قصة هوانا بقلم ضي الدليمي الناشربارق العراقي

البارت_5_و_6_

#قصة_هوانا
#البارت_الخامس
#بقلم_ضي_الدليمي
#الناشربارق_العراقي
#اalnasheraliraqi9

نور:-
بعد ساعة ونص تقريبا طلعت من الحمام واني ميتة برد، جان الجو شتا(شتاء) وطلعت نمت من القهر حتى بدون ما اجفف شعري، نمت وما حسيت على نفسي، لزمتني الصخونة وبعد ما اكدر احس بشي، اريد اكوم ما اكدر، اريد احجي ما اكدر بعد، كمت أحس الدنيا دتفتر بيا، ماحسيت إلا على صوت ماما تبجي و تحجي ويا بابا كالتله:-
-يالله محسن كووووم خلي نودي البنية للمستشفى، البنية كلش تعبانة.
-يالله حطيلها شال على راسها بين ما اشغل السيارة.
-صار.
بعدها فقدت الوعي تماما ومحسيت الا على صوت الطبيب يكللها لماما حرارتها مرتفعة هواي واذا  وصلت لل41 يصير عدها تسمم بالدم ونفقد المريضة، وبعدها صوت بجي امي عبا المكان كله، وهمين رجعت فقدت الوعي ونسيت كلشي، الا شي واحد ما نسيته، حبي لادم الي جان ديكبر يوم بعد يوم، وفجاة نصدمت من عرفته على حقيقته.

اسيا:-
من شفت اختي شلون تمرضت كلش تندمت، ونقهرت وكمت ابجي مو بس البجي على مرض اختي واخاف لا اخسرها بس كمت ابجي على سوايتي وياها الي تفشل، اذا اختي صارلها شي فهذا يعني انه اني قتلت اختي....اي اني قتلتها، شلون ياربي شلووون، لا اني الي اكدر احجي ولا اني الي بعد اكدر اسكت، صرت مثل بالع الموس، اخ ياربي والتالي وياي. 1
نور:-
سمعت صوت واحد يمكن ممرض يكله للدكتور استعجللنا حرارتها دترتفع وصلت40، وبعدها سمعت صوت امي تكلي كومي بنيتي كوووومي لا تخليني اموت بعدج كووووومي، اني اكدر اسمع صوت امي بس ما اكدر احجي وياها، حسيت بنفسي فقدت السيطرة على النطق، وستمريت على هاي الحالة الليل كله، جان المفروض هسة اني اروح للمدرسة بس ماعرف شديصير بيا، بعدين كدرت افتح عيوني واحجي ويا امي، وبهاي الاثناء امي كلبت الدنيا الف الحمدلله والشكر صحيتي والف الحمدلله ربي ردج الي ولو اني ولا انتي ومن هالسوالف، بعدها اجا الطبيب وكعد يسالني اذا اشوف زين واسمعه وكذا....، تعبت بهل كم ساعة كولش تعبت، معقولة اني احب ادم هيج؟؟؟؟؟ لا ما راح احبه من هسة وجاي، راح اخلي يصير صفحة سودا بحياتي ونطوت، مو بس راح اطوي صفحته علمودي، ولكن علمود اهلي وبالاخص امي....امي الي اسمع صوتها تبجي وتنوح، امي ما الها ذنب، بس الذنب ذنب كلبي وراح ادفعه الثمن وادوس عليه وما امشي ورا مشاعري بعد.
1
بعد اربعة ايام...
-يمه اريد اروح للدوام كافي عاد صارلي ثلاثة ايام اني بالفراش طبت والله.
-لا نور...لا...ماكو هيج شي، اذا ما تخلص الاسبوع وتروحين تراجعين عند الطبيب ما اخليج.
-اوووف شسوي...امري لله...حكم القوي عالضعيف.
ضحت امي وكالت:-
-اي اريدج هيج ترجعين مثل كبل ضحكتج متفارك وجهج.
-ان شاء الله يمه...خو كالولج عني بهاي الكم يوم اطلكت لو مات ابني حتى ارجع مثل كبل(قبل).
-ههههه والله يا نور حتى بمرضج بشوشة.
نور:-
كدرت اتناسى ادم بس ما نسيته كلياً، شلون يكدر يباوعلي هيج،و ياخذ الي يريده من بنات الناس ويذبهم بلا كلب وماكو رحمة بكلبه....حسبي الله....هذا ميكول عندي اخت واخاف عليها، رجع كلبي يحن لادم بس ظليت ادوس على كلبي...ردت اتعلم درس من الي سويته ومثل ما يكول المثل رب ضارة نافعة، بس من راح اداوم شلون راح اكدر اباوع بوجه ازهار، هاي اخت هذا الحقير الي يلعب على بنات خلق الله، بس هي ما الها دخل، هي صديقتي كبل ما اعرف اخوها....
اسيا:-
الحمدلله طلعت نور من المستشفى، تندمت على الي حجيته وياها، بس هسة ما اكدر اكللها، لان راح ترجع تحبه، واذا عرفت هذا الحجي الي طلع مني جذب متحجي وياي، بس اني راح استمر بهذا الحال، يوم عن يوم لازم اكرهها بي، وحجيت وياها:-
-نور.
-ممم.
-متعرفين اليوم منو ذبلي حجي.
-منو؟.
-ادم.
-اي وشسوي.
-نور.
-ها.
-اعرف بيج تحبي.
-لا ما احبه.
-لا تحبيه.
-اي احبه.
-نور هذا غلط...وانتي بعدج بنوتة ببداية عمرج حرام تنصاعين لواحد مثل هذا.
-مااكدر انساه.
-لا تكدرين....تكدرين بعد ما تعرفين تصرافته، ولج هاي الجامعة كلها تحجي بي وباخلاقه المو زينة.
-خلاااااص اسيا...كااااافيييييي....ملييييييييت كاااافي مليييت، خلي يولي كرهته كرهته.
1
نور:-
عرفت من اسيا انه ادم مسمع حجي لاسيا ولصديقتها مريم ومتحرش بيهم، هو صح ما جان يحجي وياي بشي غلط بس جان يحجي وياي وماخذ ميانا، هو صح وداني بس 14 يوم بس صرنا نحجي اني وهو هواي، ومرة من المرات جانت ازهار ممداومة وكمنا نحجي ونضحك وكالي:-
-عمي والله انتي تونسين.
-هههههه...انت اكذر.
-نور.
-ها.
-والله انتي تنحبين.
-احم شكرا هذا من ذوقك.
صح ما جنت احط مكياج مثل اول يوم بس حبيته وضلينا نحجي، ما جنت اتوقع ادم يطلع منه هذا الشي، بس لازم انساه.
بعد 5 اشهر:-
نور:-
عدت ذيج الايام وخلصت منها وكدرت اطلع ادم من تفكيري بشكل نهائي، وظلت علاقتنا اني وازهار ورجعنا مثل قبل واحسن، صح ازهار متعرف شي عن بلاوي اخوها، بس حست انه اني بيا شي، واليوم جان اول يوم الامتحانات النهائية:-
-جاوبتي زين؟.
-اي الحمدلله، شنو جاوبتي عالسؤال الاول رابع فراغ؟.
-السياحة ولج هذا راجعناه كبل منفوت للقاعة.
-اوووف الف الحمدلله طلع صح...وهاي الجغرافية وخلصنا منها.
-باجر شعدنا؟.
-اسلامية.
-ازهار.
-نعم حبي.
-اريد نخلص امتحانات....اوف.
-نور شبيج حتى اني اريد نخلص، بس ماراح نخلص من صدك لان ورانا دورات تقوية مال سادس لاتنسين انه نحنا السنة الجايا سادس.
-ما نسيت يالله باي اجا الخط مالتي.
-بااااي.
اسيا:-
الحمدلله كدرت نور تنسى ادم او بالاحرى كدرت انسيها ادم، اعرف انه الكل راح يحجي عني وعن تصرفي ويا نور وشلون جذبت عليها، بس اني عندي اخت وحدة، واخاف عليها واخاف تنطي كلبها لشخص مو ثقة واهلي يعرفون بيها ويطيحون حظهت، نحنا صح عدنا كامل حريتنا بس الشغلة من توصل لبنية وشاب ذيج الساعة ماكو حرية وخير دليل على هذا الشي بنت عمي الي زوجوها لشايب لانه جانت تحب شخص وعلى علاقة وياه، الشغلة وما بيها اني اخاف على اختي واذا نفترض انه هي مسوية علاقة ويا ادم الشغلة راح يعرفون بيها اهلي حتى لو شما سوينا وراح يصير مصير نور نفس مصير عبير بنت عمو احسان.
بعد شهر...
-الام...بنات شرأيكم نطلع للمول.
-نور...اي يمه علواه.
-اسيا...اي والله.
-الام...يالله بنات كومو بدلو ملابسكم.
-نور...هيييييييي.
-اسيا...ههههههه زعطوطة مو بيدج.
نور:-
فرحت لانه راح نطلع للمول وشوية نتونس اني وامي واختي وركضت للغرفة وبدلت ولبست بنطلون ازرك كابوي وقميس لفوك الركبة نيلي وياه شال ازرك بس ورد ناعم ملون وجنطة نيلي وحذاء نيلي، واسيا لبست فستان طويل لونه كحلي وبي حزام رفيع من الخصر وشال وردي وحذاء وردي وجنطة وردي.
ـ الام…يالله يا بنات.
ـ نور…اي يمه اني اجيت.
ـ اسيا…دقيقة يمه دقيقة، لحظة البس الساعة واجي.
نور:-
طلعنا اني وامي واسيا للمول واخذتلي تراك وردي ونور اخذتلها عطر، اني ادري باختي تموت عالعطور،وطلعنا من المحل وامي رادت ترجع الفلوس جنطتها وابوي المحل متوهم وياها بالحساب هو كان لازم يرجعلها٢٠٠٠٠ توهم ورجعلها ٢١٠٠٠وامي كالت انتو فترو بين ما اني اروح ارجعلا الفلوس، وجنا دنفتر اني واسيا و إجا واحد گام يتحارش ويذب حجي، فمما درنا بال، لشوية اجوي اثنين وياه وانوب صارو ثلاثة علينا، ابوع ليميني وليساري اريد امي تجي، ماكو بعد، ونحنا ابتعدنا عنها هواي، وصارت كلش بلا ملح ويا هذولي الميستحون، وفجأة.....
&&&&&&&&&&&&&&&&&&&&&&&

#قصة_هوانا
#البارت_السادس
#بقلم_ضي_الدليمي
#الناشربارق_العراقي
#اalnasheraliraqi9

صارت كلش بلا ملح ويا هذولي الميستحون...وفجأة…

ـ شعندك هنا؟؟؟؟.
ـ وانت منو حضرتك؟؟؟؟.
ـ فجاة شفت هذا الي جان ديمشي ورانا اكل ضربه على وجها وصار الدم يجري من خشمة، اباوع للي إجا يفزعلنا....انصدمت صدمة  عمري، ادم...اي هو ادم....معقولة، لا مستحيل، وبعدين ركض هذا السافل واجا ادم حجا ويانا:ـ
-السلام عليكم... مرحبا نور شلونج.
ظليت متبسمره بمكاني محجيت شي وبعدين فض هذا الصراع الي بداخلي ورديت السلام:-
-وعليكم السلام، اهلاً...اهلاً، زينة الحمدلله.
ـ اسيا… شكرا على وكفتك ويانا اخويه.
ـ ادم… ولو انتن خواتي.
واخيرا اجت امي:ـ
ـ انتن وينجن كتلجن افترو بين ما ارجع القصور وانتن شردتن...بعدين حسيت بامي باوعت لادم وبعيونها نظرة تسائل عن هذا الشخص الي ديحجي ويانا... وقطعت علامة الاستفهام الي جانت على وجهها...
ـ نور…يمه هذا ادم...اخو ازهار...اجوي شباب الله يهديهم وذبولنا حجي واجا فزعلنا.
ـ الام…اهااا...اهلا وسهلا بيك ابني.
ـ بالمهلي خالة...يالله اني رايح حتى تاخذون راحتكم...امانة خوما محتاجين شي؟؟؟؟.
ـ الام…الله وياك ابني، اشكرك على وكفت ويانا، الله يحفظك لاهلك.
اسيا:ـ
اجا واحد ولد راد يفزعلنا وفجاة اباوعله يطلع ادم، زين هسة شحجي ويا نور، اكيد راح تكول شلون عنده سوالف ويا البنات وهو اجا فزعلنا؟؟؟، بس اني راح اعرف شلون الغمط السالفة عليها.
نور:ـ
معقولة هذا الي جا فزعلنا هو نفسه ادم، زين ليش...ليش وكف بصفنا وهو سوالفه ويا البنات تشيب شعر الراس، ورجعنا للبيت وبداخلي اسئلة اريد جواب عليها...
ـ اسيا...معقولة ادم يطلع منه هيج...زين مو هو زير نساء ومحد يلحكه.
ـ حبيبتي اني ادري بيج ليش هيج استغربتي من فزعلنا، حبيبتي نحنا نعرفهم واذا وگف ضدنا او ما ساعدنا راح تطلع سمعة مو زينة عليه ويدري راح تحچين عنه...
ـ مممم...هم تمام....يالله تعالي نزلي نساعد امي بالعشا.
ـ يالله.
ادم:ـ
طلعت للمول ويا جماعتي وشفت بنات اثنين ديلحكون وراهم شباب، والظاهر ديذبولهم حجي، باوعت للبنات شفت نور صديقة ازهار وياها اختها، رحت ساعدتهم وضرب واحد من ذولا المهيلگين، ومشى وراح، شلون يتجرأ يعاكس وحدة سكنت گلبي؟، رجعت للبيت وصعدت لغرفتي ومگدرت انسى نور، يالله بس لا اني احبها، اي نعم احبها وليش لا، سكنت گلبي وحبيتها، وحبيتها اكثر من عرفت انه اطباعها نفس اطباعي، قطع شرودي صوت المؤذن بالجامع يصيح الله اكبر، اذن العشا ورحت صليت وبالسجود دعيت من ربي انه تكون نور من نصيبي، مادري ليش گلبي حبها هواي، دعيت وكلني ثقة بربي انه ما راح يردني خايب، حاشاه ربي من انه يرد عبده.