قبل كان عندي واهس.. واهس الكلشي.. واهس للحجي.. للكتابة.. للبوح.. من تحجي الناس عندي واهس اسمعها.. من يشكولي عندي واهس افسرة الحجيهم وادور حلول المشاكلهم.. واهس عجيب لكلشي يخطر وما يخطر ع البال..
بس هسة.. ما اعرف وين الخلل احس قلبي يدگ بهدوء حتى اتعب حتى لو اركض احس الهدوء مسيطر كأني بمقبرة مو دنيا.. هدوء روحي مو هدوء عادي لا والله يخوف ينسمع بيه حتى النفس احس روحي دخلت انذار احس دخلت بعتمة ليل داكن الظلام احس دنياي هدوءها هدوء مقابر.. شنو هالركود؟؟!!.. احس الناس تركض واني باقية بمكاني.. حالة من اللاشي صابتني وصارت حياتي عبارة عن هذ اللاشيء..
افكر بيني وبين نفسي من يمتى واني هيج!!.. ما اذكر شگد صارلي واني هيج.. بس للاسف من رجع بيه الوكت عرفت شوكت وصلت للحد الممتلئ من الحياة حد الاكتفاء.. من دخلت ع صفحتة ولگيت الحالة مرتبط.. من عرفتة واني متأكدة ماكو نصيب بس ع الاقل بعد محد خذاه بعدة حتى لو مو الي بس مو الغيري ماكو امل نكون البعض بس هم ميكون وي وحدة ثانية.. كل هالامل كل هالثقة كل هالتفاؤل تلاشوا من شفت بالحالة صار.. مرتبط.. من صدمتي ضحكت.. حسيت بوقتها روحي سحگتها شاحنة الحياة ومرت علي ذهابا وايابا وكأن القدر ينتقم مني وباحقر طريقة.. حسيت بالظلم.. حسيت بالاهانة.. حسيت بانو الحياة خانتني.. حسيت بهواي شغلات وكلها توجع.. صرت اتمنى القدر يتجسد گدامي ع هيئة كائن ع الاقل حتى اضربة بس لو كف واحد ميخالف حتى لو قليل بس ع الاقل ارد اعتباري شوي لان مو كل مرة انت التضرب واني بعد اگدر.. اگدر اضرب واشتم وازعل..
بس اكو نقطة بهذا الموضوع الصالحي روحي.. روحي ساكنة النجف واني بحالة وحدة التقي بيها اذا متت لان من عاداتنا نندفن بارض النجف من هيج اكو احتمال ولو كان 1% يجي فد مرة للمقبرة ويشوف لافتة قبري ارجوك يا ربي بس هالمرة سويها الي لتخليه يمشي ولا كأن شافني خليه يعرفني اذا قرأ اسمي صدگني حتى لو كنت بالحياة الثانية وحتى لو كنت بجهنم راح تكون انت تصبيرة صبري ع كل الم راح اعيشة اهم شي اريد الفاتحة منك الي وبصوتك.. ولتخاف مراح تخونها الحبيبتك لان مراح اقبل تكون بموضع خطأ بس هيج الفاتحة وانطقة الاسمي بصوتك وكافي وبس ما اريد اكثر هذا يكفيني منك دنيا واخرة وكأني امتلكت العالم كلة وغلاتك..
أنت تقرأ
في زوايا النجف
Fanfictionانا جل ما اخافه هو ان تذهب كل محاذيري ويعود قلبي للنبض مجددا😐 رحماااااك يااااا الله
