تلاته ايام راقد في السرير مرهق ! نفس الارهاق و التعب و الفتور .. اليوم الرابع اتحسنت شويه و برضو ماقدرت اطلع من البيت قريب للاسبوع انا في البيت ، يادوب ماقدرت اقيف على رجليني و كان لازم اواصل شغلي و لازم امشي المطار جاتني ياسمينه قالت لي عايزة اتكلم معاك في موضوع مشينا الصاله قعدت و حرستها تتكلم كان وراي رحله بعد ساعات و انا جاهز عشان امشي المطار قلت ليها الموضوع شنو ! قالت لي رياض و انت راقد تعبان و مرهق في السرير كلنا شلنا هم انك خلااص وصلت الحد والنفس الاخير تقريبا يا رياض حالتك الوصلت ليها دي اقرب للموت بسنتمترات ، قربتا تفارق الروح و انت في اعظم اللحظات دي كنت بتسأل سندس وينها ! استعدلتا في قعدتي و قلت ليها قلت شنو ؟! قالت لي سألت من سندس يارياض .. و انتظرني اتم كلامي لأول مره يارياض احس اني بكره نفسي عارف ليه ! عشان حبيتك و استحملتك و اتجاهلت حاجات كتيره عشان ما اخسرك و للأسف خسرت نفسي و انا بحاول اتمسك بيك خوف من انك تخليني ، عارف يا رياض لمن وحده تكون جنب راجلها في مرضو و هو في عز المرض ده يسأل من بنت تانيه ده يعني شنو ؟ متخيل الاحساس الحقييير الوصلني لمن سمعت اسمها ! قلت ليها ياسمينه قالت لي اسكت و متقاطعني خليني اتم كلامي و ما تحاول تبرر لي اي حاجه ، رياض خلينا نتكلم بوضوح شويه انا عارفه اي شيء و عارفه علاقتك بي سندس قبل ما زين يتزوجها و عارفه كمان انو سندس ما ناقشه الخلاف البينك و بين زين ، رياض انا سمعتا امك و هي بتبرر لي امي سبب نفورك مني و بعدنا من بعض .. و عارفه كمان يا رياض انك اتزوجتا ترضيه بس لأهلك ، و ما ح الومك على العملتوا لانو الغلط في البدايه كان مني انا الوافقتا على الزواج ده و اتجاهلتا موقفك ، من البدايه كنت حاسه بمعاملتك لي ما مميزة ومافيها اختلاف من كوني صحبتك الزمان .. رياض انا عارفه انك ما حبيت بنت غير سندس و ما كنت عايز تعرس غيرها .. و عارفه انك اتجاهلتني بسببها و عارفه شعورك البتحسوا كل ماتشوفها مع صحبك و مقدره كمان خذلان صحبك ليك .. عارفه انك مريت بضغووط كتيييره و هي السبب في تدهور صحتك رياض انت ماشايف روحك ماشي ضعيف كيف! ما مركز مع كمية السيجاير البتشربها في اليوم ؟ رياض انا لمن حبيتك و قبلت اكون مرتك كنت قايله اني الوحيدن الحتقدر تسعدك لاني بريدك و بريدك اكتر مما انت بتتخيل ، انا ما دخلت حياتك عشان انهيك و ادمرك نفسيا .. عارفه انو وجودي حوليك بحسسك بالذنب اتجاهي وبزيد علي الزعل من نفسي و بكره روحي زياده لمن اشوف اني ختيت نفسي مكان شفقه و نظرات الشفقه البتصلني منك براها كافيه عشان توريني انا مابسوى شيء عندك .. انا ما عندي ذنب غير اني حبيتك ، دخلتوني في لغوستكم انا و اهلي ليه ! كان ممكن تصارحني بي اي شيء قبل العرس و انا كنت ح اتصرف و ما حاخلي العلاقات تخرب بينا .. و بين اهلي و اهلك ؛ ليه دخلتوني في نصكم انت و زين ؟ ليه حملتوني مسؤولية اغلاطكم ؟ كان تخلوني في حالي في بيت اهلي و تجوطوا براكم في حياتكم الكلها نفاق دي ! انا ماقادره ابرر موقف واحد فيكم و ماقادره افهم منو الصاح فيكم .. ماعارفه منو الغلط في حق التاني ، دايره اقول ليك حاجه وحده انا بنت ناس يارياض انا ما لعبه للإنتقام وما وسليه تتفشى فيها غضبك من صحبك و حبيبتك ، رياض لحدي هنا انا استحملتا قدرتي ، و انا ما الزوله الناقصه حاجه و ما الزوله المتسرعه انا اديتك وقتك و فرصتك و صبرتا عليك ، و اذا قعدتا معاك اكتر من كده بكون بظلم في نفسي و فيك بعد ده .. رياض عشان علاقات اهلنا ما تخرب اكتر من كده خلينا زي ما دخلنا بالمعروف نطلع بالمعروف ، و عشان الاحترام الباقي الشويه ده ما نفقدوا الاتنين لبعض الاحسن انو اي شيء يخلص خلاص ، رياض طلقني .. قلت ليها ياسمينه ؟ قالت لي انا ما مستعده اسمع اي كلمه منك ولا طايقه اسمع اي حاااجه او تبريير طلقني يارياض و خلي اي زول فينا يمشي في حال سبيلو .. قلت ليها كلامك ده بيعني انك قررتي و براك ؟ و بدون ما تنتظري مني رد ؟ قالت لي ما شايف انك استهلكتني بمافيه الكفايه ؟ ماشايف انك مفروض تعتذر عن الايام الكنت عايشه فيها مغمضه ما عارفه قصتك شنو ؟ طيب ما عايز تعتذر ولا عايزة منك تبرير .. كل الطلبتو منك تطلقني و كفايه نفاق يا رياض ، جو زي ده انا ماقادره اعيش فيهو بعد ده و الاحسن تريح نفسك من همي و انا اريح نفسي من العيشه دي .. رياض طلقني و ده قرار انا فكرتا فيهو و اخدتو بعد تفكير في كل الجوانب البعيده .. قامت على حيلها شالت شنطتها و نزلت ، تقريبا كانت مخططه لي اي حاجه قبل ما تشاورني و ده من حقها ، طلب ياسمينه للطلاق زعلني ما لأني دايرها بس لأني ظلمتها فترة قعادها كلها و حاسي اني شايل ذنبها معاي و ين ما مشيت حتى الرحله الأنا ركبتها و كنت طيارها بالعصريات كده .. بعد يومين من طلوع ياسمينه من البيت مشيت المحكمه اليوم التالت و الرابع وصلتها ورقتها في البيت وقعت عليها بعد ما كلمت ابوها بي انو سبب ال
انفصال "رياض ما عايزني اواصل شغلي كإعلاميه و انا ما بقدر اخلي شغلي " كأسره مثقفه ابوها مديها حرية الاختيار بس امها كانت عارفه سبب الانفصال من البدايه .. بقيت حر من اي قيود و احساس الذنب و تأنيب الضمير راح مع فراق ياسمينه ، احساس انك ما ظالم زول احساس مافي اعظم منو .. و انا زواجي اتدمر على اخر شيء ، سندس بدت حياه جديد مع زين و بعد شهور جاهم الولد 💔 الولد الأنا ماعارف افرح بيهو و لا ازعل على جيتو .. متخيله اني نسيتك ✋ حتى لو بقيتي ام انتي بالنسبه لي الحبيبه الاولى و الاخيره .. تقريبا ممكن اسميك مرضي لأنو الأنا فيهو ده ما حالة زول شديد .. مافي زول بحب انسان بالعظمه دي ؟ نسيانو صعب بالطريقه دي ؟ دي سنتين يا سندس من يوم نقاشنا و انا لسه ماقادر ؟ ما قادر انسى ادق تفاصيلك ياخ .. بتصفح في يوم الفيسبوك قريت عباره " و الحب الحرام يكوي الله به صاحبه كياً" سألت روحي احنا غلطنا في شنو ؟ حبك بيكوني فعلا ياخ ! لا قادر ابعد عنك ولا قادر اكون معاك ! في عذاب اكتر من ده .. غلطنا في شنو نحنا ! قمتا على حيلي و اتوضيت صليت ركعتين كده و مسكت المصحف قريت يس و بعدها دعيت لاول مره بالدعاء ده " ربي لاتعلق قلبي بما ليس لي " مشيت اتمددتا على السرير و بتذكر في سندس عامله شنو مع البيبي؟ فرحانه بيهو اكيد .. احساس الامومه عندها كيف ؟ دايما كنت بتمنى انها تكون ام لطفلي انا 😢 كنا مجهزين اسماء الاطفال البنحبها من اولاد وبنات و قسمه غريبه الاتمنيتو انا سرقوا مني صاحبي ..
يتبع.......
