طبعا البنية الي حبيتها محد يعرف بموضوعها بس اهلي واهلي يدرون اني بعد مااحب اي بنية بعد ماخانتني حبيبتي احلام الي تعرفت عليها من جنت ادرس جامعه جنت اموت عليها وحبيتها هواي وجانت شنو تتمنى احققه الها ومجنت اعرف بيها عدها علاقة بابن عمها وناوين على الزواج الا بعد ماتزوجت واني بوكتها جنت مرحلة رابعة هندسة وحتى تركت الدراسة فتره بس اصدقاءي بالجامعه اجوني لبيت هلي وگلولي غيث ترى احلام متستاهلك ارجع للدوام لتحطم مستقبلك بسبب وحده مثل هاي وفعلا قررت ارجع اكمل دراستي ودست على قلبي وخلصت جامعه وگلت بعد مستحيل احب وحده بحياتي بعد بس نسرين اليوم حرگت مشاعر بداخلي جانت مدفونه ....
بعد يوم من حادثة الدرج اجوي خطبوا حنان لابن عمها واخوها الشيخ غيث وافق لان ماعدهم بنية ترفض ابن عمها والصراحه هيه جانت خبيثة ويايه من اول مادخلت بيتهم بسبب الي صار وطلعت كل حقدها عليه باشكال الاهانات والضرب واني جنت اسگت لان ماجنت اريد تصير مشاكل بسببي ويكرهوني وهلگد مجانت حقيرة وخبيثة بداخلي فرحت لان مصارت من نصيب اخوي وبدوا يحضرون للخطبة والعرس وهيه صاعده ونازلة تصيحلي تعاي يلفصلية وروحي يلفصلية واني جنت اساعدها ومااتذمر لحد ماصارت الخطبة واجه يوم العرس وقبلها بيوم اجاني شيخ غيث للغرفة وگلي اريدج ترتبين روحج بالعرس انتي حتى لو فصلية انتي هسه مرت الشيخ گدام الناس باوعتله بحزن وجاوبته بس شيخ اني ماعندي ملابس بس ملابس البيت لان من جنت عد اهلي مجنت اطلع لاي مكان بس بالبيت
گلي : حضري روحج اخذج وياية للسوگ تشترين ملابس
گتله :ماكو داعي شيخ اني ماراح اطلع بالعرس
گلي:گتلج حضري روحج دا اخذج بعياط وعصبيه
گتله: تأمر شيخ
باوعلي بعصبيه وراد يطلع وصل يم الباب واندار عليه
گلي : بعد الغده اخذج
گتله : حاضر شيخ
كملت تنظيف وسوينا الغدا وتغدو ونظفت المطبخ واجه الشيخ للمطبخ وجانت هاي اول مرة يدخل الشيخ للمطبخ
گلي :يلة حتى نروح حضري روحج انتظرج بالسيارة
گتله : حاضر شيخ .
الصراحه اني بداخلي جنت فرحانه لان هاي اول مرة اطلع للسوگ من يوم الي دخلت بيت الشيخ .ورحنا للسوگ ودخلنا لمحل ملابس وهو اختارلي ملابس وگلي گدريهن واني گدرتهن واحد وره الثاني جانن يجنن گلش حلوات وگلي اخذيهن گلهن بقيت صافنة عليه گتله :هذني هواي شيخ .
گلي :مالج دخل گتلج اخذيهن گلهن .
الشيخ من شفتها دخلت لمحل الملابس جانت تباوع على الملابس ما مصدكه راح تشتري وكل ثوب تباوع عليه اگلها اخذي ومن دخلت تگدرهن طلعت تجنن بيهن اويلي شلون عليها جسم كلش حلو كلشي يلوك الها ....
بعدما طلعنا من المحل اخذني لمحل ثاني مال مكياج
گلي : ادخلي اخذي مكياج.
گتله :مااحتاج شيخ اني مااحط مكياج .
تقرب مني وگلي : اني شگتلج اخذي مكياج انتي هسه مرت الشيخ .
گلته بخوف :حاضر شيخ .
ودخلت اخذت انواع المكياج صح اني احب احط مكياج بس عمري ماحطيت على وجهي مكياج وفكرت شلون راح اعرف احطه واني ابد ماحطه مكياج بوجهي وبعد ماخلصت من محل المكياج وكفني يم محل مال ملابس داخليه وگلي ادخلي اشتري واني متت خجل معرفت شحجي وبعدين دخلت اشتريت ملابس داخليه اليه وهو بقى برة ينتظرني كملت وطلعت....
گتله :كملت شيخ .
گلي : يلا امشينا .
من دا نريد نطلع من السوگ اني صفنت على محل بي بدلات كلش حلوة هو انتبه عليه
گلي :شبيج صفنتي .
گتله : لا مابيه شيخ .
اجه وگف يمي گلي يابدلة بنظرج حلوة گتله الحمرة تجنن بعفوية حجيت وحسيت على روحي وخجلت .
وبعدها طلعنا من السوگ ووصلنا يم السيارة وصعدنا الغراض واني صعدت بالسيارة وهو گلي انتظري هسه اجي هزيت راسي يعني اي .
وراح الشيخ واجه ورة شوية شايل بيده علاگه دخلها للسيارة وصعد دا يسوق وبالطريق
گتله :شكرا شيخ على الغراض .
اندار عليه وگلي بعد لتناديلي شيخ صيحيلي غيث گتله :تامر شيخ انتبهت عليه صار عصبي گتله :تامر غ...غ..ي..ث .
هنا انتبهت عليه ضحك فدوة لله تجنن ضحكته يمه بديت احبه والله .....
وللحكاية بقية .....تابعوني وانشاء الله مااتاخر عليكم بالبارت الجديد...فديت تصويتكم
