بقلمي الاميره الموسويه 👑
ما احلل لاي شخص ياخذ كتاباتي وينشرهم (ذمه)
بنات حبتعد عن الروتين تعريف الشخصيات واشكالهم حتكتشفوها من سياق السرد 💙
بطل القصه من تلعفر بس اني حسردها بلهجة بغداد بما انو هم عاش ببغداد.
يوم الاربعاء .. 10/9/2014 هذا اليوم والتاريخ مستحيل انسى ... كان اسوء يوم بحياتي .. واتعس تاريخ عالق بذاكرتي !
رغم السنين الي مرت .. الايام السوده والسعيده .. اللحظات الحلوه والمره .. كل الي عشته وكل الي شفته .. كلها ممكن انساها او حتى اتذكر جزء منها ...الا هذا اليوم اتذكر كل تفاصله ..!
كل ثانيه مرت عليه .. او بالاحرى مرت علينا ... كل جرة نفس ... كل الخوف كل الرعب الي عشنا بهذاك اليوم كان سبب بنجاتنا ..
الدنيا كانت ليل والجو حار الصيف المكان عباره عن صحراء .. يغطيها طلام دامس الضوء الوحيد الي يدلنا ع بعضنا كان ضوه القمر الهافت!
اراضي وعره .. حيوانات اشكال والوان .. متعرف شنو الي ممكن يصادفك!
بس كل هذا بكوم ..... والي شاردين منهم كوم ثاني!
كنت امشي بسرعه وحذر ، اتعثر واكوم من غير ولا نفس .... كنت عايش رعب انو يصادفونا بالطريق ... والرعب هذا سببه مو خوفاً على نفسي ..!
لاااااا كنت خايف ع الي كانو بمعيتي ..... الي خضت هذا الرعب بس حتى اضمن نجاتهم!
امي .... و اخواتي الـ 3....!
كنا عائله مسالمه .. حالنا حال كل العوائل الي عاشت الفقد والقتل!
بيتنا صغير على كد حالنا .. رغم بساطته وفقرنا بس الدفء والحنان الي بي متلكى بقصور الملوك!
ابويه رجال طيب لدرجة السذاجه .. وامي ربة بيت مخلصه ومتفانيه لابعد الحدود!
اخواتي 3 اصغار اعمارهم متتجاوز ال 15 سنه ... زينب 14 سنه .. مريم 12 سنوات .. كوثر 5 سنوات .. واني كبير امي وابويه ... 19 سنه!
ابويه كان يسوي المستحيل في سبيل يوفرلنا سبل الراحه وانكمل دراستنه .. كان ميقبل احد بينا يبطل لو يتكاسل بدراسته .. وفعلاً كنت اني اول الي قطف ثمرة تعب ابويه لما اتخرجت من السادس بمعدل خولني ادخل هندسه!
رغم هذا ما كان حلمي كنت اتمنى ارفع راس ابويه واطلع درجة دكتوراء .. بس تعرفون الاحداث الي صارت بالبلد القتل والخطف .. أثرو هواي على حياتنا بحيث عدة ايام ابويه كان ميطلع للشغل بسبب الحاح امي وخوفها عليه .. وكانت المسؤوليه والمصاريف تزيد ويا كل يوم يكعد بي!
