فاطمة،،انصدمت مجنت مستوعبة الموقف عزة شلون اعيش وياهم وهمة يكرهوني ومدهم يشربون من دمي
امي ،،،فطومة ارفعي راسنا يمة املنا بيج وعكال ابوج الي انهان بس انتي تكدرين ترفعي اتحملي يمة شيصير بيج وتوقعي كلشي منهم اصبري يمة واكسبيهم واكسبي الشيخ هو مااعتقد يظل عليج اكيد راح يتزوج ويشوف حياتة مستحيل يبقى عليج وهو الشيخ اصبري واحتسبي لله ورب العالمين وياج
حضنتني وكالت احتمال راح نشيل منا الله اعلم اذا راح نلتقي بعد ديري بالج على نفسج يمة ربي يرضى عنج
فاطمة ،،،بجيت بحركة بجيت من كل كلبي وكلمات امي اثرت بية اويلي عليج يمة اويلي عليك يابة ان شاء الله دوم راسكم مرفوع
لميت اغراضي وودعت امي وطلعت شفت ابوية ينتظرني بالمزرعة ويبجي اول مرة اشوف دمعة ابوي نزلت على رجلة وايدة وبستها كتلة دمعتك غالية يابة
ابو حسين ،،،سامحيني بنتي ماكدرت اسويلج شي بس والله هذا احسن حل ماراح يتركونة واحتمال حتى ع عرضنا يدوسون فمن تكونين علة ذمة الشيخ تصيرين عرضة ويخاف عليج ويداريج ومحد راح يكدر يتعرضلج بعد حتى وان معاملتهم جانت قاسية وياج اتحملي بنتي ربي يرضى عنج حضنتة وكتلة لتشيل همي يابة ان شاء الله ارفع راسك
ودعت بيتنة ومزرعتنة وعيوني غركانة بدمعها
ورحنة على بيت الشيخ جنت اسمع بي بس اول مرة اوصلة جان يخبل جبير ووكت الغروب وكلة كلوبات وانارات ومزارعهم جبيرة كلش وهواي سيارات وناس بيها جانوا كلهم يخزرون بينة وعيونهم تجدح نار علينة
عباس،،،محتار بوضعي وصافن بدنياي شلون انكلبت حياتي 180 درجة وهيلين من نزلت للقرية ماكلفت نفسها واتصلت بية
اتصلت بيها شونج هيلين
هيلين ،،حبيبي مشتاقتلك عظم الله اجركم
عباس ،،،امين اشكرج ....وينج شو متصلتي ولا سألتي عني ؟؟
هيلين،،حقك والله مقصرة لكن تعرف امتحانات وماكو وكت وانت لازم ترجع هلاسبوع حتى تلحك بالي فاتك انت ناسي انك اخر سنة وعلى وجه تخرج
عباس ،،،لا مو ناسي بس عندي ظروف مكدر ارجع هالاسبوعين وراح اسوي اجازة
هيلين ،،،اي ظروف عباس والدك توفى الله يرحمة لتخسر كلشي
عباس ،،،،،اووووووف بكلبي اكول اجيتي على الجرح اني خسرت كلشي بعد ...شلون افهمج هيلين وشلون اوصلج الفكرة عن ظروفي اكيد مراح تتفهمين عاداتنا ولا تتقبلين وضعي الجديد
دك الباب حطيت ايدي ع سماعة تفضل منو
شيخ اجة ابو حسين وبنتة وينتظروك العمام جوة مع الشيخ الي يعقد
عباس ،،،اشرتلة ديطلع ويسد الباب
اخذت نفس وتنهدت ورجعت احجي مع هيلين
الوو ...هيلين محتاجج اكثر من اي وكت ياريتج يمي
هيلين ،،،الله يعينك عباس انت قوي لتستلم هذا امر الله الله يرحمة كلنا ع هالحال
عباس،،،، ان شاء الله يلا اني اترخص مع السلامة
هيلين ،،،الله وياك
عباس،،،رحت لغرفتي وقفلت الباب وشمرت عكالي وغترتي ونمت ع جربايتي احس راسي راح ينفجر ياربي اذا اني بكابوس اكعد منة بأسرع وكت ظليت افكر بحالي شلون شأسوي اني المشيخة مو ثوبي وحمل جبير اني مو كدها ودراستي لازم اكملها وهيلين مستحيل تتقبل وضعي هية اذا تشوفني بهل ملابس تكلب هههههه
وهالبلوة الوكعت فوك راسي شلون اتخلص منها وهية رسميا مرت الشيخ صارت لازم والدتي تتقبل الموضوع لان مو حلوة كدام العالم تنام بغرفة واني بغرفة اووووه
فتحت جهازي وكلبت صوري اني وهيلين حبيبة عمري مشتاكلج شوكت انزل للمدينة واشوفج اشتاكيت لصوتج كلت خلي اتصل بيها اتصلت خطها انتظار كمت غسلت وبدلت ورجعت اتصلت هم انتظار عفتة ونمت
فاطمة،،،خلوني بغرفة عادية بس هم كلش حلوة قفلت الباب علية من الخوف وظليت كاعدة على طارف السرير ولازمة عباتي ومانزعتها جنت خايفة واحس بأي لحظة يدخلون يكتلوني كامت تمر ساعة ورة الثانية حتى اكل ماجابولي نعست ونمت كعدت ثاني يوم كان بيتهم دائما هوسة وناس تفوت وناس تطلع وهم محد اجاني ولا دك الباب ظليت بغرفتي الى الظهر بدون اكل ولا شرب
عباس ،،،،كان بيتنة ميفرغ وناس تجي وناس تروح وكنت منشغل دائما تغديت وصعدت لغرفتي دكيت لهيلين مغلق ظل بالي عليها
باوعت للمزرعة من شباك غرفتي وظليت اتأمل المزرعة اجتي بالي فاطمة لان جنت ناسيها اصلا نزلت لام عدنان كتلها وين خليتيها كالت بغرفة الضيوف بالممر الثالث كتلها زين وديتولها اكل وشرب
كالت لا
عباس ،،،شلون ؟؟ من البارحة ماوديتولها اكل ؟؟
ام عدنان ،،شيخ من بعد الي صار انت شفت الحجية شسوت خفنا نتقرب بعد يمها
عباس ،،،بسرعة صعديلها غدة واطمني عليها ورجعيلي خبر انتظرج هنا كالت شيخ بس ....
عباس ،،،بدون نقاش ام عدنان
ام عدنان ،،،حاضر شيخ خلت اكل وصعدت دكيت الباب
فاطمة،،،فزيت وكمت ع حيلي همست منو ؟؟
ام عدنان ،،اني عيني ام عدنان جبتلج غدة
فاطمة ،،فتحت الباب ورجعت للسرير
ام عدنان ،،،اعذرينا تأخرنا عليج بس انتي لازم تتحملين وتصبرين هالفترة والله الحجية كلبها طيب بس الصار مو هين لا عليها ولا ع الكل
فاطمة ،،،همست الله يكون بعونهم
ام عدنان ،،،تغدي بنتي واقفلي الباب واني العصر امرلج اخذ الصينية واذا احتاجيتي شي كوليلي
فاطمة ،،
