“Ang Aking Pag-Ibig”
Nang makilala kita’y di ko mawari
Buhay ko’y nagkakulay at sa aki’y napako ang ngiti
Pag-ibig para sayo’y umusbong sa panahong kay ikli
Heto’t puso ko’y nahulog sayo at di ko na maikubli
Tayo ma’y di magkapantay ng damdamin
Hindi magbabago ang aking pag-tingin
Matamis mong pag-ibig ay aking hihintayin
At dito sa puso ko’y ikaw lang ang mamahalin
Ang aking Pag-ibig, inaalay lamang para sayo
Sa tabi mo ako’y mananatili kahit tayo’y magkalayo
Iyo sanang damhin ang tinitibok ng puso ko
Walang bahid ng pagpapanggap, sadyang ito’y totoo
Ang aking pag-ibig, maari mang iluwa ng lipunan
Hindi ko ito pipigilan bagkus ito’y aking patutunayan
Na ito’y marapat lamang na ipagsigawan
Lalo sa iyong harapan.
