ذنوب لاتغفر

مشهد

ظهريه كاعده بالممر واغسل ملابس وكلهن قمصان بيض ....
الجو بدايه شهر 11 احس بنسمات الهواء البارده اداعب بشرتي التلفانه ....
كملت غسل وكمت شريتهم على الحبل واباوع لواحد واحد بيهم خاف بي شي
وشيخلصني وتعالي ارجعي غسليهم....

ذبيت المي مال الغسل بالممر وكمت اسحب بي
على الكاشي قليل منه ماسيطرت علي وكع بلحديقه ...
اجاني صوت عمي ...ولج انت ثوله
موتي الوردات الله يموتج...
بسرعه اخذت مي من المغسله وذبيت عليهم واسمع السب والشتم مالته ....
كملت ورحت للمطبخ لكيت عبوه طاكه بي من المواعين
ضليت اغسل بيهن واسمع اشكال السب والشتم ...
تعودت عادي اسمع واسكت...
رغم الوضع الي بي احنه بس متفائله كولش ودائما الضحكه مرسومه على وجهي...

صارت الساعه ب4 شفت امي اجت
والتعب مبين عليهه تلكيتهه بوستهه واستأذنت من عمي كالتله..
... ابو صالح تحتاج شي نروح لغرفتنه؟؟
... اشر بيده واالاركيله بيده الثانية معناتهه روحي..

رحنه اني وامي لغرفتنه ...
غرفه بالطابق الثاني صغيره بيهه سرير ابو نفر وكنتور وطباخ ابو العين وحده وسله زغيره بالكاع بيهه شكم ماعون....
رغم بساطتهه بس الوحيده الي نحس بيهه بلامان...

امي كامت بدلت  واني طلعت بتيته اكشر بيهه حتى نسويهه عشا لان امي تنام من وقت تتعب..
كملتهم وخليتهم بالطاوه واخذت عبايه امي غسلتهه صعدت لسطح شريتهه ...
اخذتني رجليه وتقربت اباوع للبيت الي تعودت كلما اصعد اباوعلهم ...

شفت سيارته واكفه بالباب .. سياره حديثه والبيت قصر عمري مراح اكعد بهيج مكان ...
سمعت امي تصيح ركضت لكيت الطاوه مدخنه والبتيته محتركه...
طلعتهن وخليت غيرهن بس فكري شارد ....

صح احنه من العوائل الفقيره ومثل مايسموهه العوائل المتعففه ... بس تبقى احلامي مثل كل بنيه مراهقه عمرهه 17 سنه
اتمنى البس ملابس راقيه وانسق الجنطه والحذاء نفس اللون...
اتمنى واتمنى ....
وكلها امنيات ...انتبهت من صفنتي شفت امي تقره قران...
استغليت الفرصه طفيت الطباخ وركضت للسطح صعدت على طابوكه واباوع شوكت يطلع...

واني واكفه انتظر ...شفته طلع من باب المطبخ وفتح باب الشارع لازم جكاره بيده ولابس دشداشه نيلي.. طويل وجسمه حلو ماشايفه شكله عن قرب بس المح طوله واحس كلبي يتراقص مثل الفراشات  ...

واني ملتهيه اباوع واريده يتقرب اكثر حتى اشوف شكله زين ...
حسيت على ضربه بكتفي وجره من شعري...
ولج يامصخمه شسوين ماده راسج على الناس لويشوفج عمج يعلكج فلقه ..
الظاهر جلدج يحكج .....
ضليت مغلسه ماحجيت لان دائما تلكاني صاعده اباوعلهم...

ضليت يوميه اكمل شغلي واركض بكل لهفه بحجه اشر ملابس على السطح واراقب شوكت يطلع حته اشوفه...

مرات اتعب من الأنتظار وانزل اخاف من امي..
تعودت لازم يوميه اصعد اباوع من السطح من يروح لدوامه الساعه ب8 بس ما اعرف وين يداوم...

مرات احاجي نفسي والومهه...
الي دا اسوي غلط وين اريد اوصل كل عقلي اباوع لواحد يوميه سياره حديثه وبيتهم قصر واللبس اخر موديل ...
وفوك كل هذا ماشايفني ...
لا والمصيبه الاكبر هو شاب يطلع عمره بحدود 30  واني 17 سنه مراهقه...

يوميه اكمل شغلي بكل لهفه وعبالك اول مره مشتغله لويمدحون بيه...
هو اني اشتغل واسمع السب والشتم
بس بداخلي كمية من الأمل والتفائل ابد ما اهتم للحجي... يكتلوني منا اضحك بوجوهم منا ...

مرات اكول يجوز عقلي ضارب بس شسوي من يوم يومي مبتسمه حتى ماما دكول من جنتي صغيره اجي الكاج تضحكين وحدج...

مرات انقهر على ماما تتعب هواي بس علمود نحصل لكمه ناكلهه ...
ودائما اشوفهه تحمد وتشكر وتوصيني اصير سباعيه...

بيوم كعدت ب7 بكامل نشاطي وحيويتي المعتاده ...
لميت فراشي ورتبت الغرفه ونزلت ...
سويت ريوك خاف يكعدون افراد عائله عمي ابو صالح ...
امي طالعه للشغل خطيه تروح تشتغل عند بيت بنت خالتهه دكتوره وتنطيهه كل شهر مبلغ قليل مايسوه تعبهه بس دكول ميخالف احسن من الماكو...

خليت الجاي على نار هادئه وركضت للسطح الجو بارد اريد اشوف فارس احلامي بطوله وهيبته...
شفته طلع لابس بنطرون وعلي كوت ونظارات سود...
كمت ابتسم لا ارادي وخجلانه وخدودي حمر عبالك دايتغزل بيه...
لحدما تحركت سيارته وراح واني على وكفتي وعيوني تلمع...

تذكرت الجاي عفته على النار نزلت طفيته لكيتهم كاعدين عدهم مدارس...
كعد ابو صالح الي هو عمي اخو ابويه بس من غير ام ....
شواربه شطولهن ويتفنن يريد طماطه وبيض سويتله ....
مرته اسمهه نعيمه معلمه و24 ساعه كالبه وجهه ...
وعدهه 2 ولد بلروضه وبنات 2 وحده صف ثاني متوسط وحده خامس ابتدائي...

تريكو وبدلو وطلعو ... شكلت دشداشته وبدت رحله الجلف ...
نظفت البيت وسويت غدا وضليت كاعده انتظر يجون ...
شوي واجت امي مو من عوايدهه ترجع هيج وقت تلكيتهه بوستهه...
وجهه متعوب ومبينه ضايجه...
صعدت وراهه لكيتهه مدده رجليهه وصافنه كعدت يمهه كتلهه...
... ماما شبيج؟؟
... تعالي يابنيتي اسمعيني ........

     ♡♡♡♡♡♡♡♡♡♡♡♡♡♡♡♡♡♡

هلاو حبايب قلبي ما اكدر ابتعد عنكم
رجعت وياكم بقصه جديده حقيقيه بأحداث مشوقه وكميه من الرومانسيه والاحداث القويه..

تابعوهه وحفظوهه عدكم... شكم يوم ارتاح وابدي انزل بالبارتات...
احبكم❤
متابعه ممتعه...