🌹 أوبريت أيام عمرنا 🌹
(ويدخل الراوي وينبه الجميع بمضمون الحكاية
وفي ايده طبله وعصاية )🧔👩🏫
فترات عمرنا فيها عبرة ولهاغاية
تعالى واسمع معانا الحكاية
حكايتنا مستمرة ملهاش نهاية
هدفنا منها العظة والهداية
جد وجدة بيحكوا من البداية
ركز وإسمع لحد النهاية...
★★★★
🌹البنوتة🌹💃
كنت بنوته. …. حلوة وكتكوتة
كنت شقية… … بس ذكية
لعب ودوشة… ...وهيصة وروشة
فرحانة بجزمة… ومريلة وشنطة
وضفيرة ... وأُصَة … ومصاصة
ألوان … . و قلم… … وكراسة
بابا وخدني… .في إيدُه .. بتنطط
ومن ...الفرحة… قلبي ..يزقطط
ماهو ..انا بنت .. جميلة.. وامورة
وشوية.. شوية ..بقيت... سنيورة
وابن.. الجيران .. بعتلي ..صورة
قالي.. ياحلوة… هقولك… . كلمة
قولته… امشي .. من هنا .. يلا
دانا يا واد .. راح أبقى… مهمة ..
وحاجة كبيرة .. ومشهورة
سكت هو ..سَبلي الصورة
بس انا كنت ..في قلبه ..محفورة
★★★★★
🌹الصبي🌹 🕺
لما كنت طفل صغير
كان كل همي المصروف
كنت عيل كما الأنعام معلوف
كان كل أملي حتة شكولاتة
مكانش حلمي فلوس في بنك
أو حتى أكنز وأحوش تحت البلاطة
واخد الدنيا وسارح
وعايشها بكل ألاطة
مفيش حد كان يوم همي
غير شخطة أبويا أو شبشب أمي
انا دايماً كان حلمي
يرضوا عني يوم ما أقابل ربي
كنت أجري في المزارع وأطير 🏃
أفرح ألعب يعجبني الطير
أطلع وأدور على عش العصافير
والواد صحبي يشتري لعبه منه أغير
أجري لأبويا أقوله انا عاوز زي الغير
ألعب في الشارع والحاره
أجري ورا الكوره بمهاره
وأستنى من العيد للعيد
عشان أشتري لبس جديد
وآخد مصروفي من عم سعيد
أشتري بيه كام بالونه
وأطيرها من البلكونه
و الله كانت أيام حلوه زمان
والحاره كان فيها عيال جدعان
نلعب نسهر مع أحلى جيران
كانت نيه صافيه وخالصه
وحياتنا بسيطه وسهله
ولا حاجه صعبه ومستاهله
وحبيت بنت جيرانى على غافله
★★★★★
😍مرحلة رقم (1)😍
🌹الأحفاد🌹
حلوة يا تيته حلوة يا جدو يلا قوللنا ازاي إتجوزتوا؟
😊😊😊
★★★
🌹الشابة🌹 🧕
.لما كبرت وصرت شابه
كبرت أحلامي حبه حبه
قلت أحب زي الأحبه
لقيت الحب عاوز أطبه
فترة ولازم نمر بيها
نضحك، نمرح ونفرح فيها
نبنى قصور ونعليها
مع أحبابنا تزيد أمانيها
كل هدفنا نحقق ذاتنا
بس بشرع الله يا اخواتنا
بود نعوض كل ما فاتنا
حب الكل يملا حياتنا
كانت أحلامي فستان وطرحه👰
أعيش فى حب كبير وفرحة
فى شقة صغيرة مش شرط بِرِحه
أنا وحبيبى وذرية صالحة
يتحقق حلمي بجوازة ناجحة .
وحققت أمنياتى 👩🎓
ومع كل خطوة كنت بدور علي حُضن يدفيني👫💏
ويطمني في كل سنيني
كنت بحلم بفارس أحلامى
يجى ويقولى انت عشقي وغرامي
تعالى واركبى حصاني
ولبست طرحتى وفستانى👰
وفرحت فرحة عمرى يا خلاني
★★★
🌹الشاب🌹 👨
بدأت رحلتى وواجهت لوحدى صعوباتي
اتخطيت الحواجز وحققت أمنياتي
كبرنا والعمر كبر ويانا
فاكرة اول مرة كان فيها لقانا
يوم ورا سنة بنينا عمرنا
حلم وكبر ويايا
حققته بصبرك معايا
واصبح لينا كيان جديد
كيان بجد اساسه حديد
مبني بحب وعشق السنين
يااااااه وجات اللحظة دى
ولبست بدلتي وجيبت شبكِتي 🤵
وفرحت فرحتي مع نصيبي وقسمتي
ودخلت دنيتي وكانت جنتي
وكانت الفرحه مش سيعانى
وبدأت حياتى والإبتسامة في وشي مقوياني
وإكتملت معاها فرحتي👰🤵
وبدأت حكاية تانية لرحلتي
★★★★★
😍المرحلة رقم (2).😍
★★★
🌹الأحفاد🌹👨👧
الله يا تيته وعيني يا جدو احكوا بقي ازاي خلفتوا، 😊😊😊😊
🌹الأم🌹 👩🚀
اه يا انا حامل تعبانه شيلة وحاطة وكانت غلطة 🤰
عيل وتانى يا دماغي يا ني🤰
🌹الأب 🌹👳
انا كنت عازب متهنى
خالى البال وحدى بغني
إيه اللى على المر رماني
ولا نصحونى اللى قبل منى
شلت الهم والحمل قسمني
🌹الأم🌹 👩🚀
آه يانا منكم آه يانا
من نكران الخير تعبانه
في شغل البيت هلكانه شقيانة
كنس ومسح وتنفيض
ولا هو يساعد ولا يمد لي إيد
وسي السيد وعيال زنانه
طول اليوم روحي وودي
خدوي ياستي قومي وحطي
آه يا ظالمنى دانا طهقانة
🌹الأب🌹👳
نكد وعياط ناوية تجننى
وعيال تتشاقي مش راحمنى
طلباتهم ياما وفلوس واكلنى
والهانم علي طول غضبانة
ايوة هي هي كل يوم نفس السيمفونية
تعبانة وعيانة ومن العيال هلكانه
قومي يا هانم حطي الأكل
لجوزك اللي حيلةمن الشغل إنهد
مش في الرغي ساعة هنرط
كفاية عليَّ مصاريف مدرسةو دروس خصوصية
كان مالي ومال الشورى ديه
🌹الام🌹👩🚀
ومع عيالك كنت بهاتي
وأدلع فيهم وأفضل أدادي
بس لاقيتهم طَلَعوا عِينَيَّه
أصلي معاهم شفت كتير
ضرب ورزع وجري وتكسير
قلت خلاص معاهم أقلب مجرم خطير
بس يا ريتني ما قلت كده
قامت حرب بين العداا
قلت خلاص خليني صديق
وفي حضني أخدهم وقت الضيق
بصوا وإستغربوا أمري
وفضلت تحت التدقيق
وأنا وياهم مش راح أمِل
أبدا أبدا ولا راح أكِل
🌹الأب🌹 👳
حبيبي.. يا ابني
عاوزك تفهمني
عمري مني بيجري
وبكرا تخلد لي إسمي
حافظ ع النعمة لتزول
ومن الحرام إياك تنول
دا الحلال لو كان قليل ببركة الرحمن كتير
عوزك سند ليا
وقت ما الدنيا تغدر بيا
🌹الأم🌹 👩🚀
كنت بعاني من إهماله طول اليوم
بس صراحةكان عليَّ كتير اللوم
إنشغلت ونسيت نفسي
لا بقيت فاكره يومى من أمسي
🌹الأب🌹 👳
أيوه صحيح أهملتها بشكل صريح
لكن عمري ما هرضَلها التجريح
لُمْت نفسى ليه فيها بطيح
لازم أعوضها بشكل صحيح
★★★★★
😍المرحلة رقم(3)😍
★★★
🌹الأحفاد🌹👨👧
الله يا تيته حلوة يا جدو
بسرعة إحكولنا إوعوا تِهَدوا
قولوا سنينكم إزاى عدوا
🌹الجدة🌹👵
آه يا نا يارِجْلَيَّ ووجع ضهري وضعف عِنَيَّه
اسندني يا حاج وخُد بإديَّ
🌹الجد🌹👴
تعالي يا سِتي قال يَعْني انا ناقص
ما الروماتيزم كسح رِجْلَيَّ
🌹الجدة🌹👵
آه يازمن جيت ليه عليَّ نادي الواد او حتي البت
🌹الجد🌹👴
ماخلاص يا حاجة كله فشينك عيالنا كبروا وحيلنا إتهد
راحو لحالهم وياريت فيه سؤال او حتي ود
🌹الجدة🌹👵
آه يا حاج ياما كان نفسى فى بيت كبير
بجنينة واسعة فيها كل الخير
ماإنت عارفنى بحب التشجير
يضمنا بأولادنا وأحفادنا الواد أمير والبت هدير
وأعلمهم إن الحب مافيش فيه غنى وفقير
★★★★★
😍المرحلة الاخيرة😍
🌹الأحفاد🌹👨👧
حلوة يا تيتة حلوة يا جدو و جميلة جدا حكايتكم وجميلة كمان جنينتكم.
🌹الجد والجدة🌹 👴👵
حلوة بيكم وبوجدكم
★★★★★
😍الخاتمة 😍👵👴
.أحلى سنين العمر .. قصادي بتنادي
انتم ولادي .. وأغلى الولد احفادي
شايفة بعيونكم شوقكم ياغلا فؤادي
قلبي يضلل عليكم وروحي بتهادي
حلقة في ودانكم كلامي يا كُل أولادي
خلوا الود ما بينكم والكل بيه راضي
ومصر فعيونكم زينة وزهرة الوادي
ترابها ونيلها عمار . من جد أجدادى
لسه الحياة قدامكم ودربكم نادي
عيشو بسلام ومحبة واشكروا الهادي
★★★★★
🌹الراوي🌹 🧔👩🏫
وبكدا خلصت حكايتنا
وفهمتوا معانا عبرتنا
لازم نقوى عزيمتنا
ونحافظ على لمتنا
الترابط فيه قوتنا
أيام عمرنا وبتعدى
ياريت مع بعض نِهَدِى
حياتنا مش معايا وضدى
لازم نتعايش بشكل وِدِى
مش كل الحياة لونها وردى
🎄❤️💜بكل الحب خلص،الأوبريت 💜❤️🎄
🥀🥀🥀نرجوا أن ينال رضاكم 🥀🥀🥀
من تأليف :-هناء الغمرى🌺 عصام الدين محمد
حنان عبد العزيز🌺 محمد عبدالغني عمارة
نور أدهم🌺محمد يحيى شاهيناز حسنين
أمل عسكر🌺أحمد عادل فخرى
مع تحيات 🎀 جريدة إيجيبشيان جارديا🎀
