وصيه أخي

البارت السادس

صعد الجنط ودخلهن وكال :

دخلي بويه ارتاحي تمددي تعبتي اكو اكل بالثلاجه ومي دافي اذا تردين تسبحين انه رايح اجيب الاجهزه الي اجيت علمودهن ساعتين ثلاثه واجي اذا تحتاجبن شيء او يصير شيء اتصلي عليه

-اوكي ... بس ماعندي رقمك

فتح الرمز مال فونه كدامي و كال رديلي رقمج

انطيته الرقم فأاتصل على جهازي وكال : وهذا رقمي يلا انه رايح

-الله وياك

سديت الباب وراه ودخلت افتريت بالشقه شوي نوب شربت مي وطلعت ملابس بيت ورحت سبحت و نشفت شعري ونمت بسرعه من التعب

بعد اربع ساعات تقريبا سمعت موبايلي يدك ففتحته بدون مااشوف منو وكلت :منو

-يا منو يول شنو ميته خوما ميته صارلي ساعه ادك بالباب

بعده النعاس بعيني فكتله : هممم اي جايه

وسديت الفون ورجعت نمت

بس غفيت سمعت صوت الموبايل من جديد غلست بس ضل يدك ففتحته بعصبيه وصحت: شنوووو

-يمعوده وينج نمتي

طفرت من الفراش بعد ما صحصحت على صوته العصبي وكمت ركض فتحت الباب

دخل وهو يسأل : وين جنتي ... اشتعلوا عشيرتي وانه منتظرج

- ما حسيت والله نمت من التعب

-من شوكت

-من رحت سبحت ونمت

هز رأسه وهدأ شوي وكال : جبت هذا عشه بس صبي بين مااسبح واجي نتعشه

كتله : بس اخذ غفوه حباب بين ما تسبح

ضحك وكال : يلا عمي قابلين امرنه لله

توني حطيت رأسي على المخده وسألني : وين الاغراض الي كتلج خليهن بجنطتج

جاوبته : بالجيب الفوك مال جنطه

مد ايده حتى يطلع الاغراض وتذكرت ان اني حاطه ملابسي الداخليه بهذا الجيب

فكمت بسرعه وشفته لازم حمالتي ويضحك ويكلي ذني مو اغراضي متاكد

من الدوخه والخجل صرت حمررره ولزمت الكوشه الي بصفي وضربته بيها حتى يذب ملابسي هو وكع بالكاع من الضحك
ويكول وهو لازم بطنه من الضحك : يول عساس انه ما شايف حمالات قبل بس بصراحه اول مره اشوف هذا القياس

طبيت جوه الغطه من الخجل ردت اطب بالكاع مو بس جوه الغطه وهو ضل ميت من الضحك

مسح دموعه وسكت بالكوه وكال : ههههههههه يلا بويه كومي طلعيلي اغراضي لا هم يطلعلي غير شيء

عاد اني رغم خجلي طفرت من الجربايه لا هو يطلع من جديد وانفضح

صرت اسحب بالحجاب حتى اغطي وجهي من خجلي وبالكوه طلعتله اغراضه وطفرت تغطيت ونمت