حياة: اخذني الولد دخلني بغرفه صغيره كلي هسه يجوج الغرفه جانت بيها قنفه خشب اول مدخلين كبالج صير وخالين مداد منا ومنا عالحايط
. اني ظليت واكفه وماعرف شسوي موقف لا احسد عليه
شويه جتني مريه جبيره سلمت عليه وبوستني وكعدتني يمها
الحجيه - يمه لتخافين احنا هنا مثل اهلج اني اصير ام شيخ خالد
حياة - تشرفت بيج خاله
الحجية - يمه شبيج مستحيه مني اني مثل امج حبيبتي وشيخ خالد تخلي عالجرح يطيب ماكو منه لتخافين منه
حياة - ظليت ساكته ماعرف شحجي
شويه دخلو نسوان وبنات وظلو يكلون هاي عروسه بس وحده منهن دكللهم هاي فصليه لدكولن عروسه لصدك
اني ظليت ساكته تقربت مني بنيه
امل - اني امل بت شيخ خالد انتي شنو اسمج
حياة - حياة
امل - عاشت الاسامي . كلش فرحت من شفتج بعدج صغيره حتى نصير صديقات
حياة - ان شاءالله
ظلت الحجيه تعرفني عالنسوان الواكفات
هاي حرمت حميد اماني اسمها
وهاي حرمت علي ساره اسمها
وهاي خالته للشيخ ام اياد
وهاي عمته ام هوازن
ظليت بس اهز براسي وجنت اتمنى يجون يكلولي ابوج رجع ياخذج
الحجيه: يمه امل كومي ودي مرت ابوج لغرفتها ترتاح وصفط هدماتها
امل : يله تعالي ادليج على غرفه
حياة: طلعت من العرفه الكعادين بيها لكيت ممر كبالي وبي غرفتين فوتتني بغرفه كلش جبيره وبيها اثاث حلو ومرتب
امل : هاي غرفتج صارت . كلشي جديد بيها عجبتج
حياة : اي حلوه
امل : اني كتلهم يدخلون الجنط فكعدي رتاحي وصفطي ورتبيهن على كيفج اني هسه اجي
حياة: عافتني امل واني اباع عالغرفه وجنت ضايجه كلش فتحت جنطي كلت خلي اصفط بيهن فتحت اول باب من الكنتور لكيت هدوم ومابي مجال اصلا ظليت صافنه واتنهد
شويه وندكت الباب فاتت امل
امل : ها ندليتي وين حتخليهن
حياة: لا هذا الباب مابي مجال
امل : اي اني فرغت هاي الباب بس الج واذا احتاجيتي بعد اكو بذيج الباب خانتين فارغه هم الج
حياة : شكرا حبيبتي تعبتج
امل : لا تعب ولاشي تعالي اساعدج حتى تكملين بسرعه
حياة: امل بنيه كلش حبابه وظلت ساعدني وسولف وحسستني هيي تعرفني من زمان وظلت تسئلني عدج خوات او خوان ويامن عايشه وسوالف لحد مكملنا الهدوم وعرفت منها امها متوفيه وابوها هو الي مربيها .
اامل : اني حطلع اشوف بيبي انتي كملي وبدلي وطلعي يمنا افرج بالبيت
حياة: اوكي
بدلت لابست كلابيه بسيطه لونها سمائي وخليت الشال وطلعت اباوع ماكو احد بالممر ظليت جامده بمكاني شويه وجتي ساره مرت علي
شبيج واكفه تعالي هنا كلنا كاعدين
رحت للغرفه نفسها لكيت الحجيه ويمها مريه يمكن خالته كلتلي
شافتني صاحتني
الحجيه : تعالي يمه كعدي عليش واكفه
رحت كعدت وظلت سولف ويايه وتسئلني على اهلي وسوالف
وكامت تحجيلي على شيخ خالد وشون صحته وشون عمليته
المهم عرفت بحالته وعرفت لازم عمليه ثانيه يسويه بعد فتره ويه العلاج طبيعي احتمال يمشي
ظليت كاعده يم الحجيه وراها جتي امل فرشت السفره وكامو البنات ينكلن العشه
وكعدنا ناكل بس اني جنت ماشتهي وذكرت ابويه هسه شديسوي اخذ علاجه تعشه
كملنا عشه وكامو يشيلون بالاكل واني كمت اساعدهم بس الحجيه مقبلت كالت كعدي انتي همه يشيلون
وراها اني جنت تعبانه وهلكانه امل شافتني كلتلي تردين تروحين لغرفتج كتلها اي اريد انام تعبت
ودتني للغرفه وكالت نامي انتي ترى بابا يتاخر يمكن
بدلت ملابسي ولابست دشداشه وجواها بجامه كلت خاف تصعد الدشداشه بالليل وتطلع رجلي
ولابست شالي وظليت حايره ماعرف وين انام كعدت عالجربايه اخذت تليفوني دكيت على عمتي وحجيت وياها وظلت تسئلني على اهله سئلتها على بابا وكتلها ديربالها عليه
وراها سديته شويه ونفتحت الباب اني عبالي امل رجعت
نداريت شفت بدايه من الكرسي المتحرك ديفوت اني دنجت راسي وظليت ارجف من الخوف وصوت الكرسي يتقرب مني
**********
خالد : طلعت كعدت بالديوان ويه الزلم جاين يهنوني بسلامتي وسوالف وياهم رجعت للبيت فتت عالحجيه
الحجيه : هلا يمه شونك
خالد : هلا حبيبه على الله
الحجيه : تعشيت
خالد : الحمدلله
الحجيه : اكلك يمه ترى البنيه خليتها بغرفتك ديربالك عليه وليدي ترى وجهه اصفر من الخوف
خالد : يمه جان خليتيها ويه امل تنام
الحجيه : شون حجي هذا هاي صارت مرتك شتريد يكلون شيخ خالد ينام وحده وحرمته وحدها
خالد : يمه اني مالي خلك لسالفه بيها نسوان البيه كافي ترى اني اخذتها حتى اسكت الوادم الي شايله سلاحها ومتحمله على اهلها
الحجيه : اي يمه ترى مبين عليها خوش بنيه صوتها مسمعنا وحتى اكل ماكلت
خالد : ميخالف يمه هي جم يوم وتتعلم علينا وانتي علميها وخليها ساعد البنات بشغل
الحجيه : اي يمه معليك بهاي سوالف روح ارتاح هسه والله كريم
خالد : رحت لغرفتي ونسيت ادك الباب اصلا فتحتها وفتت شفتها كاعده عالجربايه ومدنجه راسها
وصلت يمها .
السلام عليكم
حياة: كمت من مكاني وكفت وكتله عليكم سلام واني اصلا مشايفته ولا اعرف شكله حلو لا جبير صغير ظليت منزله راسي
خالد : شونج ان شاءالله مرتاحه بالغرفه مناقصج شي
حياة : لا الحمدلله مناقصني
خالد : زين صعدي راسج خل اشوفج ترى لحد هسه مشفتج
حياه : ظليت مدنجه وماكدر ارفعه راسي
خالد: يله شو صعدي
حياة: صعدت راسي عليه
باوعته شنو من جمال شنو هالضخامه شنو من رموش تخبل ولحيته وشوارب
خالد : رفعت راسها عليه شفتها عيونها مورمه من البجي وعجبتني صراحه حلوه وعيونها كبار وبعدها صغيره
نزلت راسها
كتلها ليش دتبجين ترى هذا البيت صار بيتج ثاني واهلي ترى حيحبوج لان انتي حرمتي صرتي
يله بويه روحي غسلي وجهج وتعالي نامي
حياة: محجيت اي كلمه رحت للحمام جان بالغرفه غسلت وجهي وطلعت شفته موكف الكرسي يم الجربايه وشال نفسه عالجربايه
صراحه يعني لاياقه عده كلش حلوه
اني ظليت اباوع
خالد : حظلين تباعين محتجين تنامين
حياة: تفاجئت بي يكلي حظلين تباعين وهو اصلا جان ديعدل بنفسه ومديباع عليه سون عرف صافنه عليه وكمت امشي وصلت للجربايه واريد اسئله وين انام واستحي
خالد: شفتها متوتره ومستحيه ومتكدر تحجي
كتلها شبيج
حياة : شيخ اني وين انام
خالد : الغرفه وسيعه وين متنامين نامي . تحبين تنامين هنا عالجربايه نامي جربايه جبيره
حياة: لا ماكدر وكمت اجر بالحجايه ا ني انكلب بالليل خاف اذيك
خالد : فتحي ذيج الباب مال كنتور اكو فراش اخذيه ونامي بالكاع
حياة: اخذت الفراش وفرشته بس خليت راسي غفيت من التعب والبجي والخوف ......
أنت تقرأ
فصليه ولكن
Romanceحياة : اني حياة عمري 22سنه اني وحيده ابويه امي توفت من جان عمري 13سنه ابويه تعب وره وفاه امي لان جان كلش يحبها عمامي اصرو عليه يتزوج بس هو جان رافض لان جان يحب امي هواي ويخاف عليه من مرت الاب ابويه مقصر ويايه بشي كل الي اريد جيبه الي ومجان يقبل...
