البيت ومن كلام ماما.
اول مارجعت للبيت لكيت ام يزن مخابره ع امي ومتفقات بعد يومين عقد السيد واليوم خميس وامي مخبوصه بالتحضيرات وضيعت علينه فرحة اخويه بالتخرج من المعهد وجنت بيومهه قافله جهازي صح صار مسموحلي اتصل ع خطيبي ويتصل بيه بس كلام ماما خلاني ابتعد عن الولد ردت بس اشرد من واقعي احس روحي تورطت ..
ثاني يوم الجمعه هم اتصلت ام يزن علمود المقدم والمؤخر واهلي طلبوا رقم جان هو الدارج بذيج الفترة بس اهل يزن ماقبلوا وكأنه حاسبين حساب ننفصل فميريدون يحطون رقم جبير ويتورطون وامي حست بناواياهم بس اصرت ع الرقم الي رادته وبابا وكف وياهه وبذيج العصريه اتصلت ام يزن كالت احنه جاييكم مافتهمنه شنو الموضوع بس كنالهم هلابيكم ساعه واجوي هي وابو يزن ويزن استقبلناهم وضيفناهم ..
بدوا يتناقشون بالمقدم والمؤخر واني ويزن صافنين حسيت روحي سلعه وديبيعوني ماحبيت هالاحساس ابد ويزن رغم ما جان كاعد يمي بس غير السلام ماحجه وياي ولا كلمه وجان مبين عليه ضايج حته نظرات ماتبادلنه ..
فجأة عمي ابو يزن وجه الي سؤال من بعد ما ايسوا من مناقشه اهلي بالموضوع ومحاوله تغيير رايهم گالي انتي شنو رايج عمو ؟
صفنت بوجهه بعدين جاوبته ..كتله ..
بكيف اهلي عمو
وسكتت ..
جانت ام يزن حيل ضايجه والحجي كوله الهه هنا رغم خبرتي البسيطه بالبشر عرفت زلم هاي العائله بيد مرة عرفت روحي تورطت وهنا هم تجاهلت احساسي ..
ضيفناهم وع مضض اتفقوا ع المقدم والمؤخر الي طلبوه اهلي وباجر عقد السيد وطلعوا ..
لليل انتظرت اتصال من يزن ماتصل كلت ميخالف واني بادرت واتصلت بي حسيته بعده ضايج شكد حاولت اضحكه واغازله علمود يفك لان المفروض رغم كولشي نفرح لان باجر واحد راح يصير حلال الثاني مو هذا حلمنه ..مو هذا الي نتمناه سوة صارلنه 3سنوات ؟؟
بسرعه تحجج ديصيحوه وراح واني سديته منه وظليت ابجي ..
اتذكر من جنت اتختل جوة بطانيتي واتصل بي خاف اخويه الجبير يسمعني لان غرفته بصف غرفتنه ..
يعني معقوله من جان حبنه بالحرام جنه سعداء وواحد يتمنه الثاني ومن صار كولشي بالعلن وحلال انتهى هذا الحب ؟؟
تعبني التفكير وتعبني البجي ونفسيتي تعبت فد مرة .
ثاني يوم كعدنه من الصبح ع السريع كملنه تنظيف واخذتني ماما للصالون طبيت طفله طلعت منه مرة اول مرة بحياتي احف وجهي وحيل اختلف شكلي من كملت ام الصالون باوعت لوجهي بالمرايه دققت وتلمست وجهي ملامحي معقوله هاي اني ..طالعه حلوة جنت ماعرفت نفسي ..ابتسمت برضى ..
رغم ماجنت مرتبه بالجامعه وحلوة ولبسي انيق بس يبقه احساس من اشوف لبس البنات الضيق والفاضح والمكياج يخليني احس بشي ينتقص من ثقتي بنفسي عبالك صراع نفسي بداخلي جزء يريد يسوي مثلهم من باب الغيرة واني شنو فرقي عنهن وجزء ممقتنع بالي يسونه لان لااهلي هيج ربوني ولا يقبلون هيج البس جنت حته البنطرون ممنوع البسه ماابالغ بس وره العقد ياله لبست اول بنطرون بحياتي عدا البناطير الي جنت البسهه بدرس الرياضه .