وجع قلب ❤

الجزء م̷ـــِْن 6 الی 10

قصة اليوم 💖💖💖💖💖
الاجزاء من 6 الى 10

اسم القصة
وجع القلب

الجزء السادس❤❤❤❤

بشارعنه جيرانه بنيه جانت طالبه وياي بالابتدائيه والمتوسطه اسمهه سميه ..سميه هاي آيه من الجمال ورده وتوهه فتحت مخطوبه لابن خالتهه صبحنه اليوم الصبح ع صوت صايح من بيتهم وهمه الاسلام هادئين وميطلعلهم حس طول عمرنه نعرفهم ونعرف اخلاقهم ابوهم متوفي وهمه بنات 2و3ولد وامهم مرة جبيرة ..
كلنه فزينه من صوت الصياح وتعالت اصوات ثانيه اصوات زلم ونسوان وبعدين ثارت طلقه وتبعتهه طلقه ثانيه هدأ المكان ثواني بعدين صار صايح اليبووو اعلا من قبل ..
اهلي طلعوا يشوفون شكو شبيهم الناس واني وياهم وظلينه اني وامي وجوري واكفين بالباب وابويه واخواني فزعولهم ..
شفت رجال جبير راجع من يم بيت ام سميه ويصفك بايده ويكول لاحول ولا قوة الا بالله ..
ماعرف ليش كلبي نغزني رجع اخويه سالته شكو شصاير كالي ..
غسلوا عارهم ..
شهكت فتحت عيوني واخرسيت خليت ايدي ع حلكي دماغي ماستوعب بس البنيه جانت مخطوبه وزواجهه قريب بس خطيبهه استشهد بسيارة مفخخه جانت صافه يم مطعم هو جان يشتغل بي قبل زواجهم باسبوع .
لسه القصه مكامله اكو شي مدا افتهمه شلون يعني غسلوا عارهم ؟؟لاكيهه ويه واحد ؟؟
طبيت للبيت ..سمعت بابا يسولف لماما ..علساس خطيبهه ماخذهه قبل عرسهم وهسه لكوا البنيه حامل واعترفتلهم انو مغلطانه ويه احد بس زوجهه ماخذهه قبل عرسهم وزوجهه استشهد ..كلامهه ضد كلامهم وحكموا عليهه ظلم بغسل العار لان ماصدكوهه .
ماتحملت الكلمات وهي تنساب لاذاني واسمعهه ركضت لغرفتي متت من البجي ..يعني اني هاي تاليتي ..طلقه براسي اهلي يغسلون عاري وانتهر الموضوع مثل ما صار بسميه شغلتهه دقيقتين ماطولت ..
اكتشفت الله رغم كل الي صار رحمني وماخله بداخلي طفل من يزن ..يمكن حالتي اهون لان سميه حملهه فضحهه ..
بيومهه تمرضت ..مرضي جان نفسي مو جسدي صخونه وخووف خوووف تملكني جسمي جان ينفض نفض من الصخونه ..انرعب واصير ارجف من اتذكر سميه والي صار بيهه واني ابد ماكدرت انساهه ..
ظليت ملازمه فراشي يوم ويومين واسبوع ..اصحى واغيب عن الوعي عشت ع الشوربه والمغذيات ماحسيت بالدنيا داير مدايري اهلي حاروا شسووا الي ماخلو طبيب ولا اختصاصي حته ساده ودوني خاف سوالف سحر واعمال شيطانيه اخير شي طبيب رجال جبير ظل يفحص بجسمي من كل مكان يلزمه يكولي هذا يوجعج اكوله اي ..جسمي كوله يوجعني اخير شي كالي كومي بابا انتي اصحى مني ومن والدج مرضج نفسي مو عضوي ..
نصحني اطلع واغير جو نصح بابا يلكالي وظيفه اغير جو واشوف ناس واختلط واقرة قران كلما احس نفسي مضايقه ..
اشوف التعب والانكسار بعيون ابويه مكسور علمودي تعبان مني حاير بيه دموعي تصب بذنب اني اعرف شبيه وشنو علتي بس ماعندي جرأة احجي لاحد اخااف بس والله مازنيت ولا سويت الحرام هو جان زوجي وحلالي ..
داروني اهلي ودللوني وصرت اتظاهر باني صرت احسن واسمع امي تكول لابويه اذا اجه احد خطبني خلي يطيني جانت تحثه يضغط عليه لايخليني ع راحتي لان عبالهه الزواج هو الحل هو الي راح ينسيني يزن عبالهه اني لان جنت احب يزن لهالدرجه تاثرت باستشهاده ومو راضيه اتقبل واقعي المابي يزن ..
كل هالاحداث ومرت 6اشهر ثانيه وكملت سنه بعد استشهاد يزن ..
بالفترة خطبنه لاخويه ضرغام بنيه موظفه وياه بالدوام اسمهه شيرين والظاهر بيناتهم علاقه حب لان هو استقتل علمودهه ..
خطبناهه وشويه دخل الفرح لبيتنه وسوينالهم حفله مهر وعقدوا عقد سيد .
صحتي تحسنت شويه جبرت نفسي اطلع وابتسم واسولف لان اهلي حيل تعبوا مني خاصه بابا مجان يسولف بس جان يحرك بروحه ويذبل بدون ميحجي شي وجان يتخربط علينه بين فترة وفترة ..
فد يوم جانت خطيبه اخويه معزومه عدنه ع الغدة هي واهلهه ..
بس مو نفس المدرسه ..
ضرغام سوة احتكار لشيرين ههههههه مجرد سلمنه عليهه ماكدرنه نحجي وياهه لان هي وضرغام بس يتبسبسون واني صادقت مها زوجة امجد اخو شيرين وامجد وسجاد ظلوا كاعدين ويه بابا ودك سوالف ومافصلنه الزلم عن النسوان ردنه كل افراد العائلتين يتعارفون ..
وام سجاد طبعا دك سوالف ويه ماما بس ام سجاد مبينه مرة حوك ووكحه وهي حقهه تصير هيج لان زوجهه عافهه صغيرة وعدهه 5اطفال وربتهم وعيشتهم وكبرتهم .
مها خطيه سولفتلي قصتهه صارلهه سنتين مزوجه وام سجاد مشوفتهه نجوم الظهر علمود الاطفال لان سنتين ماصار عدهم طفل وماخلت طبيبه ماراجعتهه وكولهه تكول مابيهه شي وزوجهه هم بس المانع من رب العالمين ..
جهزنه الغدة وكعدنه نتغده كولنه سوة وصارت كعدتي كبال سجاد جنت كلما ارفع نظري اشوفه يباوعلي ومن انتبهله يوخر عيونه عني ..ماخلصت اكل الا لمن طلعت روحي لاكدرت اتغده ولاكدرت اكوم لان عيب منهم اخير شي بحجه اسوي جاي كمت للمطبخ ..
وصرت كلما اغمض عيوني يجيني طيف عيونه يصير كدامي ..طبعا لون عيونه مثل لون عيون اخته شيرين زيتوني اني ابد بحياتي مشايفه هيج لون ..همه اهل شيرين ماشاء الله عليهم راعين عيون ملونه بس هذوله الاثنين عيونهم هيج لون زيتوني ..
جهزت الجاي والمواعين مالته ولمينه الاكل وظلينه اني ولينا نغسل المواعين ونرتب المطبخ واخويه ضرغام اخذ الشاي وقدمه ..
لان العائلتين كاعدين سوة بالاستقبال طول الوكت احس نفسي مراقبه ..اي احسه يراقبني واني ابد ماصديت عليه ولا تواصلت ويه نظرات عيونه بس ظليت اراقب كلامه واسلوبه بالكلام من يفتحون موضوع ويه بابا واعي وفاهم ومبين متدين كولش .
جانت نظرات عيونه تجذبني واقاوم هالانجذاب لان اني مو بوضع يسمحلي تصير عندي خيارات متاحه للزواج او الحب حتى لان وعدت نفسي استر ع روحي ومافكر بالزواج ابد اعرف هذا مو حل بس ماعندي غيره حاليا .
شكد ردت اعرف معلومات عنه الفضول قاتل ومها جانت من النوع الي بسرعه ينسحب لسانهه وتحجي الاكو والماكو بس اني امتنعت واستحيت شتكول عليه حطيت عيني ع الولد لا ابد والله مو هاي غايتي بس فضول .
خلص اليوم ع خير وراحت شيرين واهلهه وماكو كلام عن زواج قريب لان الاوضاع متسمح بكل البيت دخل الموت وكل بيت صار بي شهيد وثنين وتلاثه بسبب داعش ومعارك التحرير المستمرة بفضل فتوى الجهاد من بعد فضل الله ..