#خرافتنا_الليلة
حكاية الغوله وكالة العصيدة
كان فيه مراة عندها سبع صغار وراجلها جاي وراقد وماعندهمش ماياكلو تطلع المراة هادي من صبح ادور ادور وتروح تلقى صغارها بيموت بالجوع تطبخ الرشاد وتقوللهم اشربوا الميه وخﻻص وكل يوم اتعارك هي وراجلها تقوله دير حل وهو مش معدل جاي وراقد
و في يوم مشت هي لي الوادي تشبح في حمام هلبة فوق الجبل بدت تغني تقول ياحمام تعال نمشطك ونقشطك ونديرلك خيوط في ريشك حمر وبيض شوية وجي هداك الحمام كله ملتم حداها بدت تاخد وتذبح بالدرقة في الشكارة تحط وروحت ووكلت صغارها حمام مشوي وراجلها اول واحد هجم علي الماكله وبدت كل يوم تمشي لي الوادي وادير في نفس الشي المهم ترحيت هي وصغارها لكن راجلها هامع دار فيها حاله قاللها تو تقوليلي كيف اتجيبي في الحمام قالتله حرام عليك تقطع في رزقنا كول وخﻻص صكر راسه لين خبراته والصبح جت بتمشي قاللها ﻻ خليك نمشي اني ونجيب حمام اكثر منك ومشي وقف في الوادي وغنى ياحمام تعال نمشطك ونقشطك ونديرلك خيوط في ريشك حمر وبيض وجاه هداك الحمام التم عليه خدي اصغر حمامه وذبحها قدامهم طار الحمام وهج من الوادي وروح للحوش طيب الحمامه وكﻻها وخلى الصغار بﻻ عشي بكت المراة والصغار ومشت تاني يوم المراة ونادت الحمام ماباش يجي قعدت ثﻻت ايام وماجي شي ولت لي الجوع هي وصغارها والراجل راقد وﻻ هااامه شي وفي يوم طلعت المراة ومشت برا القرية وين وصلت لي اخر حوش تشبح في حوش كبير وطلعت منه وحدة شكلها غريب️ قصقصت ونشدت الناس قالولها هادي الغوله️ الي تحب العصيدة وتاكل في الناس وتشم العصيدة في حوشها حتى من بعد بﻻد علي بﻻد المهم
قعدت المراة تراقب في الحوش ثﻻت ايام وعرفت امتى تطلع الغوله وامتى تروح خلتها لين طلعت وخشت للحوش لقت خيرااات مكدسه لمت في شكارتها الخضرة والدقيق والشعير والرز وصكرت الباب وروحت لصغارها فرحوا وكلوا وراجلها هجم علي الماكله هجم المهم بدت كل مايتم الي في شكارة تولي لحوش الغوله️ وتجيب مرة ثانية وقعدو اسبوعين ياكلو وزايطين لين راجلها قاللها تو تقوليلي كيف اتجيبي في الخيرات هادي كلها قالت حرام عليك تقطع رزقنا قاللها قولي وﻻخيرلك مابتش عطاها طريحه قالتله كل شي
الصبح جت بتمشي قاللها ﻻ اني بنمشي قالت رد بالك ادير عصيدة راهي تشمها الغوله من بعد بﻻد علي بﻻد قاللها خرفي قعدت تحلفله قاللها باهي
ومشي وهي وصاته ﻻن هو يموووت في العصيدة ومايقدر يشد روحه علي العصيدة المهم مشي ولبد وخلى الغوله لين طلعت وخش ياحنه لقي الخيرات اشكال والوان كلي لين شبع وعبى الشكارة وين جي بيطلع شاف الرب محطوط في الكوجينة والطنجرة حداه والمغرف قال خلي ندير عصيدة وناكلها ونروح ونسي كﻻم مراته
المهم اول مامس الطنجرة رنت رنه سمعتها الغوله وهي في بﻻد ثانيه جت مقلعه تجري شداته وجت بتاكله بدي يعيط ويقوللها ﻻ راك تاكليني عندي سبعة صغار وامهم نرفعك كوليهم فرحت الغوله وقالت هي نمشولهم المهم مرته الراجل لما ليل الليل وراجلها ماجاش شكت في الموضوع قعدت تعس قدام الحوش لين شافت راجلها جاي من بعيد ومعاه الغوله خدت صغارها ولبدت هي وياهم في البير وخدت ماكلتهم معاها جي الراجل والغوله مالقو حد في الحوش قاللها ماعندهم وين يمشو تو يجو قالت الغوله ثﻻت ايام بس نراجيهم وبعدها ناكلك قعدو ثﻻت ايام ومابان حد اخر يوم مقعمز الراجل والغوله قدام الحوش يراجو بالك يبان حد شوي قال الراجل اااه خاطري في عصيدة سمعاته البنت الصغيرة في البير قالت بصوت عالي يما حتى اني نبي عصيدة وسمعها بوها والغوله لكن ماعرفوش الصوت منين قال الراجل فرحان لي الغوله ها مش قوتلك توا يجو راجيهم شوي راجت الغوله اسبوع وماجي حد كلت الراجل
وروحت لي حوشها مرضت وماتت من لحم الراجل المر وطلعت المراة وصغارها وفرحوا الي افتكو من الراجل وسمعوا بالغوله️ ماتت وسكنوا في حوشها وبدت حالتهم كويسة
ومشيت️ من هداك اليوم وخليتهم وبعيني معاد ريتهم
وإن شاءالله تكون عجبتكم حكايتنا الليلة
منقول
للعلم مقريتهاش 😂💔ننزل فيها ع خاطر فييه ناس يقرو فيها بش ههههه
