خلال الأسبوع حمد بات أيوب مرض وكل يوم قعد ايزيد مرضه ومايبيش ايعاين وبعد تازمت حالته جوه خوته واصرو ان ياخذوه ايعاين
شالوه للمستشفى وودخلوه وقعد اسبوع في المستشفى وطلبو تحاليل واجد وداروهن له وخذو عينات منه ويوم طلعت النتيجة امتاع التحاليل والعينة مشى ايوب وعمه مسعود للمعمل بيجيوبها ولما جو الصاحب المعمل
مسعود;تقدر اتقوللنا نتائج التحليل
فني التحاليل:من دون مااندس عليكم الاخ مصاب بسرطان في الدم واخطر نوع
أيوب ومسعود انصدمو
مسعود:انت متأكد ياخويا
فني التحاليل:هذا اللي طالع في النتيجة وتقدرو اتأكدو مالدكتور وربي يشفيه ان شاءلله
مسعود وأيوب طلعو مالمعمل وهما حالتهم حالة ومتأثرين وركبو في السيارة وايوب معش تحمل وانهار وقعد يبكي حاول مسعود ايصبره بس هو بروحه كان متأثر وخانوه ادموعه وبكى علي خية اللي ديما امعاه في كل صغيرة وكبيرة
بعد اشوي سكتو أيوب ومسعود وتوجهو شور المستشفى ولما وصلو رقو للدار اللي فيها حمد ولقو عبدالله وجلال وضنى حمد كلهم قدام الدار يرجو فيهم بيعرفو النتيجة
جلال:ها طمنونا شن صار
مسعود بحت في أيوب وسكت
عبدالله:احكو شن قالولكم
مسعود:قالو عنده سرطان في الدم بس اخطر نوع
عبدالله:لا ياراجل قول خير
جلال:شلتو النتيجة للدكتور
أيوب:لا مازال
جلال:شيلوها له بالك الدكتور يطلع كلامه عكس هكي
مسعود:توا ناخذله النتيجة توا خذا مسعود النتائج ومشى للدكتور وخش
مسعود:السلام عليكم
الدكتور:وعليكم السلام ها طمني جبتو النتيجة
مسعود:جبناها يادكتور بس اللي قاله لنا فني التحاليل مش خير بكل
الدكتور:خلو ايمانكم بربي قوي واللي ايجي من ربي كله خير
مسعود;ونعم بالله
الدكتور فتح النتائج وقعد ايشوف وطبعا زي ماتوقع لقى
مسعود:طمني يادكتور
الدكتور:اسمع يامسعود ماانخبيش عليك حمد عنده السرطان في الدم وهو انواع بس اللي مصاب بيه حمد هو اخطر نوع ويبي فترة علاج طويلة وحتدهور حالته بس لو تبوه ايقاوم لازم اتصبروه واتقووه عشان ايتقبل المرض لان اهم جزء في العلاج هو تقبل المريض للمرض وانتو لازم تقعدو جنبه واتحاولو اتخلوه يقبل مرضه بس لو ضعفتو قدامه هو بروحه حيضعف
مسعود:وشنو الحل والعلاج توا
الدكتور:مبدئيا مسكنات وبعد تحكوله علي مرضه وايتقبل الفكرة نبدو في العلاج الكيماوي واي تاخير عالجرعة مش في صالح المريض
مسعود صبى:مشكور يادكتور وطلع ووصل عند الدار اللي فيها حمد لقاهم كلهم مازالو برا يرجو فيه قدامها
الكل:شن صار طمنا
مسعود بحزن:نفس الكلام وقال لازم يضرب كيماوي وقال اي تأخير مش في صالحة
عبدالله وجلال:قعدو يبكو
مسعود دموعه ينزلو:مش هكي الدكتور قال لازم مانضعفوش قدامه وانقووه بيش ايتقبل المرض
وقعد يحكيلهم ان لازم ايصبو جنبه ويبيهم يسكتو
مع طلعة أمجد مالدار
أمجد:باتي يبيكم جوا
قعدو يمسحو في دموعهم وخشو وجا ايوب بيخش مسكه أمجد
أمجد:قولي شن طلع فيها النتيجة
ايوب:طلع عنده سرطان في الدم
امجد قعد يمسح بيده علي راسه ومعش قدر ايخش علي باته
"""""""""""
#جوا_في_الدار
خشو كلهم وبينو ان الوضع عادي
حمد:قولولي شن طلع في النتيجة
كلهم سكتو وقعدو ايبحتو في بعضهم
حمد:ماتسكتوش انا عارف ان عندي حاجة خطيرة قولوها مش حنتأثر لان راضي بحكم ربي واي حاجة اتجيني من ربي يامحلاها
عبدالله:حمد انت راجل مؤمن وقلتها بروحك كل حاجة اتجي من ربي سمحة
حمد:انا عندي سرطان بس وين جايني
عبدالله:سرطان في الدم والدكتور قال باذن الله حتشفى بالعلاج
حمد:الحمدلله علي كل حال كل داء وربي خالقله دواء
وقعدو كلهم يحكو مع حمد وايحاولو ايهونو عليه لكن حمد كان مؤمن بربه وكان راضي بالقضاء والقدر وكان متقبل مرضه 💔
"""""""""""""""""""
بعد اشوي خش الدكتور عطى حمد ابرة مسكن ورقد وهما طلعو مالدار
عبدالله:مسعود الدكتور ماقالكش امتى يبدى في الجرعات
مسعود:قال في اسرع وقت
أيوب:عمامي عندي رأي
الكل:شنو
أيوب:خلونا نطلعو بيه برا وانعاودو التحاليل وكان طلع نفس الكلام ياخذ الجرعات برا
جلال:وانا مع كلام ايوب برا انتأكدو اكثر
مسعود وعبدالله;باهي موافقين
أمجد:معناها طلععوه التونس
مسعود:خلاص من توا نطلع من هنا وانشوف الاجراءات ونعرف وحدين ينهولي
جلال:اهم حاجة اطلعو في اسرع وقت
مسعود:5ايام اسبوع بالكثير ونقعدو طالعين
عبدالله:يبقى الصبايا مااتجيبولهن سيرة شيئ توا نين انتاكدو
مسعود:هذي احسن حاجة توا يقلبنها مناحة ومعش اتفض
جلال:نبهو عالشباب ماحد يحكي
أيوب:ماعليك فيهم انا نحكيلهم كلهم
مسعود;انا طالع نبدى في الاجراءات
الكل:تمام
طلع مسعود ومش ايدير في اجراءات السفر كلهن
والباقي قعدو في المستشفى مع حمد
