#خرافة_الليلة
الحاجة سعيدة
(نبيها تمسح ع القلب غمة ونبيها تسكر لكل واحد فمه)
هذا ياحنة يامنة الحاجة سعيدة عندها خمسة ولاد الصلاة على النبي لاربعة الصغيرين اموصلتلهم ومازال الكبير فيهم والكبير الله ، واربعة ابنيات سقدت منهم ثلاثة ومازال اوحيدة صبية باهية
ايقولوا حتى العزري يبي قوة السعد مش غير الصبية بس وليدها لكبيرة في خوته ماتسخرلاش الحال وين ما تمشي تخطبله ما يصيرش
وكل مرة بسبب اشكال الوان وكله اتسخير من الرحمن ، وعاد العيلة وكل الجيران غير ايشوفوها بس وفي قولت خيرك ياحاجة سعيدة شن قصة هالعزري قعد مازال ، اتقولهم بكل ثقة ياحنة ايدور في الجمال والفعل الباهي وهذا من حقه مش حرام ، ايقولولها بلهجة كلها تلقيح وشماتة!!!!
انهاري عاد كبر مازال طامع حتى في الجمال !!!
اتقولهم الحاجة سعيدة بنفس لهجة الثقة اييييي طامع علاش لا الطمع في وجه المولى
وتكمل كلامها ديمة بجملتها المشهورة اللي كللللهم جيران واقارب حفظوها منها
( نبيها تمسح على القلب غمه *** ونبيها اتصكر لكل واحد فمه )
المهم صار عرس ولد الجيران ولبست الحاجة سعيدة حوليها لحرير الخضوري وهديكا لبلوزة الذهبية وطلعت الله واحد عليها وامشت لسهرية هيا وبنيتها وكنيناتها
وفي وسط الهدرزة والتفريج قالولها جارتها العقبة لوليدك مختار ربي يحن عليه قالتلهم ان شاءالله ...
ناضت وحدة من الكناين قالت وبلهجة كلها سخرية كان غير اينقص من مواصفاتها تو ايحصل ما كدس ربي غير لبناااااات وتو انشوفوا في الاخير الا ما ياخذها عاااادية شن بتكون يعني !!!
هديكا الحاجة سعيدة انضربت من كلام كنتها قدام الجارات
شوية ياحنة اتنط فيها حماتها قالتلها والله كانها جت عادية اهو طلعت لي سلفاتها وكملت العدد وضاع امل امي في كنة اقنييييينه وبعدها ضحكة خفيفة منها ومن الجارات ...
ياحنة تستاهل هذا اللي يقرض السانه وما يحترمش غيره
شوي ناضت الحاجة سعيدة وقالت مقولتها المعتادة
( نبيها تمسح على القلب غمه ** ونبيها اتصكر لكل واحد فمه )
الحاجة سعيدة امنيتها في كنة اقنينه وعاقلة وباهية انويشطة وفالحة وتعفس عفسة عزوزتها وتقيم العيلة بفلاحتها امسيكينة كناينها الاولات لا لون ولا عون من عين البايرة واختها فيهم غير اللسان الطويل و ولادها من عين لغزال وخوه الله ايبارك وخوهم لكبير عقل وفكر وهذا علاش طامعة في ربي يرزقه ببنت حلال شكل وفعل
وكل من ينشدها عليه وكيف ولدك اكبر وشن مازل يستنى وفي شن مازال طامع وتو اتشوفي الا ما ياخذها عادية والا شينه
وخودلك من هالكلام اللي يحطم النفس لكن الحاجة سعيدة اتصد فيهم بجملتها اللي كلهم حفظوها منها لانها طامعة في كرم ربي وعارفة خير ورحمة ربي كبيييرة
ومرات السنين والحاجة قاعدة على كلمتها والناس قاعدين بنفس التحطيم .
لين ربي سبحانه اذن بالنصيب
هذا ياحنة وحدة من خواته امقعمزة في محضر لاحبابها وشافت بنت الله يبارك عليها ماتت فيها شكل وزين وطول وزادت اكتر لما لقتها فالحة زي الطقاشة تجري اهني واهني لكن قالت في نفسها ياودي شكلها صغيرة هلبة هيا وين وخوي وين !!!!
المهم من كتر ما عجبتها كلمت عليها احبابها صحاب المحضر ووصلوها بأم البنت
قعمزت بحداها وهدرزت عليها وحكتلها على خوها وتمت الدوة بالارقام التليفون ويصير خير والنصيب بالخيرة ..... تاني يوم اتصلت بنت الحاجة سعيدة بأم البنت اللي شافتها وكملت معاها الهدرزة .... طلعت حق البنت صغيرة لكن الام قالت احني نبوا السترة مع راجل ايصون وايحافظ اتفضلوا ياحنة وبالنصيب
وسبحان الله ربي لما ايسخر الحال كل شي ايتم تمام وتترتب الاحوال وكانها واتية من زمان انتظار سنين تم
في لحظات وكان ولد الحاجة سعيدة خاطب وعرسه اقرررريب
وعاد الحاجة سعيدة منو زيها فرحانه والقلب طربان وتغني ليل انهار خطبت وكملت وحددت العرس ولا كنة من كناينها رفعتها معاها قالت شييييي نبيهم ايشوفوها غير ليلة الدخول بس باش ينقهروا ويولي عليهم كلامهم كله
قرب العرس والتموا كل الاقارب والاحباب والجيران وفي قولت اشبح لعروسة شن عمرها واشبح كيف شكلها
واول ما خشت لعروسة انصدموا في قولت بخته حصلها زي ما يبي
ومرت الايام وكل يوم الحاجة سعيدة تحمد في ربي الف مرة اللي اتسخر الحال و ولدها اتزوج وزيادة اقنينه وزيادة اصغيرة وزيادة فالحة ولهلوبة وزيادة حصل صغيويرة زي العسل المهم زي ما تبي هيا وولدها
وحق انقهروا الكناين واتصكر فم كل حد اتكلم وعلق عليها وعلى ولدها وطلعت حق زي ما قالت
( نبيها تمسح على القلب غمه*** ونبيها اتصكر لكل واحد فمه )
الخلاصة
النصيب من ربي مش من العبد وربي قال اطلبوا زي ماتبوا واني نعطيكم وزيادة مادام الطمع في المولى نطمع ونطمع لان فضله ورحمته وكرمه لا حصر لهم ولله الحمد وعمركم ما تهزوا على حد اطمع في المولى
وأن شاء لله تكون عجبتكم حكايتنا الليلة
❤❤❤تصبحو ع ما تتمنووو ❤
