بقلمي الاميره الموسويه 👑
مااحلل لاي شخص ياخذ قصصي وينشرهم (ذمه)
اخر شي سمعته كان صوت الرمي .. واخر شي شفته اخواتي المرعوبات والاضواء متوجهه علينه .. اخر شي حسيته مااعرف شنو اخترق رجلي وافقدني توازني!
وكعت للكاع وما دريت شصار ... الالم كان فضيع واني لا اكل ولا شرب لا راحه لا نوم ، والرعب والقلق اخذو مأخذهم مني ... بلمح البصر فقدت وعيي .. بعد عدة ساعات مرت مااعرف اشكد ... كعدت!!!!
لكيت نفسي نايم بغرفه صغيره شبه ظلمه وبيها ادويه واجهزه كهربائيه !!
محد يمي بس اني!!
رفعت نفسي بصعوبه راسي يوجعني .. وألم فضيع برجليه!!
باوعت على مكان الالم رجلي مضمديه والبنطرون مالتي نصه مشكك ماكو!!!
عرفت من المنظر والالم انه اني اتصوبت .. بس منو عالجني ... اني وين
... اهلي وينهم؟!!
وامي!!!!
... امي واخواني بس لا صار بيهم شي .. حاولت استرجع الي صار .. اخر شي جنت شايلها على ظهري من وكعت ... بس لا اتأذت!!
بمجرد ما خطرت الفكره ابالي فزيت من مكاني ورغم الالم جان ما ينحمل حيييييل دست على جرحي و وكفت كدام الباب المسدود .. دكيته بكل قوتي وصحت ... يممممه ... يممممممه ... وينج يمه ... طلعوني منا ... امي وينهاااااا .... بقيت ادك بالباب واصيح اشويه وسمعت صوت مفاتيح والباب ينفتح!!!
اتراجعت ليوره ... ودخل واحد لابس عسكري شكله اسمر بس مبين من الجيش مو من التنظيم من لبسه وترتيبه ...!
عاط بيه بصوت عالي ...
_ اشبيك يول شكو دتعيط يمه ما يمه ... شنو زعطوط انت؟!
فرسان .. امي وينها دخيلك اريد اشوفها .. امي مريضه بس خليها تشوفني اخاف ع بالها بيه شي وتتخربط .. اترجاك بس خليني اطلع اشوف امي.
الجندي .. اخي ممنوع تطلع الى ان يتأكدون من اوراقك الثبويته واذا طلعت مو ارهابي وماعندك شي تتوكل بالله تشوف امك.
فرسان .. اني مو من التنظيم والله وحتى اسأل الولد الجندي الي جابنه هو يأكدلك هالكلام.
خليني اروح اشوف امي .. دااكلك امي مره مريضه وعدها ضغط وسكر ما تتحمل هبطات.
الجندي .. لتخاف النساء الي اجو وياكم كلشي مابيهم ومحد انصاب بس انت .. واني هسه اروح اشوف اوراقك خلصت لو لا .. ارجع المكانك ولتسوي ضجه الي ان ارجعلك.
فرسان .. عافني وراح ... بقيت اني الوب عقلي كله يم امي اخاف صارلها شي ...!
مرت نص ساعه تقريباً ورجع الباب انفتح مره ثانيه ودخل واحد غير الي اجه قبل اشويه .. واحد لابس رتب وشكله مهندم ومرتب!
بيده اوراق يباوع بيهن ويرجع يباوعلي .. كالي بصوت حاد ..
_ انت فرسان محمد عامر ؟!!
فرسان .. اي نعم اني ؟!
