قصص رعب (باللهجة الليبية)

من يلي رااگب؟؟😨

قصة اليوم قصيرة وحبيت
نگتبهلگم بجميع تفاصيلها
قصة واقعية 100%
بتحگي عن حادثة في ثورة 17 فبراير
يعني وقت الفساد والخراب
والقصة في مدينة مصراتة
تحديداً في شاارع المطباات
خلينا نتوگلوا على اللّـہ ونبدوا
بِسْمِ اللّـہ الرَّحْمَـٰنِ الرَّحِيمِ

في يوم من الأيام گان واحد من الشباب واسماه محمد ماشي في سيارة لبوة عالية و والع الأغاني وگان الوقت شتي وهوا مسگر الشبابيگ وماشي في الطريق مع آذآن المغرب وگان الشااارع فاضي وهوا في شارع المطبات لقي عزوز واقفة في الطريق👵 وباين عليها گبيرة في العمر ومش قادرة حتى تمشي زين🚶المهم هوا وقفلها السيارة وقللها

محمد : ياخالتي بالگ نوصلگ لمگان

العزوز👵: يااريت و اللّـہ اني مش قادرة نمشي تعال ساعدني بش نرگب في السيارة لانها عالية😶

نزللها محمد ورگبها من الجيهة التانية

محمد: شنو توا متريحة ياخالتي

العزوز👵: اي باهي تعال ارگب حتى انت

مشي محمد رگب وسگر الباب لقاها تشبحلا

محمد : وين تبيني نوصلگ ياخالتي😊

العزوز👵: امشي لقدام طول ومعاد اتبرق فيا

استغرب محمد من گلامها وگمل طووول والدنيا بدت تظلم

العزوز: سمعت ياوليدي بالعزوز يلي تدور في السيارات العالية وتدور من شارع لشارع تخطف في الشباب

محمد نقص الأغاني وقال : لا والله ماسمعتش بيها

العزوز👵: في ناس ايقولوا لما ترگب مع الواحد السيارة تسخن

محمد ظحگ عليها وقال : شني تسخن في هالشتي ههههه

وفجأة بدت حرارة الجو ترتفع امشي فتح الشباگ

العزوز👵: خيرگ فتحت الشباگ

محمد : حسيت الجو ظغط في السيارة

العزوز👵: اي باه وقالگ حتى لما ترگب معاگ يولي وجهها وجه حمار

محمد : ههه غير يخرفوا مفيش منا الگلام هدا گنهادا بني ادم يولي حمار هههه

العزوز 👵: وقالگ حتى سنونها يطولن لين يطزن گرع السواق

محمد : احح ياگراعي شگلا في مسمار خش فيها

وطبس راسا بيشوف گراعا لقي حاجة طويلة حادة بيضا واصلة في گراعا وقعد يتبع في المگان يلي جايا منا لين وصل في وجه العزوز يلي گان وجه حمار وسنونها طوال

العزوز👵 : مش قلتلگ متبرقش هنا👹

ناض محمد نط يجري من السيارة وقعد يشوف في السيارة لين اختفت العزوز وعدا يجري رگب في السيارة وسگر البيبان والشبابيگ زين ولقي السيارة مصقعة

المهم ولعها وفات بيها خط واحد ولقي العزوز قدام السيارة امشي خبطها جت لاصقة في الڨيزاز امشي لف لفة سريعة طارت بيها العزوز واستعاذ من الشيطان وگمل طريقا وصل لحوشا مع الساعة 1 في الليل وطوول خبر خوتا وبوه واما عاللي صار في يلي صدقا وفي يلي گذبا بالنسبة ليا اني مصدقة لان الدنيا فيها گل شي

مع تحياتي 😻Hawywa Ab👑