Bahandi (Mga Balak Ug Panultihon)

purgatoryo

sa kangitngit sa dalan,
usa ra gyud ang makatabang.
ang kahayag sa buwan,
aron ako makalabang.

niining walog sa kasakit,
lugar sa mga napakyas,
kasingkasing nga nagsangpit,
aron sila mahaw-as.

kay sila di na mahinumduman,
sama nako nga bag-ong nahiabot,
sa lugar nga kapait ang mahiaguman,
wa nay laing mahimo kundi ang musabot.

Tunlon ang kaguol
ug sapnayon ang mga luha
Kay ang paghukom nagkaduol,
Kay kining tanan di na man dula.

Pagmahay, pirming ulahi.
'Maypa', ang pirming madunggan.
Giusikan ang kinabuhi.
Mga oportunidad gisayangan.

Wa nay laing mahimo.
Wa nay masumbungan.
Wa nay panahong magsubo.
Kay kining tanan ako mang binuhatan.