كان في كلام بينا لازم يتقال لأنو العلاقه انتهت و نحنا ماقلنا الجوانا كلو ، كان في زعل و سوء تفاهم لو كان اتحلا وقتها كان ممكن أكون مرتو هو بدل زين ، النقاش القفلناهو قبل قريب للسنه فتحناهو هسي و اي زول فينا بقى حق زول تاني ، قال لي عملتي كده ليه ؟ وصلتينا المرحله دي ليه ؟ قلت ليهو قوم سريييع من هنا هسي لو زول شافك داخل الغرفه ! كاني بتكلم مع حيطه هو لسه مصر يقول لي عملتي كده ليه ؟ لحدي ما قام من السرير وقف و كورك فجأة في وشي انتي حقيره كده ليه ، عملتي فيني كده ليه ! في زول بضر زول بحبو كده؟ قلت ليهو رياض اطلع بره , قال لي انتي دمرتيني انا و صحبي ما بتحسي ! ماعندك ذرة احساس؟ قلبك ده شنو ! ما حرام العملتيهو ده قلتا ليهو حرام الانت عملتو قبل شويه ، اطلع بره سريييع ماعايزه اسمعك حتى بتقول في شنو و ما بهمني اساسا العايز تقولو اطلع سريييع ، و برضو كأني بتكلم مع حيطه قال لي غلطتي معاي و قلتا ما مشكله امشي اراضيها ، مشيت لحدي بيتكم عشان اراضيك لقيتك غلطتي مع امي و قدامي ! قلت ليهو وانت فهمتا العايز تفهمو و رجعتا بدربك من غير ما تجي تسألني عن الحصل كلو ، قال لي سندس انا شفتك مديتي يدك على امي ، اللحظه ديك انا بكيت طوالي و اتخنقتا قلت ليهو انت الوصلتنا للمرحله دي ، انت الخليتني اكره اسمك زاتو ، هسي يادوب حتى حسيت بشعوري ! انت ماعارف انا كنت بموت كيف لمن اشوفك مع مرتك ! ماعارف اني لحدي هسي بمووت الف مره لمن اشوفك قاعد جنبها انت آذيتني و انتهيت مني يارياض ، لأول مره كان اشوف رياض و دموعو واقفه في طرف عينو بس ما قادر ينزلها قدامي ، جا قعد في الكرسي المقابل السرير و بس بعاين لي انا ببكي ببكي شدييييد و خاته يديني في وشي و ببكي ، بقى بقول لي خلاص اسكتي و انا لسه مستمره و هو لسه بقول لي اسكتي و انا لسه ببكي ، تاني انفعل و كورك قال لي اسكتي 😡 نزلتا يديني و نزلتا من السرير جريت الحمام ، طلعت الأكل الكنتا ماكلاهو كلووو كنت بتخنق و ببكي و هو بره سامعني بتقيأ ، بعدها قعدتا مسافه في الحمام و رفعتا شعري كعكعه وغسلتا وشي و عيوني كانت حمر زي الدم من البكا و الخنيق اتعطرتا و شميت العطر عشان بطني كانت قاالبه ، جيت طالعه بره يادوب مفتحه لقيتو قاعد في الكرسي لسه عاين لي و سكت ، قلت ليهو بصوت واطي رياض قوم اطلع ، قال لي انا ماقادر انساك ، رياض قوم اطلع ، انا مشتاق ليك شديد ، رياض قوم اطلع ، قام على حيلو كان عايز يطلع المره دي بس انا ماعارفه مالي حسيت اني ماعايزاهو يطلع ، حرام البعمل فيهو ده بس اللحظه ديك حسيت بي رغبة في اني انسى اي شي ، زين و اهلي و الدنيا كلها ، انا المسكتا رياض بعد ما كان طالع و حضنتو ، انا براي العملتا كده وعارفه انو حرام العملتو و عارفه انو الشيطان كان قاااعد معانا اللحظه ديك ، بس حضنتو و بكيت في حضنو ، كنت اقصر منو شويه ما زي ياسمينه قريبه ليهو في الطول بس انا طويله بالنسبه للبنات و قصيره بالنسبه لي رياض ، حضنا بعض لمسااافه كده بدون ما زول يقول حرف ، كأني كنت مخدره بشعور و صحيت على شعور تاني ، فجأة زحيت منو و فكيت يدينو مني ، يمكن هو زاتو حسى بنفس الشعور الحسيت بيهو و طلع طوالي من الغرفه ، بعدها قعدت براي في السرير بفكر ده شنو العملتو ده !! انا كيف عملتا كده ؟ انا كيف استلذيت بحاجه حرام ؟ خفتا ، خفتا شديييد بعد الغلطه الغلطتها ديك ، بعد نص ساعه جا زين و ياسمينه راجعيين الفندق ، جا داخل و لقاني صاحيه ملبوشه مخلوعه متوتره ، قال لي صحيتي بتين! عاينت ليهو وسكتا قال لي سندس ؟ برضو كنت بعاين ليهو لكن من الخوف خايفه اتكلم ساي و يعرفني ، قرب مني عايز يمسك يدي زحيتها سريع و قلت ليهو لا ، بسرعه كده ، عاين لي مخلوع سندس ؟ يادوب ماحسيت اني ح افضح روحي قلت ليهو زين انا عيانه بس ، قال لي مالك انتي ! مما سافرنا ووصلنا متغيره معاي ؟ لو جيت اقرب منك تتزهجي و لو قلت ليك نطلع برضو بتتعذري بي حاجات و لمن نكون مع بعض بتخترعي بس حاجه عشان تشغلي نفسك بيها عني ، سندس في شنو ؟ لينا شهرين متزوجين و انا ما قربتا منك الا مرات بالعدد و ساكت وصابر بقول اديك وقتك و ما استعجل عشان انتي لسه ما فاهماني ولا مقربه مني ، سندس انا بديت ازهج من توترك الوقت كلو ! و من تغيير مزاجك الوقت كلو ؟ هسي مشيت خليتك كويسه و ارجع القاك عامله كده و متنشنه ! ، سندس في شنو ؟ قلت ليهو زين انا بس تعبانه عايزة انوم ، طلعتا الأكلتو كلو عشان كده جسمي هابط خليني ارتاح لو سمحتا ! ، رفع حاجبو وعاين لي عرفتو ما راضي و ما مقتنع قال لي طيب و قام من جنبي ، مشى غير ملابسو و جا راجع رقد في الكنبه قلت ليهو زين ! قال لي نومي براحتك هناك ماعايز ازعجك ، حنيت عليهو اللحظه ديك لأني حسيت بنفسي وحده حقييره شدييد عاينتا ليهو وقربتا ابكي ، كان نفسي اقول ليهو الحاصل كلو بس ماقادره ، اتذكرتا سجى بت عمتي و خيانتها لي راجلها اتذكرتا كلامها معاي لمن قالت لي ما حتعرفي الشعور الأنا حاسه بيهو الا لو جربتيهو ، اتذكرت لمن بصوت عالي لعنتها و قلت ليها انتي وحده قليلة ادب ، مافي شي ناقصك راجلك زول كامل ، ما قدرتا انوم ساهرتا الليل كلو في سريري و انا بفكر في العملتو مع رياض ، زين ماعندو ذنب! زين كامل و بستاهل الأحسن , انا بقيت سجى ؟ انا بقيت احقر من سجى في الحقيقه ، ماقدرتا انوم و انا بلوم في نفسي و ببكي للحظه كرهتا نفسي لدرجه بعيييده و كرهتا رياض ، قلنا الجوانا كلو و طلعناهو بس غلطنا ، غلطتا انا لمن منعت رياض من المشي و طلعت شوقي كلو في حضن ، كانت لحظة رغبه بس الندم البجي بعد اللحظات دي ما بروح ابدا ، في غلط ما بتغفر نهائيا في حاجات ما بتتغفر و لا بتتصلح ، زين كان نايم و انا كنت بعاين ليهو زعلانه من نفسي ، انت ذنبك شنو ! انت لو عرفتا الحصل ح تعمل شنو ! تقتلني ! تقتلنا الاتنين ! انا دمرتا حياتنا كلنا التلاته ، اتغيرتا كده ليه ! بقيت انانيه و طماعه بقيت وحده مباريه رغباتها بس ، بدون ما تفكر نهاية الغط شنو ، في احساس اسمو الخيانه اول ما انت تبدا تشعر بيهو ، بياكلك حته حته ، بدمرك انت و بنتهي منك قبل الزول الإنت خنتو ، قبل زين , في حاجه اسمها الثقه لو اتكسرت مره تاني مستحيييل ترجع ابدا ابدا ، جا الصباح و انا يادوب بديت انوم .. لحكي بعد الضهر كده صحيت على صوت زين بقول لي سندس قومي نحنا مسافرين .. قمتا من النوم مخلوعه قلت ليهو زين مالك ؟ قال لي قومي نحنا راجعين السودان المساء قلت ليهو زين في شنو ؟ لأني عامله غلط و غلط كبييير فقدتا الثقه في نفسي ، حسيت بيهو عرف بالحصل بقيت بعاين ليهو بنظرات خوف و قلق و حيره ، قال لي قومي جهزي حاجاتك نحنا ح نرجع ، قلت ليهو ليه ؟ قال لي بدون سؤال ، دخل الحمام و خلاني بفكر زين مالوا ! قالب خلقتو مالوا ؟ ما سألتوا كتير ، و رجعنا المساء للسودان كلنا الاربعه ... مرا اسبوع و زين بعاملني عادي بس ما زي اول ، يمكن لأنو متحسسس من تصرفاتي و هروبي منو ؟ ، انا فترة الاسبوع كلها متغيره ما باكل و زهجانه من نفسي و قرفانه من اي شي ، كنت قايله انا كده عشان العملتو مع رياض مأثر في نفسياتي ، لكن لمن كلمت امي بالتلفون قالت لي بتكوني حامل امشي افحصي ، كلمت زين لمن رجع من الشغل اني عايزة امشي الدكتور ، لبسنا و جايين نازليين لاقيت امو و اختو و ابوهو بتغدوا امو سألتني مالك يابتي وشك كده ! قلت ليها تعبانه يا امي قالت لي زين ياولد مرتك دي مالها من رجعت ضعيييفه ، قال ليها بتطلع اي شي بتاكلوا ، قالت لي بسم الله ؟ انتظروني امشي معاكم الدكتور ، زين قال ليها مافي داعي بنمشي برانا بس هي اصرت تمشي ، غيرت ملابسها وركبت معانا ، وصلنا الدكتور و عملت الفحوصات اللازماني كلها ، كنت منتظره النتيجه تطلع و متوتره لو كلام امي طلع صاح ! و خوفي طلع في محلو الدكتور طلع و بارك لي زين قال ليهو حامل ليها شهر يادوب في البدايه و لازم تنتبهوا للجنين ، و الفرحه الشفتها في وش زين 😭😭 امو الساعه ديك😭😭 بقت بتزغرد في نص المستشفى ، جات حضنتني و باستني يمين و شمال و في راسي ، ماقدرتا امسك نفسي و بكيت الاتنين كانوا بعاينوا لي و قايلني ببكي عشان البيبي و انا ببكي على حاجات كتيييره مكتومه جواي ، وصلنا البيت و كلموا باقي البيت و فرحوا و باركوا لي ، زين اتصل على امي و كلمها و برضو زغردتو ليهو و باركوا لينا ، زين اتغير طوااالي رغم انو كان زعلان مني الايام الفاتت موضوع الحمل غيروا ، مسك التلفون و ضرب لي ياسمينه من فرحتو ماقدر يصبر لبكره كلمها و هي كلمت باقي البيت و رياض ، رياض الاتغير برضو بعد سمع بي حامل ، تعبتا شديييد اول شهور و عدت بسرعه الاربعه شهور الاولى ، قدرنا نعرف انو الجنين ولد لمن تميت الخمسه شهور ، و انا داخله في الشهر السادس .. بديت ارجع لطبيعتي و اكل عادي و ما اتقلب و ما اتزهج وضعي كان كويس و وضع الجنين برضو ، كنت شايفه فرحة زين زايده يوم عن التاني بي جية ولدنا السماهو مُتيم 💜 بديت احس اني لازم اتكلم ، ماقادره اسكت. ماقادره اغش زين اكتر من كده ، الطفل ح يجي كيف في جو زي ده ، ما قادره استمر في القصه دي لو ما اي حقيقه ظهرت ، رياض كان بعيد مني و الحصل في باريس ما اتكرر تاني ابدا لا قعدنا ولا اتكلمنا و لا غلطنا ، كان يوم واحد حصل في باريس بس الحصل في اليوم داك كان واقف في طريقي ماقادره استمر في الزواج ده بعد كده ، ما عشان رياض لأني كنت مقتنعه رجوعي ليهو من سابع المستحيلات بس عشان احساس الخيانه البقى ملازمني طوالي حاميني النوم و القعاد ، كل ماكنتا بشوف زين كل ما كنت بحس بالذنب ماقادر استمر مع الزول الأنا ظلمتوا و بظلم فيهو لسه ، احساس كان خانقني ما مريحني احساس كان بعدم فيني كل يوم و احسن لي منو الموت مره واحده ، مابقدر انتحر زاتو رغم اني فكرتا في الانتحار كم مره بس شعور الامومه كان بمنعني , الطفل ده ذنبو شنو ! لكن انا بستاهل الموت , عشتا كابوس فترة السته شهور بتاعت الحمل ماقدرتا اضوق فيها طعم الراحه و النوم ، كل ما اشوف نفسي في المرايه بتذكر غلطي البديت بيهو انا من لحظتي الفكرتا فيها اتزوج زين ، قلتا خلاص اكلم زين و اليحصل يحصل .. اي خايفه ، خايفه شديد من ردت فعلوا ، بس عايزة اعيش مرتاحه نفسي انوم مرتاحه ياخ ، طيب لو طلقني ! ما مشكله ما عايزة حاجه منو , طيب لو شال الولد مني ! ، كنت خايفه من حاجات كتيره ، بس احساس الظلم الحاساهو اتجاه زين منعني من السكوت ، قلت اتكلم واليحصل يحصل .. ضربتا ليهو وهو في الشغل قلت ليهو ارجع بدري لأنو في موضوع ضروري عايزة افتحو معاك ، ختا في راسو انو موضوع بتعلق بي اهلي بس ما ختا نهائيا انو موضوع غير كده ، جا راجع بدري اليوم داك ، كنت مجهزة شنطة ملابسي و لابسه كويس ، و اخترت يوم مناسب لأنو اهلوا كانوا بره البيت ، جا لقاني منتظراهو في الصاله بره قعد و قال لي سندوسه مالك ؟ خفتا تكوني تعبتي و ضغطك نزل زي المره الفاتت ! قلت ليهو قلت ليك في موضوع قال لي اي موضوع شنو ؟ قلت ليهو زين ...
يتبع
