"انا بنت وحيدة بين 7 شباب، هالشعور كتير بشع، وانا صغيرة كنت بشوف البنات بروحوا مع خواتهم من المدرسة؛ وانا يجي اخوي الكبير يروحني، وبمرحلة معينة؛ كانوا صاحباتي وخواتهم يلبسو من بعض، وتيجي تحكيلي عن اختها وانها اطاوشت معها وانا اكون نفسي احس بهالشعور، جد كان نفسي يكون عندي اخت اشاركها كل شي؛ كانت كل حياتي مقضيتها مع اخوني الشباب؛ وخالتي تضل تحكي لامي ابعديها عن اخونها بكرا بتصير متل الصبي حسن !
اصلا تصرفاتها زلامية صايرة ...
ايش بتتوقعوا من بنت عايشة مع 7.شباب وهي اصغر وحدة فيهم، بعد ما فتت الجامعة، طلبني شب من اهلي، يومها شفت اخوني مجتمعين، وكل واحد فيهم ببحث عن شغلة !
اطلعت فيهم وحكتلهم ايش في؟
قالولي؛ هاد الشب دارس بهالجامعة، بشتغل هناك، مصاحب مرتين بحياته، امه متوفية، ابو بشتغل مقاول، خواتو 2 متزوجات؛ وقائمة طويلة !
انا ضحكت وحكتلهم مالكم؟ مش مركنين عقرارات اختكم؟
كل واحد فيكم عامل تحقيق جنائي ...
بصوت واحد حكولي يعني انتي موافقة !!!!!!
حكتلهم اه موافقة الشب محترم ورايدني بالحلال ..
اصغر واحد باخوتي، لقيته سكت ودمع !
الوسطاني صار يحكيلي لساتك صغيرة ...
الكبير اجا حضني وقلي مبروك يختي ...
الباقيين ضلو ساكتين !
بس اجو اهل الشب يطلبوني، كنت خايفة من هاللحظة واكون وحيدة فيها، بس كل واحد فييهم كان يعمل شي، اخوي يحكيلي هاد اللون حلو عليك، والصغير بزبط بالصالون، وواحد راح جبلي شوز مناسب ، لانه شوزي انكسر كعبه؛ وواحد فيهم كان بعطرني 😂
وكلهم كانوا صافنين فيي ويستنوا اطلع اضيف القهوة وبتخوتو؛ ويحكولي العريس شكلو منيح ....
بس فتت وطلعت، كانوا مصفصفين عالكنبايات، وبرموا بالعريس من تحت لفوق، للحظة حسيت انه هو فار وقع بين 7قطط مش طبيعين كانوا ، فرطت ضحك عليهم....
مرقت الأيام، واجا يوم العرس، اليوم الي رح اترك بيت اهلي؛ صاحباتي كانوا كلهم حوالي لاني وحيدة بالبنات وما عندي اخت، بس الاحلى انه اخوني ال 7 كانوا بكل مكان بروحله!
مثل صف العسكر ، معجوقين، وعاجقتهم، الفستان هيك حلو، طيب القاعة؛ الاغاني زابطين، كل شي حضرنا مع بعض، حتى لما رحت ارتب بيتي كانوا معي !
بتذكر مرة دخل علي اخوي الصغير وكنت اعيط ، بحكيلي مالك ، بحكيله مش لو عندي اخت كان تدربت عالرقص معها ...
بعد شوي ، دخلو عندي ماسكين سماعة كبيرة ومشغلين اغاني ويرقصوا ، انا حششت عمنظرهم كيف بحكولي يلا قومي ارقصي ابو الشباب معنا ، واانا اضحك واحكيلهم لا بستحي !
وكل واحد يعمل حالو مثل عريسي ويرقص شوي معي ، لحتى صرت اعرف ارقص .
بس طلعت من الصالون، اجو قبل عريسي يشوفوني، كان الصغير لساته بعيط!
قلتله ايش في؟
قلي كيف رح نعيش بدونك ؛ مين رح يقردنا ...
حكتله لا تخليني اعيط....
بس اجا العرس، دخلوا ال 7معي هم وابوي، ابوي كان ماسك بايدي وهم ال 7 ورا مثل صف السحيجة 😂😂منظرهم كان بضحك؟
بس وصلت المنصة، كانوا كلهم حوالي بصفقوا وانا ارقص بالنص، وبعدها طلعوا ...
طول العرس وانا اتذكر طفولتي معهم، كيف كانت كل حركاتي متل الشباب، اتذكر كيف كنا نتقاتل عالالعاب واللالوان ، وكيف لما كبرت صرت مسؤولة مثلهم!
اتذكر اسم "" اخت الشبباب"" ويخطروا ببالي انه لو عندي خوات صح اشي حلو بس هدول احلى بكتير ....
بس اجا يخلص العرس، لقيتهم فايتين وجايبين دبدوب كبير، وكل واحد حامل ورقة وكاتبلي فيها عبارة ، بس بلشنا نسلم للتصوير، انا ما عيطت، بس كلهم صاروا يعيطوا ونا اواسي فيهم ...
اطلعت فيهم وقلتلهم اخت الشباب شو؟
حكولي شب؟
حكتلهم ما رح اعيط لانكم رح تضلو سندي بكل مكان وزمان وانا مع الشخص الي عارف انكم بضهري !
اطلعوا فيي وحكولي بس احنا رح نشتاقلك يختي؟
حضنتهم مرة وحدة وصرت احكيلهم وانا كتييير .....
مين قال اخت الشباب، بتكون شب، مين قال انهم الاخوة مش أحن اشي بالدنيا، اخت الشباب، بتكون على قد حالها لانهم اخوتها مش شايفين غيرها ، وهي بتكون تتعلم منهم! وخصصوصا اذا كانوا بخافوا الله ومناح ...
زوجي لليوم ما بسترجي يزعلني بحرف، وكل ما نتمشكل بصير يمزح يحكيلي وراكي 7 يا حبيبتي بنسترجيش نزعلك !
"
