(نهايه القصه الاولى من اسرار المشرحه )
قال مين يابنى ؟فين ؟لقيت الولد فى مكانه ببص لعمى سعيد عشان اقوله انه كان واقف لقيت وش عم سعيد هو وش الولد صرخت جامد ...لقيت ايد ماسكه فيا وبتهز فيا جامد وفجأه كل حاجه اختفت ولقتنى عالسرير اللى فى الاوضه اللى جمب المشرحه والدكتور عصام جمبى والشيخ طب ازاى هو مش المفروض الدكتور قال انه مروح ازاى هنا وانا ازاى على السرير سألت الدكتور انت رجعت تانى امتى صدمنى وقال هو انا روحت اصلا مش انت بعد مااتخضيت قولتلك اطلع نام بره شويه وانا هخلص قولتله ازاى انت قولتلى انك مروح وسيبتنى مع عم سعيد مع الجثه لقيته بيقولى ان ده ماحصلش ....
الدكتور عصام قالى ان اعصابى تعبانه ولازم اروح وساعتها اسلام رجع وقال ان هو هيكمل معاه ماكنتش قادر استوعب ان كل اللى حصل ده مجرد حلم ...
الشيخ محمد قرب منى وقالى لازم تقوى قلبك سواء اللى حصل ده حقيقه او وهم لازم تتعود ولازم تعرف تتعامل معاهم بصيت للشيخ اتعامل ازاى ياشيخ ومع مين دول ميتين الشيخ وقفنى فى الكلام وقالى بلاش تقول كلام تندم عليه روح دلوقت ولما ترجع بكره نتكلم ولو حصل معاك اى حاجه اتصل بيا على طول ... طلعت من المشرحه بس كنت حاسس ان خطوات رجلى تقيله جدا وانا طالع كأن حد ماسك فيها ...
بعد ماخرجت من المشرحه ووقفت تاكسى ببص على المشرحه لقيت الولد اللى كنت بشرحه واقف قصاد الباب وبيبصلى بغضب قولت لسواق التاكسى يمشى بسرعه وفضلت اردد اذكار طول الطريق ماكنتش قادر احكم احساس الرعب جوايا
وصلت البيت وكان باين عليا الخوف قصاد اهلى انا بقالى فى المشرحه سنه اول مره يحصلى كده اتوضيت وصليت وقرأت شويه فى سوره البقره ..
على قد ماانا عايز انام على قد ماانا مش قادر استوعب اللى حصل ...
بعد مانمت شوفت كابوس شوفت الولد ده فى المشرحه واقف وهو متشرح وجسمه كله بينزف من كل مكان وبعدين لقيته بيعيط ويقولى تعالى قرب منى قوى فضل يقرب وباب المشرحه اتقفل عليا معاه وفجأه لقيت التلاجه اتفتحت والادراج بتطلع لبره والجثث بتخرج قمت اتفزعت من النوم مسكت تليفونى واتصلت بالشيخ محمد كانت الساعه ٢ بالليل لقيته بيقولى انى لازم اتكلم معاه طبعا كنت فى حاله ذهول اتكلم مع مين ياشيخ ده جثه اتكلم مع جثه قالى الولد عايز يكلمك لازم تروح ليه قولتله روحله انت انا مش عايز اتكلم رد وقالى بس هو اختارك انت ولو ماروحتش هتفضل ملعون بيه طول حياتك ..
قفلت مع الشيخ والولد المفروض هيتسلم بكره لأهله عشان يندفن الشيخ محمد قالى انه الدكتور عصام قفله وحطه فى التلاجه الاولى فى الدرج الخامس طلعت من البيت كانت الساعه ٢ ونص بالليل
...وصلت المشرحه قدام المشرحه لقيته واقف بيبصلى انا مااعرفش جبت الجرأه دى منين ورغم الرعب دخلت سلمت على الحارسين اللى بره ودخلت المشرحه عم سعيد وعم صالح استغربوا ايه اللى رجعنى فى الوقت ده قولتلهم انى نسيت حاجه جوه وفى شويه حاجات هكملها بخصوص الولد عشان هيتسلم بكره ودخلت عند التلجات نبضات قلبى زادت وكنت مرعوب قربت من التلاجه اللى هو فيها وفتحت الدرج بتاعه لقيته ثابت فى مكانه حسيت بهمس ورايا بصيت بسرعه مالقتش حد ..رجعت بصيت فى الدرج لقيته اختفى قفلت التلاجه وقولت اكيد هلاقيه ورايا او جمبى حاولت ابص ورايا ببطأ ورعب لكنى مالقتوش برضو طب هكلمه ازاى ولا افهم عايز ايه دلوقت طلعت من اوضه التشريح ونزلت المشرحه من تحت لقيته واقف بيبصلى عند باب خروج الجثث وبيشاورلى مشيت وراه مدخل دخول وخروج الجثث وانت فيه فى النهار قمه الرعب وانا حاليا فيه وفى الليل ومافيش غيىر صوت الاموات حواليا وريحه الدم
كنت عايز اطلع اجرى لكن خوفت من كلام الشيخ محمد مشيت ورا والد لعند ماوصلت مخرج المشرحه وفجأه اختفى وصوت همس شديد حواليا صرخت وفضلت اقوله انت فين وعايز ايه منى ..
لقيته مره وحده مسك ايدى وبيقولى عايزك تجيب حقى ....
من صدمتى وهو ماسك فى ايدى صرخت بأقصى طاقه عندى وفضلت انده عالحراس بس ماحدش فيهم كان سامعنى وهو ماسك فى ايدى وانا عاجز انى اتحرك
فجأه لقتنى اتفكيت جريت دخلت المشرحه من جوه عشان اطلع من الباب الرئيسى وانا جوه سمعت صوت عياط شديد ...مشيت ورا مصدر الصوت لقيت الولد بس المره دى مش متشرح كان بجسمه الطبيعى
اتجرأت وسألته عايزنى اجيب حقك من مين
... قالى الموبايل عيد ميلاد بابا واختفى
طلعت من المشرحه على بيت الشيخ محمد وحكتله اللى حصل قالى لازم نوصل بيت الولد وصلنا البيت وسألناهم هو ليه موبايل قالوا اه مسكت الموبايل وكتبت تاريخ ميلاد ابوه كرقم سرى طبعا بعد ماعرفته منهم فضلت اقلب فى التليفون مافهمتش فيه ايه لعند مالقيت شات عالماسنجر برسايل من الولد لواحد صاحبه انه شاف عمه مع والدته وانهم شافوه الكلام ده قبل الحادثه بتاعته بربع ساعه يعنى امه وعمه هما اللى رموه من البلكونه ....
بلغت البوليس وامه وعمه اتقبض عليهم ....رجعت المشرحه انا والشيخ محمد فتحت التلاجه لقيته فى الدرج بتاعه وهو موجود فيه ووشه كان مبتسم والشيخ محمد شاف معايا ده خرجنا من المشرحه الشيخ محمد روح فى طريقه وانا وقفت استنى تاكسى قصاد المشرحه لقيته واقف عالباب بس المره دى مبتسم لكن انا قررت اعتزل التشريح انا مش هستحمل رعب زى اللى شفته ده تانى
استنوا حلقه جديده من اسرار المشرحه بقصه جديده... تفاعل كتير بقى ماتقروش وتخلعوا 😏😏
