انتقام الحب الجزء الثانى بقلم امنية الربحانى

الفصل الرابع عشر (فقدان حبيب)

الفصل الرابع عشر (فـــــــــــقدان الحبيب)

بترجع رحمة للواقع بعد ما بتحكى لاميرة حكايتها مع احمد وازاى اتقابلوا

رحمة: بعدها جالى الكلية اكتر من مرة بحجة انه عايز يطمن عليكى وبعدها صرحلى انه معجب بيا وانا كمان حسيت انى معجبة بيه وحسيته فعلا مختلف عن حسن ومع الوقت حبينا بعض واتخطبنا بس يا ستى هى دى الحكاية

اميرة: يا سلام يعنى عايزة تقوليلى ان انا السبب فى الخطوبة دى

رحمة: بالظبط كده

اميرة: ربنا يسعدكم يا رحمة. طبعا مش محتاجة اقولك لو احتجتى اى حاجة انتى واحمد عشان جوازكم انا تحت امرك

رحمة: عارفة يا اميرة من غير ما تقولى

اميرة: المهم يا رحمة انا بعتلك النهاردة عشان اقولك انى محتجاكى جنبى الفترة الى جاية

رحمة: طبعا يا حبيبتى انا جنبك يا اميرة فى اى حاجة محتجانى فيها قوليلى عايزة ايه؟

اميرة: بصى يا ستى انتى عارفة انى دلوقتى بقيت انا الى ماسكة شركة عاصم بشكل مؤقت على ما ربنا يهديه ويرجع

رحمة: عاارفة يا اميرة واستجدعتك اوى لما عرفت الى عملتيه مع عاصم رغم كل الى حصل بينكم

اميرة: ما علينا المهم انا محتجاكى فى الشركة هنا دكتور طارق تعبان وانا المفروض مكانه لحد ما يقوم بالسلامة ان شاء الله ويرجع لشركته وانا بصراحة مش هقدر الاحق على الشركتين ومحتاجة حد يبقى محل ثقتى اسيبه مكانى هنا فى الشركة وانا هتابعك كل شوية

رحمة: انا يا اميرة؟

اميرة: اه يا رحمة انتى مالك اتخضيتى كده ليه انتى نسيتى انك مهندسة ولا ايه وكمان انا بثق فيكى جدا وعارفة انك هتعرفى تمشى الشغل كويس فى غيابى

رحمة: انا مش عارفة اقولك ايه يا اميرة

اميرة: تقوليلى انك موافقة وهتقفى جنبى

رحمة: مقدرش موافقش ويارب اكون قد ثقتك فيا

اميرة: انا واثقة فى كده يا رحمة

فى عيادة الدكتور:

اميرة نايمة على السرير بتعمل سونار

اميرة: خير يا دكتور طمنى البيبى كويس

الدكتور: لا تمام متقلقيش هو وزنه قليل شوية . محتاجين نتغذى اكتر يا مدام اميرة لكن هو صحته كويسة

اميرة: والله يا دكتور انا باكل على قد نفسى

الدكتور: اهم حاجة نفسيتك تبقى كويسة عشان نفسيتك اكيد بتأثر عليه

اميرة: دكتور هو انا ممكن اعرف هو ولد ولا بنت

الدكتور: اه طبعا يا مدام اميرة هشوفلك نوعه حالا. انتى نفسك فى ولد ولا بنت؟