انفجار

البداية 💔

#انفجار
الحلقة ( 1 )
قصة واقعية
قصة حقيقية
احداثها في سنة  2015
.
.
.
.
تنويه ( جماعة الي قالو علي قصة ظلمني ابي افلام هندية لو سمحتو متكملوش قراية علي رغم الاحداث والعذاب اقل من قصة ظلمني ابي بس ومش اي حد يصدق انه في قصص هكي علي الاقل خود الحكمة ومتصدقش القصة تحياتي ليكم )
#محمد_مالك

والله ما طالبة تعاطفكم بس نصائحكم ليا لا اكثر لا اقل وتاخدو الحكمة ومرات ربي يحطكم في موقف زيني

السلام عليكم ورحمه الله وبركاته
اهلين اسمي زهور مواليد 1988
طبعا احداث القصة حتكون في 2015 يعني مش تحسبو علي 2018

عمري 27 سنةة نعرفكم ع عيلتي قبل ما نبدو في القصة

اني زهور الصغيرة في عيلتي عندي زوز خوت اكبر من الي هما سامر وعبد الله
طبعاا سامر الله يرحمه ويغفرله مات بي طلقة طائشة في درنة في 2012 ربي يرحمه ويغفرله كان حنون عليا وهوا الكبير
وبعده يجي عبد الله مواليد 1986 اكبر مني بي 2 سنين امي كبيرة في السن وتجوزت عمرها 37 سنة يعني كبيرة وبوي كذالك ربي يحفظه ليا

مهم
اني متخرجة صيدلة ومكملة قرايتي والحمد الله بس منخدمش يعني تخرجت وقعمزت في الحووش
وخوي عبدالله متجوز ليه سنة ونص بس متجوز لكن ربي رزقه بي تؤام اسمهم حسن و حسين والزوز عسسسل بكل

مهم اني منكذبش عليكم مش حلووة واجد بس كنت بيضة وعيوني عسليات وسمينة شوية 💔😅

ع المهم ميجوش خطاب هلبا وماما ربي يحفظهاا تقولي اي حد يجي طول وافقي مش كيفي اني قعدت لحد عمر 38  خوالك عذبوني وروني عذاب الهدهد
واني نقولها حاضر يا ماما حاضر يا عيوني
لحد اليوم المشؤم 💔

نضت الصبح نفس الحياة ما فيش جديد اني وماما نظمو الحوش ونطيبو غداء وبابا يروح يتغداء ويطلع يعني يقعد شوية في الحوش يخدم مقاول وكبير في سن ربي يحفظه ان شاء الله

خش بابا

بابا / زهور

زهور / نعم ؟

بابا/ نادي علي امك

زهور/ ماما تعالي

ماما/ شن في

بابا/ اليوم بيجي حد يخطب زهور

ماما / من هوا به تعرف عليه حاجة وولد من ووين يسكن

بابا/ ولد كويس وعاقل ويخاف ربي وجاي زيارة لي درنة هوا

( ملاحظة نسكنو في درنة )

ماما / به ان شاء الله خير

طبعا اني ارتبكت زي اي بنت يعني عادي الموضوع
مهم هكي المغرب رن الجرس بابا فتح
ونسمع فيه يقوله تفضل تفضل اهلا وسهلا بيك

ماما/ خيرك متوترة

اني / هههه لا شئ

ماما / سلم بنتي بنفرح بيك قريب والله لما نديره عرس ماهو عرس