روايه مهمه حب ( الجزء الثانى من رحم للإيجار ) للكاتبه ريحانه الجنه

((الحلقة الخامسة والعشرون)

(((سلسلة عشق الرجال الجزء الثاني من رحم للإيجار)))

((مهمة حب))

((الحلقة الخامسة والعشرون)

🌹بقلم ريحانة الجنه🌹

في فلورنسا شهاب وتمارا في اوضتهم وتمارا بتجهز علشان تروح لمهدي. شهاب جواه قلق وخوف عليها مش عادي . عارف ان مهدي مش سهل وانها اول مهمة ليها وغصب عنها ممكن تفشل.

شهاب : جاهزة؟

تمارا بقلق وخوف طبيعي لموقفها : جاهزة. ان شاء الله.

شهاب اتنهد وطلع من شنطته سلاح بس مش سلاح عادي . وقرب من دراع تمارا: مش هتاخد كتيير هتتألمي بسيط اسف.

تمارا بتسؤل: ايه ده؟!

شهاب: دي شريحة هحطها في دراعك ماحدش ضامن الظروف. لو حصل اي غدر من مهدي. الشريحة دي هتحددلي مكانك فين وانا هتتبعك.

تمارا هزت راسها وغمضت عنيها . وشهاب ثبت السلاح علي دراعها وضغط وخرجت الشريحة زي الطلقة الصغيرة واستقرت في دراعها وظهر علي شاشة السلاح. انها في مكانها بنجاح . شهاب شاله وقرب من دراعها وباسه مكان الطلقة. وبأسف.

شهاب: اسف وجعتك !

تمارا ابتسمت : تؤتؤ حتي لو وجعتني . بعد اللي عملته ده . خلاص خفت .

شهاب ابتسم وباسها من جبينها: انا هكون معاكي خطوة بخطوة. فاهمة وتنفذي اللي قولتلك عليه . اللحظة الحاسمة الليلة . لازم نخرج من البيت ده النهاردة ومعانا الميكروفيلم ومهدي واضح.

تمارا اتنهدت : قول يارب.

شهاب : يالا انا هجهز وفي الوقت المناسب. هحصلك من البلكونة عند اوضته.

خرجت تمارا وهي بتدعي ربنا يعديها علي خير وماتفشلش. وشهاب جواه غيرة وخوف من وجودها معاه لوحدهم.

وصلت تمارا عند اوضة مهدي وخبطت. مهدي فتحلها وهو مبتسم. ابتسمت بتوتر ودخلت. ومهدي بص علي اوضة شهاب وابتسم بخبث حقير ودخل وقفل الباب. ولف لتمارا وحط ايده علي كتفها يقربها ليه . تمارا انتفضت وبعدت عنه بسرعة وبغضب.

تمارا: احنا اتفقنا علي ايه. مش قولتلك مش هتلمسني .

مهدي رفع ايده بإستسلام : خلاص اهدي براحة مالك. انا بس عايز افك جو التوتر ده. وناخد علي بعض.

تمارا بشراسة: لما انا احدد ده تبقي تعمله قبل كدة. لو قربت مني مش هيعجبك تصرفي.

مهدي بصلها بتمعن: مش عارف ليه شراستك دي مش بتقول انك بتشتغلي في العلاقات العامة. اللي بتشتغل شغلتك دي. بتكون عندها ليونة ومرونة وبتعرف ازاي تكون دبلوماسية. لكن انتي ..

تمارا قلبها بيدق بقوة وبتردد: ااانا ايه!

مهدي قرب منها وبص في عنيها بقوة : انتي اكنك محاربة قوية وشرسة. حتي لياقتك البدنية عاليا انا اخدت بالي منك لما كنتي بترقصي مع جاسر كمان وانتي بتعومي حتي في حركاتك كلها خفة وسرعة . انتي زي ماتكوني متدربة علي ايد متخصص في العمليات الخاصة.