هقولها كمان مره ..
أبويا الله يرحمه كان نفسه اول خِلفته تبقي بنت .. ولكن للاسف خلفني انا اول واحد .. إتصدم ;D .. أقوله ياعم إحمد ربنا .. دنا لو كُنت بنت مكنتش هتلاقيلي جوازه ؛D .. يمسكني من ايدى ويقولي : تصدق صح, الحمد لله ;D ... أنا كمان نفسي اول خلفتي تبقي بنت .. لأن :
- البنت مع ابوها لو رحمها وعلمها وكان عطوف معاها .. زي ما قال النبي بتكون سبب في دخوله الجنه ..
- البنت مع اخوها .. لو رحمها وبقي صديقها وتفاهم معاها .. برضه بيكون بسببها رفيق النبي في الجنه ..
- البنت لما تبقي زوجه .. إكرامها والموده والرحمه بيها .. بتكون سبب في دخول زوجها الجنه ..
- البنت لما تبقي أم، برها ووفائك ليها بيكون سبب في دخولك الجنه ..
- تبقي عمه او خاله . صلة رحمك ليها بتكون سبب في دخولك الجنه ..
لما كنت ف قعدة وناس قالولي مُعظم متابعينك بنات !! . رديت فورًا وقولت : شرف ليا !! ..
- يكفيني شرف ان اول من سجد لله ست " خديجه " ..
- اول من صَدق النبي انه رسول الله امراه " خديجه " ..
- اول لما النبي نزل عليه الوحي وكان مرعوب ونازل بيجري من الغار راح لحُضن امراه " خديجه " ..
- اول من ساعد النبي ووقف جنبه بأموالها ودافعت عنه بروحها " امرأه " خديجه ..
- الشخص الوحيد اللي ربنا بشره قبل وفاته بقصر في الجنه وأرسل سلامه ليه كانت إمراه " خديجه " !! ..
- وأحب الناس الي قلب رسول الله امراه " عائشه " ..
- ومات رسول الله علي صَدر امراه " عائشه "..
- والنبي في غزوة أُحد اول حد دافع عنه لما الكفار هجموا عليه كانت إمرأه " أم عماره " ووقفت قُدام الكُفار وكانت بتضرب بالسيوف علي كتفها لحد لما كتفها اتخلع وابدًا مرضيتش تسيب النبي ..
- اللي كانت بتحارب الموت وتروح تودي الاكل للنبي وهو في الغار مع سيدنا ابو بكر كانت امراه " أسماء بنت ابي بكر " ..
- الست اللي ربنا سمع جدالها للنبي من فوق سبع سموات ونزلها سوره مخصوص في القران " خَوله بنت ثعلبه " وكانت سورة " المُجادله " ! ..
- سبب وجود بير زمزم اللي بيشرب منه الملايين لحد الآن كان عَطش امرأه " هاجر " ..
- سيدنا عُمر جعل جنود المُسلمين ميغيبوش عن زوجاتهم اكتر من 3 شهور بسبب امرأه اشتاقت لزوجها المُحارب !! ..
- سيدنا عُمر كان مُستشاره اللي بيتابع معاه أحوال الاسواق ويراقب التُجار ويمنعهم من الغِش وغلاء الاسعار كانت امرأه " الشفاء بنت عبد المَلك " ...
- سيدنا عُمر غير قرار بعد إعلانه للناس واعتذر عنه بسبب امرأه قالتله انت اخطأت " الشفاء بنت عبد الملك " !! ...
- اول طبيب في الاسلام امراه " رُفيده " .،
- اول شهيد في الاسلام امراه " سُميه " ....
- يمكن تكون الست مخلوقه من ضِلع الراجل .. لكن الراجل كُله علي بعضه حته من السِت .. يكفيني شَرف ان مُعظم متابعيني بنات كُلهم تمًا بعتبرهم اخواتي .. ويكفي إن اخر كلام للنبي قبل وفاته كان بيوصي ويقول : استوصوا بالنساء خيرًا " .. واول الناس لحاقًا بالنبي وتوفي بعده مباشرةً كانت بنته فاطمه .. وسلالة النبي موجوده لحد النهارده بفضل بنته فاطمه، ومن اجل كدا يابخت اللي خلف بنت لأنه فعلاً عنده باب كبير من أبواب الجنه .. البنت علي رأي سيدنا معاويه بن أبي سُفيان لما قال علي بنته : هي تُفاحة القلب ومُتعة الحياه ❤️ !
