أول عزا بحضرو بحياتي كان لستي ..
فتت سلمت ع قرايبينا ورحت لأقعد بلعزى
ولا بتفاجأ بنت خالتي طالع وبتعطيني ابريق القهوة والفناجين وبتقلي بالله فوتي ضيفي عني بس خمس دقايق
ولك بس انا مابع.....
وكانت مختفية قبل ماكفي جملتي
أخدت نفس عميق وقلت هي قهوة مابدا كل هالتوتر..
فتت كان خالتي قاعدة اول شي واشرلتي مشان ضيف اللي جنبا.. قربت لعندا وكانت متشرب كاسة مي
قلتلا شو قهوتك سادة ولا وسط؟؟ ماشفتا غير اتشردقت وطلعت المي من منخارا
استغربت شبا؟!
طلعتني خالتو شوي لبرا وقلتلي ولك هي قهوة مرة.. انتي بعزا مو بخطبة.
طيب شو بيعرفني؟!
صبيت ورجعت فتت لضيف.. الاولى مابدا والتانية لا والتالتة كمان لا.. الرابعة اخدت الفنجان
ماشفتا غير مدت الفنجان وعم تقلي الله يرحما
رجعت صبيتلا. رجع شربتو بشفة وحدة ورجعت مدتلي ايدا وقالتلي الله يرحما
ورجعت صبيتلا.. قالتلي ولك خالتو الله يرحما بترابا ولله مرمر قلبي حيج
طيب قولي دايمة ليش متمدي الفنجان لكن؟؟ قلت بيني وبين حالي.
كان زحمة والناس مقابل بعضا والممر ديق.. وانا كنت سمينة
وصلت لعند ختيارة قصيرةصبيتلا فنجان ووطيت لاعطيها ياه رحت ضربت من ورا براس الليي وراي.. فتلت بسرعة لأعتذر منا رحت كبيت القهوة عالختيارة.. وطيت لأمسحلا ياها ضربت الابريق براس اللي جنبا
وهون صرت قول يارب دخيلك نجيني قبل مايصير عزاي أنا.. اجت خالتو فورآ كمشتني وشالت الغراض من إيدي وطلعتني برا.. ونحنا طالعين دعست ع إجر وحدة بالغلط وصرخ صوت
اجيت لاعتذر منا قالتلي خالتي دخيلك طلعي انا بعتذر لابقى تعملي كوارث..
يوما قديش ترحمو ع ستي.
.
