كان يوم صعب يوم ما كلمني والدي وقالي اطلع علي بيت اختي عشان هتولد الليلادي وضرورى نكون جنبها استاذنت من شغلي وروحت علي طول نازل قدام الشركه وراكب تاكسي لبيت اختي ووصلت هناك قدام البيت عشان الاقيها متسنده علي جوزها ووالدي ووالدتي شايلين شنطه وبطانيه ونازلين السلم وهي بتتوجع وبتقول لجوزها مش قادرة وهو بيطبطب عليها ركبنا كلنا في العربيه بتاعته اللي كانت ميكروباص وافتكرت وقتها قد ايه اختي كانت بتتصل بوالدتي وتشتكي من تعبها في الحمل ده كتير كانت بيصحيني تليفونها في عز الليل والاقيها ملهوفه اني اصحي ماما تساءلها علي حاجه وانها تعبانه وشبه منهارة كانت بتشوف كوابيس كتير وحاجات ماما كانت بتقول ان كل ده وهم الحمل الاول وكده مره مسكت الموبيل ولقيته كان مسجل كلامها بالليل وقعدت اسمعهم من باب التسلية
اختي بصوت مرعوبه وخايفه بتقول لماما
"شوفتها تاني النهارده ياماما "
ماما مكنتش مركزة صاحيه من عز نومتها
"شوفتي مين يابنتي "
"الست ياماما اللي بتجيلي في الحلم من ساعه ما بقيت حامل "
ماما قالتلها
" جت قالت ايه ولا عملت ايه "
اختي قالتلها وهي صوتها بيتلجلج وخايفه واضح من طريقة نطقها للحروف
"جتلي كاني واقفه في مكان مظلم كله وحاسه اني عطشانه وريقي ناشف وهي لبسه عبايه سودا وشعرها منكوش وعندها عضه علي رقبتها وقربت مني وهي ماسكه كوبايه ميه بتقولي
" عطشانه"
هزيت راسي وقولتلها
"هموت من العطش "
ضحكت بصوت مخيف وبرءت عنيها اوي وقربت مني وقالت بصوت مرعب وتخين
"ميخلصناش تموتي قبل ما تولدي لنا المحروس"
وشاورت علي بطني وهي بتمد اديها ناحيتها بالميه وبترشها علي بطني من بره الهدوم وقتها ياماما حسيت بمغص شديد في معدتي وكانها بتتقطع جوه الوجع كان شديد اوي لدرجه اني صرخت في الحلم واول مابدات اصرخ هي اختفت وظهر اشكال مرعبه في الضلمه اللي حواليه عنيهم نورت اوي لدرجه مبقتش قادرة افتح عيوني وصرخت اكتر واكتر والمغص بيزيد في معدتي وكأن جواها حد بيخبط فيها وانا باتوجع وباصرخ فتحت عيني عشان الاقيني علي سريرى وجنب جوزي اللي اتفزع وصحي علي صوت صريخي وولع الاباجورة وانا مش قادرة انطق وباشاور بس بايدي علي كوبايه الميه اللي قريبة منه وهو فهم وجابها وشربتها كلها وقرب مني وطبطب عليه وقالي
"في ايه"
"قولتلو كابوس "
قالي
" طب انا قايم اشغل قراءن وانتي حاولي تغمضي وتنامي "
شغل القراءن وغمضنا ونام هو وانا كل بس ما اغمض عيني اشوفها كانها قاعده علي حرف السرير وبتضحك ضحكتها المخيفه دي ياماما انا خايفه خليكي معايا علي التليفون "
