غلطة عمر
همس القوارير
البارت الاول
مرحبا اني اسمي محمد عمري ٢٤ سنه عائلتي متكونه من امي والدي متوفي واخواني ٢ و٣ اخوات مستوانا المادي من الطبقه الوسط حياتنا بسيطه تسلسي اصغر الاولاد واخت وحده اصغر مني اخواني متزوجين وخواتي متزوجات باقيه عندي اختي الصغيره زينه وامي بيتنا ملك والحمدلله ابويه من توفى ما تركلنا شي اخواني بقوا يصرفون علينا ومن تزوجوا صارت الهم حياتهم الخاصه الى ان توضفت بالبنك واني بقيت اصرف على امي واختي واختي كانت تعنيلي هواي وقريبه مني اني بطبعي حيل حنون ونفسي كولش حلوه والي بأيدي مو الي واي انسان محتاج مساعده بالبنك اساعده ان كنت اعرفه او ما اعرفه والحمدلله والشكر السمعه طيبه والاخلاق عاليه وما عندي اي علاقات عاطفيه
عشنا الحمدلله والشكر مرتاحين اخواني مقصرو ويانا وامي عدها ذهبات للضروره وشكم فلس جوه ايدها واختي زينه بعدها تدرس بالخامس علمي بعدلها سنه وحده وتتخرج ومستواها كولش تمام والحمدلله وامي مره كبيره وتعبانه
فد يوم اني بالدوام اسمع زملائي بالبنك يتكلمون عن موضفه جديده من طرف استاذ صادق اليوم تداوم ويانا وحب الاستاذ يعرفها علينا بنفسه طبعا استاذ صادق المسئول عن القسم مالتنا انسان خلوق بحكم الصداقه الي بينا بالبنك كانت العلاقات اخويه مع عدى بعض الاخوان اما متزوجين او احباب ومقبلين على زواج وفعلا توضفت عدنا الموضفه الجديده
تقدم استاذ صادق
استاذصادق : شلونكم شباب شخباركم
الكادر : الحمدلله بخير دكتور
استاذصادق : احب اعرفكم بزميلتكم الجديده ناديه مساعده الكم انتقلت من المؤسسه الفلانيه وحبت تكون معانا واريدكم ديرون بالكم عليها لان اقاربي تصير اخت زوجتي وانتم ما يحتاج اوصيكم والنعم منكم ومن اخلاقكم
الكادر : اهلا وسهلا نتشرف بيج
وان شاءالله تكونين مرتاحه ويانا
ناديه : الشرف الي واهلا وسهلا بيكم
وبدينا نعرفها على اسمائنا وطبيعة عملنا
واخذوها البنات وعرفوها على مكانها وطبيعة العمل عدنا بالبنك
بنيه بسيطه بشرتها بيضه وعيونها كبار شويه تارسه مو رشيقه وطولها زين لا طويله ولا قصيره
يعني جمالها طبيعي بس كانت خجوله بينت من تصرفاتها وبين عليها خوش بنيه وحبابه
ناديه
اخذني استاذصادق زوج اختي وعرفني عالكادر وكانت اخلاقهم راقيه وحبابين وكولش فرحت بمكاني الجديد وحسيتهم مثل العائله الوحده وبديت اداوم وصارت علاقتنا قويه بس اني طبعي ما اجامل هواي وبالاخص ويه الشباب المهم كولش ارتاحيت بدوامي الجديد
محمد
كانت ناديه قليلة الكلام ويه الشباب بس للضروره او نطاق العمل لان كانت محافضه واخلاقها حلوه عجبتني كولش لان ثقيله ومتنطي مجال كنت احاول بكل طريقه ابينلها اعجابي من نضراتي او تصرفي وياها بس هي كانت تتجاهلني وهذا الشي خلاني اصر عليها لحد ما جربتها كولش وعرفتها انسانه شريفه وما عدها غير سوالف وتابعتها وشفتها من البيت للشغل ومن الشغل للبيت وسألت عن اهلها وطلعوا خوش ناس واخلاقهم عاليه اني هذا طبعي اسأل واشوف قبل لا اتورط علمود ما اضلم احد اني انسان عاطفي حيل ورومانسي وگلبي دومه مطيحني بمشاكل المهم نرجع لسالفتنا
