امبكبكه مشاعر ♨
الحلقه التانيه
اني مستحيل انحط شرف اهلي في التراب
سكرلي فمي ودفني للغرفه
سيف "بعصبيه" : شن ترفسي انتي ، شرف شني اللي تدوي بيه ، انتي في مستشفي محترمه ، احترمي نفسك والا واللهي نفصلك ومعاد تحلمي تاخدي شهادتك .
آسيل " عيوني تعبو دموع ونتكلم بعصبيه" : اني محترمه نفسي والحمدلله وبعدين من كل عقلك تبي تفصلني بعد شقاء 8 سنين بعد كل هالتعب وهالسهر ادجي انت تعزقه بكل بساطه ،شكلك مش بعقلك .
سيف " حمق ووجها ولا احمر وبدي يعيط " : تتحدي فيا ولا شني ، ايه نقدر ومافيش حاجة تمنعني ، هادي مش اخلاق دكتورة ، شكلك مافاتتش جنبك الربايه بكل.
اني " نضتله وابديت نعيط " : انت اللي قليل ذوق ومش محترم بكل
"شدلي ايدي ولواها بقوة وابدي يعيط بعصبيه حادة ": تبري ياقليله التربيه والاخلاق بري ولي لامك ترجع تعاود ربايتك ،واللهي واللهي ماك قاعدتها اهني وبري خودي حاجتك واطلعي معاد نبي نشوف وجك ،وراس اميمتي اللي ماكيفها واحد اللما نفصلك وماتفكري تخشي اهني واني عايش فااااااااااااااااااااااااهمه .
كان يهز فيا واني فاتحه فمي ومصدومه والدموع اتقطر بروحها ، مش من الطرد لا من الاهانه اللي هانها ليا ولامي الله يرحمها ،كميه الشر اللي في قلبه كميه الدمار اللي سببهولي وهوا مش عارف
الطب مش بس مهنه لا كان حلم امي
هذا الشي الوحيد اللي مخلي بابا صابر عليا وماعطانيش لاول واحد يطق بابه باش يفتك من همي
هذا اللي عاطيني القوة والدافع اني منعيش اختي ميرا بكرامه مش بذل مع خوي ومرته ومرات بابا
قداش حاسه بالالم حاسه بالتعب
قال الكلمات اللي قالهم وحدفني ولاني كنت شبه فاقدة الوعي ماقدرتش نرجع توازني وجيت طايحة علي حاشيه الطاوله وغرقت في دمي
سيف من الصدمه ماقدرش يرمش حتي بعينه
وطول نادي الممرضات ودخلوني لغرفه العمليات
بعد ساعات
طلعوني
الكل كانو يستنو فيا نفيق
صاحباتي وبابا ومرته وخوي ومرته وميرا وسيف متوتر وخاش طالع
ابديت نحرك في ايدي بشوية وفتحت عيوني
ميرا وصاحباتي قعدو يبكو ويتحمدولي بالسلامه
سالني بابا شن حاسه توة
اني : غر افتحو الضي خلي نشوفكم علاش مخليين الدنيا ظلام .
علامات الصدمه انصبت علي الكل
وسيف يرعش من الصدمه ووجها ولا اصفر
للحظات استوعبت اني انعميت اني بديت ضريرة مانشوفش انه حلمي للي كان شبه مستحيل توا اندفن عمري ماحنبدا دكتورة جراحة عمري ماحنشوف الضي عمري ماحنشوف وجه بوي واحبتي عمري ماحنشوف الدنيا تاني خلاااااص كل شيء راااح
ياريتني متت ياأمي ولحقتك ياريتك خديتيني معاك ياميمتي ولاخليتيني نعاني بروحي
سبف بصوت عالي اطلعو وني طبيب مختص واكدله انه حالتي صعبه وشبه الامل مفقود وانه اللي صار كله جراء الخبطه علي الراس انضرو الاعصاب الموصولات بالعين يعني سيف هوا السبب في كل شيء
سبف مسح علي وجها بتعب
وبوي وخوي يعيطو ويقولو كيف هكي صار ومن شني الضربه وخشولي يجرو يسالو فيا
وكان سيف فم الباب وكان عارف ومتاكد اني حنقول عليه بعد كل شيء داره فيا
وبدي يجهز في الكلام اللي بيقوله لاهلي
اني معاش عرفت شن نرد عليهم
شن نقوللهم هل نضره زي مادمرني هل نخليهم يهينوه زي ماهاني ، ولا يضربوه زي مادفني وخسرني عويناتي ، نخليهم يكسروه زي ماكسر خاطري، ولا يطردوه من المشفي زي ماطردني ، نقوللهم باش ياخدولي حقي الضايع بين الرجلين ، لكن هذا كله ومش حيرجعولي عيوني ولا قرايتي ولا تعبي ولا مستقبلي اللي ادمر مش حيرجعلي شيء .
اني :صارلي هبوط واغمي عليا وجي راسي علي الطاوله وبارك الله فيه دكتور سيف اسعفني طول ولا كنهذا راني مش بينكم توا .
بوي "حط ايده علي عيونه وابدي يبكي "
(رغم قساوتك يابوي من يوم ماتت امي جفيتني ومن نهار اتزوجت قسيت عليا وكنت تبي تعطيني لولد مرتك اللي متزوج وعنده صغار ، اااه يابوي قداش كنت نقول انك سندي وظهري قداش كنت مدلعني واللي نطليه يجيني وتحز عليا من امي وادقول دكتورتي مايقربها حد وهادي اللي رافعه راس باها ، ياااااه قداش الانسان يتغير ولا مرض امي ووفاتها قساك علي حبابك ياوبيي ،كنت نهرب من فيصل ونحتمي بيك ، ولما انت جيت عليا ، منو بيا اني يابوي ليش مافكرت اني وليه مالها ظهر غيرك يابوي ، ليش كل ماكانت مرتك خديجة تعبيلك في راسك مني تنوض تضربني وتكسر عليا في الحوش كله غر علاش بس ، اني بنتك من صلبك تبيعني علشان مراة علاش ، وين كلامك وين حنيتك وين حبك وين دلاعك وينك بس وينك توا يابوي تيكي توا نزلو دموعك عليا ، ليش مانزلو يوم كنت تحرم فيا اني واختي من المصروف علشان خديجة تبي ذهب جديد ولا بتشري قفطان لعرس وانت ماعندكش ، قولي وينك وييييييينك يوم كنت قدامك ننهان وننذل من مرتك وبنتها وانت تشوف ومااكر فيا ،وين كنت لما اني بديت خدامه في الحوش انضم ونطيب ونكنس ونجري فوق ولوطا ومظلومه من ولدك ومرته ومرتك وانت زايدني بسكاتك غر ويييييينك بس يوم كنت ننحرم من العشاء علشان مريضه ولا تاعبه مش قادرة انوض انضم لمرتك ، وينك يابوي لما كان خوي كل يومين يفك السير وينزل في جلدي هبك علشان رافضه نتزوج خو مرته بالغصب ، وينك لما كان يحرم فيا نمشي للكليه وينك لما كان ياخد مني في مفاتيح السيارة اللي شراهالي هوا وامي قبل 5 سنين احتفالا بنجاحي يااااااااه قداش تغير عليا حتي هوا من بعد وفاتك ياميمتي ، ااااااااااااااااااه وينك ياظهري وينك ياسندي ويينك مالقيتك يابوي والله مالقيتك مالقيتك )💔💔💔💔💔💔💔💔
انتهت الحلقه
تابعوني
أنت تقرأ
اكسيدات حب (خماسيات )
عاطفيةهادي تاني روايه ليا من بعد روايه قسمه ونصيب روايه ليبيه متألفه من مجموعه خماسيات كل خماسيه حيكون لها اسم و تحكي في قصه إما تكون واقعيه او خياليه فيها الحب والكره والخيانه والقضايا الاجتماعيه والسياسيه ????????????????????????????????????????????
