اكسيدات حب (خماسيات )

اول خماسيه 💓بعنوان [مبكبكة مشاعر ]

روايه اكسيدات حب 💙💙

السداسيه الاولي بعنوان
《مبكبكة♨مشاعر 》
مقدمه

استاقظت مخلوعه من عز نومي نشبح جنبي الساعه نلقاها 10 الا 10 حي عليا حي اول يوم عملي في المستشفي بنوصل متأخرة ،علي حظي المنبه خرب ، نحيت البطانيه لوحتها وخشيت الحمام نجري ايد تغسل في وجهي وايد تغسل في سنوني توضيت وصليت ونزلت نجري مالقيت حد في الحوش ، اكيد خالتي خديجة عند بنتها تفطر فوق كالعادة .
البست بوتي وخديت مفاتيح سيارتي وطلعت نجري ياذوبني نلحق ، الطريق زحمه وووووك ، من اولها ماشاءالله،  انسام تتصل بيا رديت علاها
انسام " توشوش " : يااااا حيوانه ووينك الدكتور يأخد في الحضور والغياب ، بيقسمونا لمجموعات فييييسع.
انطلقت نجري وعلي شوي درت حادث والناس تعيط وتلعلع عليا وعلي قوله هادي اسواقه النسون وانتم مكانكم كان الحوش وهلبا فيكم ومن هالاسطوانه طبعا ، هما مايفهموش شن يعني بيقسمو المجموعات وماتكونيش حاضرة ، يعني لايحق لكي الاعتراض بأي شكل  لو ماكنتيش موجودة من الاول ، واني نبي مع هديل وانسام صديقات عمري واللي كافحت معاهم 8 سنين توا في الطب البشري وتمينا مازالنا هالامتياز والحمدلله ليه الحمد والشكر ، لينا نحرثو من عام جدي يمرت،  فقدنا الامل  بصدق في موضوع التخرج ههه .
المهم واخيرا وصلت ، رادعت وشاحي علي مرايه السيارة وخديت البالطو الابيض وخشيت زي الفرارة الداخل ، قعدت ندور من مكان لمكان ونتصل بالبنات وهما يسكرو عليا ، اعطيهم كسرة في ايديهم هالمرزوحات ، المهم سألت ووصلت للحجرة اللي مجتمعين فاها اني كيف منطق والباب ينفتح ، نرفع راسي ونلقاه ياكبدي طرف طرررف طرف مارررريت ولاشفت زيه ، طويل وعيون عسليات زي عيوني 😍😍 وهذيكا اللحيه اللي مرسومه رسم وابيض وجسمه رياضي وغمازتين ، يانعليا منه وخلاص ، اني حسيت جسمي ارتخي ، ورجليا بدو يوزوزو ، معاش عرفت نوقف بيغما عليا منه ، وهوا يتكلم واني نشبحله ونتخيل في حياتنا الزوجية كيف بتكون وعرسنا في اما صاله وصغارنا شن اسماءهم ووووووه عليا هههه ، استاقظت بيه لما كشخ بقوة ، نوضني من قصه سندريلا  اللي كنت فاها لي قصه سالي جرح الزمان .
الدكتور :تي اننننكلم فيك ياطاااااالبه ، تأخيرك عليه خصم 5 درجات ، وعدم انتباهك وسرحانك واني نكلم فيك هذا عقابه 4 ساعات خدمه اضافيه وكان بتقعدي هكي اني حندير فيك اجراء اكبر .
اني "قعدت فاتحه فمي " :نعممم ، ششن(قطع عليا )
الدكتور : ولاحرف امشي من قدامي (ومشي )
جوني البنات قعدو يهدو فيا ، واني وجهي احمر وطاشه فيا النار ، عمره ماحد سبب في اهانتي بهالشكل ، وعمري ماسكتت لحد اطاول عليا ،لكن كلامي معاه محاوله خاسرة .
هديل : اسوله خلاص بالهي اعليك انسي الموضوع .
انسام : هذا الدكتور سيف ، طبعا شكله بعكس اسلوبه 180 درجة ، اكيد عرفتي هذا الشيء هههه.
اني" بغيض " :أعطيه سيف في بطنه هالمقهور ، اقسم بالله درهلي كبدي هالمغرور " نقلد في صوته " اننننكلم فيك ياطاااااالبه ، تأخيرك عليه خصم 5 درجات وينفخ في رووووحه هالمخفوووق ، علي اساس يهمني ال5 درجات ، يبلههم ويشرب اميتهم .
نتلفت علي البناات نلقاهم متخزرطات ووجوهم صفر ويأشرو ، ونعطاها هذيكا الشبحة بالجنب ونشوفلكم دكتور سيف واقف مكتف ايديه وصار علي سنونه بقوة قريب يتفجر ،
اشرلي بحقارة بمعني الحقيني ، مشيت وراه واني مطبسه راسي ونفكر كيف بيكون العقاب هادي المرة ونلعن في روحي ونسب في غبائي ، كل شويه يوقف عليه حد ويقعدو يتكلمو ، لكن اللي لاحظته انه كل ممرضه تفوت من جنبه مطبسه راسها وخايفه ، وكان هوا فات من بحدا حجرتهم كلهم يسكتو وينزلو عيونهم  شكله عارف طبهم علي المضبوط لانه معظم ممرضاتنا متحجرات ولا عندهم حنيه علي المريض لا شيء مافالحين الا في سطول المكياج اللي علي وجوهم  والبس الضيق والقصير والكعب العالي والمستكه اللي تضرب في افومهم ادقولي ار بي جي ، الحق عحبني فاها اللقطه حسيته رزين ومش متع بنات لحد ما طلعتله وحدة قنينه هلبا وقعدت تنادي عليه ، سلم علاها بالوجه وهوا مبتسم حتي عيونه فرحانه و32 سن يبانو  ، عاد ياكبدي يعرف لمني يوري سنونه ، اني جيت مننسحب وناخدها الشياط ، تلفتلي وفنص فيا بعيونه ، وشوشاته كلمه في وذنه وتلفتلي طوول ، اني تخزرطت قعدت نشبح للروشن ، وهيا تضحك ومندمجة ، في خاطري شن هالسخافه هادي تي خلاني ندندن علي حالي ، ضروروي نشبح دسكه قيس وليلي علي الصبح ، تي الحكايه مصحرا للاخير ، تي وصلت لمرحله من الجفاف حتي حد يقولي صباح الورد نقول هذا مكبد عليا ، المهم هوا واقف ياحنه ومندمج هدرزة واني نراقب فيهم زي العنزة من بعيد ،هادي بتطلع خطيبته هذا باش ياكبدي مش شايف وحدة غيرها ،  لكن اكتشفت انه عنده ضحكه خيال هالسيف ، واخيرا مشت من قدامه وفكتنا من الجو الحامض ، وكملت المسيرة ورااااه وكل شويه يتلفت يتأكد اني لاحقاته ، وحق ربي رجليا طاحو  من الدوران ، لف علي المستشفي كلها بعتالي وصل لحجرة فتحها وقالي خشي ، فاها سرير ومكتب ، قتله انعم انعم يابابا ، ليك ساعه تلفف فيا من مكان لمكان وفي الاخير هذا الثمن ،اسفه اني مش هكي رااااهو ، اني بوي مربيني علي الاخلاق وعلي العفه والطهارة ، اني مستحيل نحط شرف اهلي في التراب (سكرلي فمي ودفني للغرفه )...............

خلي نعرفكم بيا
اني اسيل مواليد 93 بنت طيوبه لكن الساني طويل بيضاء وعيوني عسليات لكن قزومه وجسمي معبي شويه لكن تعبايته بطريقه حلوة مش شينه ، دائما كانت الضحكة ماتفارقش وجي ، لكن من سنتين حياتي تغيرت ، توفت حييبه قلبي ، توفت اللي كانت تحن عليا وترد في بالها مني ، توفت سندي وظهري وكل شيء في هالدنيا بالنسبه ليا توفت امي 💔
قعدت فترة لاباس باها باش قدرت نتجاوز هادي الفاجعه لكن ربي ينزل الصبر والثبات والحمدلله قدرت نتأقلم شويه ، بعد مرور 6 شهور بوي قرر يتزوج ، واهني تعبت هلبا وماكنتش نبي مكان امي ياخده حد ، حاولنا نعارضو وقعد خوي الكبير فيصل لحد مامرته قنعاته يزوج امها لبوه وانهم اتنين عايشين بروحهم والجو اهوا ، وبوي ماصدق طبعا ، فيسع فيسع قري علاها فاتحه وجابهالنا ، وبوي نوعيته كلمه ترفعه وكلمه ادجيبه وهيا استغلت الوضع وحكمت فيه ومشاته علي كيفها ، اني سكرت دار اميمتي بالمفتاح وخليتها ادور دار تانيه تقعد فاها ، وقعدت اني ووخيتي ميرا اللي تقرا صف روضه ، امنا سيبتنا ومشت وماحد يدري علينا كل حد عايش علي كيفه وناسينا 💔💔